ابدمانیں کارست ۔ مھروان کمبر

313

ابدمانیں کارست

مھروان کمبر

دی بلوچستان پوسٹ

شپ کپتگیں زندگی ءِ بے تواریں ھَور شادمانیں موسمانی پجیگ ءَ استال دْروشمیں واباں بارت ءُ دریا ءِ میار کنت۔ منی زندگی ءِ رودپتر ءِ تہ ءَ لھتیں انچیں ابدمانیں واب اَنت کہ آ من ءَ ھما دَور ءِ گْوازینتگیں زندگی ءِ درد ءُ دور، گم ءُ سکّی، کولنج ءُ وشیانی مارِشت ءَ دے اَنت۔
رودپتر ءِ تاک ءَ لیٹینان کناں گُڑا لھتیں انچیں سْیادی نبشتہ بَہ اَنت کہ زندگی ءِ ھمُک دْروشم ءَ ترا چو آدینک ءَ پیش دار اَنت۔لھتیں انچیں اکس بَہ اَنت کہ آیانی گِندگ ءَ ھیالانی دِرینے بُج اِیت۔۔۔۔۔۔۔آ اکسانی تہ ءَ لھتیں انچیں یات بَہ اَنت، لھتیں انچیں زھیر چکاریں گْوست ءِ ابدمانیں تْرانگ بَہ اَنت ءُ لھتیں انچیں کِسّہ بَہ اَنت کہ اے کِسّھانی آرگ ءَ یک تیوگیں اُمرے پکار بیت۔۔۔۔۔۔
اے کِسّھانی تہ ءَ لھتیں انچیں کارِست بَہ اَنت کہ آیانی شموشگ انچو ارزان نہ اِنت ءُ پد ءَ اے دابیں کارِست کہ انچیں وھدے ءَ تو زندگی ءِ گْران ءُ مُشکلیں پندے ءِ مُساپر بِہ بَہ ئے تئی راہ گار بہ بیت ءُ منزل مُجاں اندیم۔۔۔۔۔۔۔۔۔۔، بئیت ءُ ترا راستیں دگ ءَ بہ پِرّینیت ءُ مِنزل ءِ نشان ءَ بِہ دنت ، ترا یک نوکیں ھِمت ءُ جوزگے بِہ دنت گُڑا اے دابیں کارست چد ءُ گیش شموشگ ءُ بے ھیال کنگ نہ بَہ اَنت۔

جنرل اسلم منی زمین ءِ ھما زندگیں کِسّہ اِنت کہ جنرل ءِ ھمراہ انجیریں کارِست اَنت ءُ ھاک ءِ تہ ءَ چو سنگر نوبتیں درچک ءَ نمیران اَنت۔۔۔۔۔
مروچی بیست ءُ پنچ تاکشان(دسمبر )اِنت اے روچ بلوچ راجدپتر ءَ ھما سیاہ ءُ تھاریں روچ اِنت ، بلوچ گُلزمین ءِ ابدمانیں کارِست جنرل اسلم بلوچ گوں وتی ھمراھاں مئے چماں چِہ اندیم بوت ،پمیشکا! جنرل اسلم ءِ بے موسمیں جُتائی ءَ ماتیں گُلزمین ءِ کوہ، کَور، ریگزار، تیاب، چَول نود ءُ جمبر ، ھَور ءُ سنج دْرست موتکاں گْوشان اَنت۔۔۔۔۔۔۔، دشت ءِ ھمُک گْواڑگ گیمُرتگ اَنت۔۔۔۔۔۔۔، ھمُک پاتو مونجان اَنت۔۔۔۔۔۔۔، ھمُک مُرگ زھیر نالان اَنت،بلے! اُستاد ءِ پادانی پادبرمش۔۔۔۔۔۔، ٹھکانی توار۔۔۔۔۔۔، بچکندانی زاپرانیں وشبو بولان ءِ مَشت (کوہ) ءُ تلاراں انگت شِنگ ءُ تالان اَنت۔۔۔۔۔۔۔۔

جنرل اسلم بلوچ یک انچیں ابدمانیں چراگے کہ مِرگ نزانت۔۔۔۔۔۔۔۔ھر وڑیں ھَور۔۔۔۔، گوات ءُ شَرتگاں بلوچستان ءِ ھمُک کُنڈ ءَ ھمُک کوہ ءُ تلاراں۔۔۔۔۔۔، ھمُک کُوچگ ءُ شھراں تا ابد وتی رُژن ءَ تالان کنان اِنت۔۔۔۔۔۔۔

جنرل اسلم بلوچ پہ بلوچ راج ءِ ھاتر ءَ تھاریں شپانی دْرپشوکیں اِستالے اَت۔۔۔۔۔۔۔، تُن پْروشوکیں آپسرے اَت۔۔۔۔۔۔۔، راز پھازیں سِترے اَت۔۔۔۔۔۔۔۔۔، مُھکمیں مھر ءِ کلات ءُ سارتیں ساھگے اَت۔۔۔۔۔۔۔۔۔، آئی ءَ وتی زِند یک انچیں دْروشمے داتگ اَت، کہ کسے ءِ بِہ لوٹ اِیت ھم آ رنگ ءَ بوت نہ کنت۔۔۔۔۔۔۔، پرچاکہ زِند ءِ ھما رنگ ءَ بُوَگ ءِ ھاتر ءَ بازیں رنگاں چہ سر گْوزگی اِنت۔۔۔۔۔۔۔اے رنگانی سر گْوز کنگ اِنچو ارزان نہ اِنت۔۔۔۔۔۔۔۔۔

جنرل اسلم بلوچ ءِ دابیں آشوبی ءُ راجدوستیں رھشُونے ءِ مستریں کِردگار ھمیش اِنت کہ آ راج ءُ کَوم ءَ نا اُمیت بُوَگ ءَ نیل اِیت ءُ مِنزل ءِ سر بُوَگ ءَ سِکین دنت۔۔۔۔۔۔۔۔جنرل اسلم بلوچ دُژمن ءِ چہ رِپک ءُ پندلاں سُوھویں مردے اَت ، وھدے بلوچ ءِ جنگ ءَ نوکیں رنگ ءُ دْروشمے ءَ دیم ءَ برگ ءِ باریگ اَتک گُڑا جنرل ءَ اول سر ءَ وتی تنگھیں بچ دست ءِ وت پہ گُلزمین ءِ ھاتر ءَ سالونک کُت۔۔۔۔۔۔

مَروچی سالے سرجم اِنت کہ جنرل گوں وتی تاسُپیں ھمراھاں مئے میان ءَ ساڑی نہ اِنت، بلے آئی ءِ پِکر ءُ لیکو۔۔۔۔۔۔۔، آئی ءِ داتگیں کُربانی۔۔۔۔۔۔۔، آئی ءِ ڈس اِتگیں کِشک مدام مئے رھشُونی ءَ کنت۔ جنرل ءِ جسمانی جُتائی ءَ چہ نہ مارا گریوگ ءُ موتک آرگی اِنت ءُ نیکہ مارا گمیگ بَیگی اِنت،بلکیں مارا جنرل ءِ وڑیں رھشُونانی سر ءَ پھر بندگی اِنت چی ءَ کہ مئے سر ءَ پرز ھمیش بیت ما جنرل ءِ پکر ءُ لیکہ ءَ دیم ءَ برگ ءِ جُھد ءَ بہ کن اِیں ءُ جنرل ءِ پَشت کپتگیں کاراں وتی نزوریں کوپگاں بزوریں ءُ دیم پہ گُڈّی مِنزل ءَ جُنزان بہ کن اِیں۔۔۔۔۔۔۔۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔