پڑو ادبی کچاری نا سوغندی دود و محفل مشاعرہ

350

رپورٹ: امیرعباس

پڑو ادبی کچاری نا سوغندی دود ءُ محفل مشاعرہ یک شنبے نا دے تنظیم نا دفتر سریاب روڈ آ مس۔

پڑو ادبی کچاری نا دا مجلس اِرا بشخ اٹ مس، مجلس نا اولیکو بشخ اٹ پوسکن انگا کابینہ آن سوغند ہلنگا، کابینہ نا پوسکن گچین مروکا عہدیدار آتیان راسکوہ ادبی دیوان نا جنرل سیکرٹری خواجہ جمیل فاکرؔ سوغند ہلک۔ پوسکن انگا کابینہ نا عہدیدارک چیئرمین خواجہ سعید نور، وائس چیئرمین سگار بلوچ، جنرل سیکریٹری لونگ خان ذگر، پریس سیکریٹری امیرعباس، فنانس سیکریٹری حنیف بلوچ و آفس سیکریٹری فرمان بشر ئسک سوغند ارفیر۔

مجلس نا ارٹمیکو بشخ اٹ محفل مشاعرہ مس۔ ہرانا صدارت ءِ پڑوادبی کچاری نا چیئرمین خواجہ سعید نورؔ کرے ہندن مہمان خاص تیٹی راسکوہ ادبی دیوان نا مرکزی جنرل سیکرٹری خواجہ جمیل فاکرؔ و ورنا غا نوشتوک خواجہ یار جان زیب ئسر۔ وختس کہ سٹیج نا دود آتے تنظیم نا جنرل سیکرٹری خواجہ لونگ خان دوئی کرے۔ مجلس اٹ براہوئی بولی نا بھلو شاعر گَل اس ساڑی ئس ۔

مجلس اٹ چیئرمین خواجہ سعید نور ساڑی سنگت آتا منتواری تون ساڑی وخت انا براہوئی ادب اٹ شاعری نا بابت تینا خیال آتا درشانی ءِ کریسہ پارے کہ براہوئی بولی ٹی داسہ گڑاس ہندنو شاعری مننگ ءِ ہرا شاعری ٹی ملاسی ءِ ایسر کننگو۔ دا جتاو ہیت ئسے کہ بھاز آ شاعری تیٹی نرگسیت، صفت و چنکو لیک سینا تہٹی خیال آتا شاعری مننگ ءِ ولے ننے دا ہم خیال کروئی مریک کہ ہرا بندغ تینا ذات آن پیش تمک تو سرسُہب ء ُ ترجمان اس مننگ کیک۔

او مُستی بینزونگر نا ہیجن ویلٹ، مٹ ویلٹ و اَنویلٹ نا مثال ءِ تریسہ پارے کہ انسان تینا زند اٹ مُسہ بشخ تیر کیک اسٹ ہموکہ اوٹی او تینا ذات اسکان اختہ مریک ہرادے یعنی ہیجن ، ویلٹ ، اسٹ ہمو کہ تینا ذات ان گڑاس مونی سوچک یعنی تینا خاندان اسکان اونا سوچ محدود مریک مسٹمیکو ہمو ہرا کہ تینا قوم تینا راج و تینا ڈیہہ انا فکر اٹ مریک۔ ہندن ننے ہم تینا ذات، تینا خاندان ان پیش تمیسہ راج و ڈیہہ انا بارواٹ سوچوئی و نوشتہ کروئی ءِ ۔ ہندن نا نقاد اک بائدے داسہ شاعری ٹی JUDICIAL CRITICISM یعنی علم عروض نا بیرہ تنقید ان یا DESCRIPTIVE CRITICISM یعنی استعارہ، علامت نگاری، تشبیہ ، مجاز مرسل تا تشریح ہم مرے۔ انتئے کہ اینو اسکان براہوئی شاعری ٹی زیات تر ہرا تنقید کننگانے او بیرہ بحر و وزن نا بارواٹ مسونے۔ داسہ بائدے نقاد غزل اٹ ساڑی ہرگڑا نا جاچ ءِ ہلے اونا تاثراتی، نفسیاتی، تاریخی، مارکسی، متنی جاچ ءِ ہلے۔ اوٹی دا اُرے کہ کلیشے ہرے یا اف، اوٹی دلالت وضعیدلالت تضمنی، دلالت التزامی نا جاچ ءِ ہلیسہ رولاں بارات، و دریدا نا نظریہ نا رد اٹ جاچ ءِ ہلے تاکہ اسے پارہ غا براہوئی غزل نا بابت تنقید شون ہلے ارٹمیکو دا کہ نثر انا بشخ اٹ گڑاس کاریم مُستی کائے۔

خواجہ سعید نورؔ مستی پارے کہ ننا شاعر و ادیب آک بائدے غزل آن بار ادب نا ایلو اصناف آتیٹ ہم تخلیق کریسہ ننا قاری تا ملاسی ءِ مُر کیر ہندن ننا نقاد اک ہم دُن انگا شاعری تیا خوڑتی اٹ اُریر انتئے کہ شاعری ٹی بیرہ غزل و نثر اٹ افسانہ، ناول یا ڈرامہ غان بیدس کئی اصناف آک خاص کرغیر افسانوی اصناف آک داسکہ اورک ء ُ۔

ہندن پڑو ادبی کچاری نا مہمان خاص براہوئی بولی نا گچینا ورنا غا شاعر خواجہ یار جان زیب و اعزازی مہمان راسکوہ ادبی دیوان نا مرکزی جنرل سیکریٹری ورنا غا شاعر ادیب خواجہ جمیل فاکر پوسکن انگا کابینہ نا عہدیدار آتے مبارک بادی تریسہ دا امیت کریر کہ پڑو ادبی کچاری نا پوسکنا کابینہ تینا ذمہ واری تے پورہ کریسہ براہوئی ادب و بولی کن ہر پڑا مخلصی اٹ کاریم کرور. ہندن نن انفرادی وڑ اٹ و تنظیمی حوالہ غا ہر وڑ اٹ پڑو ادبی کچاری تون براہوئی بولی و ادب نا شونداری کن اوڑتون خُلّوک مرون و ہر وڑ اٹ اونا کمک ءِ کرون۔

پروگرام نا گڈ سر اٹ براہوئی زبان نا گچینا شئر پاروک استاد ساگرعزیز تینا سنگت آتون اوار پڑو ادبی کچاری ٹی اواری نا پڑو ءِ کرے او تینا گچین آ توار اٹ منہ غزل پاریسہ مجلس ءِ پین چس تِس۔

محفل اٹ ساڑی شاعر خواجہ غاتا کلامک و پِنک داوڑ ءُ:

خواجہ سعید نور:
سعید وا ہِربشی ءِ اینو
رضا نا خاطر، دغا نا رند اٹ

جمیل فاکر:
زند داڑے گُٹوئے زند داڑے کینکس کیک
بے سوب امر پاسہ جنگ داڑے نرگس کیک

یار جان زیب:
اگہ بسُن خدی نا جوش ئٹی نن
وجود ءِ خاک کینہ نیتو تینا

خواجہ مزمل:
مُر آن تینے باز دمس اندری خنان
کسکُن ہمو کا پد مرسہ خواجہ تینے آن
ایپار برف پوشا مٙش آ نن گنار ئٹی
دا پار غمتا دلدل ئٹی گٹ ءِ کاروان

شبیر آجو:
کُنپرو وارا غلامی دے ئٙس ہم
شادے آجوئی نا اے چٹّن بکان

سگار بلوچ:
نوابی تول ئٹی انتئے ننا دا
بلوچستان نمے اٙڑزان سُجا

لونگ خان زگر
:تکہ خلنگ عادت مسنے دا راج ئنا
ای امر ئٹ دا کسے سما اف

فرمان بشر:
ایتے جوزہ ئس یا رب دونو نی ننا زند ءِ
ال بقاہ نا چورک اٹ شاعری تے ہرفپہ

میر علی دوست:
لاش ئنا سما اف دا دیر ئسے دا دنا ءِ
جون ئنا ستم تیا قاتل ءِ تے ای چاوہ

امیرعباس:
دڑیفینو ننا ہیتاک مٙش تے
ننا کِڑد ءِ بلوچستان خوائک

غلام دستگیر سنگر:
اخہ کشمیر کشّن دلدلان نے
ننا تینا بلوچستان لُڑد ء ِ

عبدالسلام آشوب:
مرک ہرا وختا برے خُفتن مرے
کٙلمہ باٹی یار ئنا دیدن مرے