ڈاکٹر منان جان گوں سنگتاں نمیران اِنت – شیردل بلوچ

412

ڈاکٹر منان جان گوں سنگتاں نمیران اِنت

نبشتہ کار: شیردل بلوچ

دی بلوچستان پوسٹ

انسان چوناھی ءَ بے بدل اِنت بَلے لھتیں انچیں انسان ودی بیت کہ وتی مَٹ وت اَنت ءُ آوانی کرد دنیا ءِ دیم پدر اَنت ءُ وتی کرد ءَ دنیا ءِ دیم ءَ پدر کن اَنت ءُ پہ انسان آسودگی ءِ ھاتر ءَ وت ءَ را زند ءِ اڑ ءُ جنجالانی دیمپان کن اَنت ءُ دومیئگ ءِ واستا آسودگی ءِ سبب جوڑ بہ اَنت.

اگاں ما دنیا ءِ راجدپترانی نیمگ ءَ چمشانکے بدے ایں، گڑا انچیں ازیمیں انسانانی مزنیں لڑے گندگ بیت ءُ آشوب ءِ پجار زانگ بنت، ھرچ زوراک ءِ دیم مُھکمیں آھنی دیوال بوتگ اَنت، وتی بے بھائیں سر اِش ندر کرتگ اَنت ءُ زوراک اِش پدکنز ءَ لاچار کرتگ، مرچی دنیا ءِ بازیں جاھاں زندومان بھشت ٹھیتگ اَنت ھما سرڈگار ءِ پرزنداں وتی آسودگی نہ چاراتگ بلکیں وتی راجانی وشھالی اِش گیشتر ھیال داشتگ ءُ پہ وت ءَ گرانیں راہ گیچین اِش کتگ، تُن، گژن، سردی ءُ گرمی ءَ ابید گید ءُ بند ءَ ھوار دراھیں مُشکل ءُ گرانیں بار وتی کوپگاں کرتگ ءُ گڑا وشیں باریگے ءَ وت ءُ سر اِش کتگ ءُ انچو گوش اَنت،

” ھون ریچوکیں راج کدی گلام دارگ نہ بنت”
بلوچ راجدپتر دنیا ءِ دیم ءَ چو ماہ ءُ روچ ءَ گندگ بیت، ھمے ھون ریچوکیں رھشونانی ءُ تمردیں پرزندانی برورد اِنت، بلوچ ءِ گوست بہ بیت یا انوگیں جاور بہ بیت بلوچ ءِ ریتگیں ھونانی گواہ تاریک دنت ، داں جھان ھست بلوچ راج ءِ نام زندگ اِنت، بازیں زورگیریں ھاکمے پروش ئِے داتگ ، بَلے بدنسیب اِنت بیست ءُ یکمی کرن ءَ انگت گلام اِنت ءُ وتی راجی آجوئی ءِ جنگ ءَ دست گلائیش اِنت، وتگڑیں پنچابستان گوں وتی گڈی جنگ ءَ میڑ ءَ اَنت ـ

سی بھاران پہ بلوچ راج ءَ سیاہ ءُ تھاریں روچے زانگ بیت.

وھدیکہ من اولی رند ءَ جاہ آھو ءَ گوں راجی رھشون، ڈاکٹر منان بلوچ ءَ دوچار کپت آں داں واجہ باگ ءَ درمانجاھے (میڈیکل اسٹورے) ءَ نندوک اَت،من اتک آں ءُ دروت سلام بوت ءُ ھمد ءَ مجلس ءُ دیوان بوت، باز وشیں گپّ ء ُھبر بوت، ھمد ءَ ما پجاروکی بوت ایں، ھمد ءَ ھمے گوشت اِش کہ واجہ ءِ بدلی ھمد ءَ جاہ آھو بگاڑی زیلگ ءَ بوتگ.
ڈاکٹر منان جان راست ءُ تچک گوشیں مردمے اَت ،چونیں ھبرے بُگوشتیں مردم ءَ را دیم ءَ ئِے گوشت ـ

بَہ کول واجہ ئیگ ءَ، من ءَ یکبرے میرابدلمجید بیزنجو لوگ ءَ نادراھے ءِ اِلاج ءَ بر اَنت، نادراہ ءِ الاج ءَ کنگ پد منی واستا نان میر مجید وتی لوگ بندوبست کنت وھدے من نان ورگ ءَ میر لوگ رو آں، یکیں گس ءَ نندان نان ورگ بندات بیت کروشوک /چمچہ درکار بیت نان دیوک ھمے گوش اَنت چمچہ گار اَنت گڑا من ءَ ھندگ ءَ گپتگ من ھمے نان دیوک نیمگ چار اتگ ءُ دست میر ءِ زی نیمگ ءَ ٹال کرتگ گوشتگ” انچو چمچہ ھست تو انگت چمچہ گندگ نہ ئے، سرجم دیوان بے توار بوتگ بلے یکے ءَ ھچ نہ گشتگ.

رند ءَ من وت بی این ایم باسکے بوت آں ءُ گوں واجہ منان جان من باز یکجاہ بوتگ آں،واجہ ازیمیں زانتکاریں ءُ مھروانیں رھشونے اَت، مدام دیوان ءَ ئِے بہ نشتیں گڑا ھندگ مزاک ھست اَت، واجہ وت کدی کدی گوں پُرھندگیں دپ ءَ گوں زور ءَ ٹھک داتگ اَت ئِے.

یکرندے مارا یک گوھارے ءَ ھمے گوشت” شمئے پند ءُ واریانی گندگ ءَ مردم ءَ را گریوگ کیت، بَلے ھندگاں گندیت سک وش بیت، کہ مردم انچو سرپد بیت شمارا مرگ ءِ ترس دل ءَ ماں نیست”.

نمیرانیں رھشون واجہ ڈاکٹرمنان جان ءِ بابت ءَ چنکس بہ نبیساں کم اَنت واجہ ءِ راجکاری کد ءُ بالاد سک مزن اِنت، واجہ ءِ شھادت ءَ چہ بلوچ راج یک مزنیں ھستی یے ءَ چہ زبھر بوتگ ءُ سی بھاران دوھزار شانزدہ ءَ واجہ پارٹی ءِ کارانی دیم ءَ برگ ءِ ھاتر ءَ تر ءُ تاب ءَ ماں مستونگ ءَ روت، ھمود ءَ شھید اشرپ بلوچ ءِ گس ءَ گوں شھید اشرپ بلوچ، شھید ھنیپ بلوچ، شھید ساجد بلوچ ءُ شھید نوروز بلوچ ءَ گوں شھید کنگ بیت.

شھید ڈاکٹر منان جان ءِ شھادت نا ایوک بلوچ راج ءِ واستا تاوانے بلکیں دراھیں ایردستیں راجانی واستایک بلاھیں تاوانے زانگ بیت.
ڈاکٹر منان جان گوں سنگتان مدام نمیران اِنت.


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔