شھید سولان بلوچ پنام کمانڈر – سرباز وفا

86

شھید سولان بلوچ پنام کمانڈر ءِ بھادری ءَ سلام اِنت

نبشتہ کار: سرباز وفا

دی بلوچستان پوسٹ

اشک یک دردے،اشک یک مارشتے،اشک دیوانگی یے،اشک مردم ءَ را بے چاڑ کنت،اشک مردم ءَ را چہ زند ءِ کلیں تماھاں کش ایت۔
بس مردم ءَ را وتی دوست ءِ یاتانی تہ ءَ پادبند کنت۔ اگاں ما اشکی دیوانگانی ءِ نیمگ ءَ چماں شانک بدے اِیں تہ مارا بازیں اشکی گنوک گندگ ءَ کیت۔مجنوں پہ لیلا شیدا بوتگ،پنوں پہ سسی، فرھاد پہ شیرین،شَے مُرید پہ ھانی،اے ھما دیوانگ بوتگ اَنت کہ آھانی نام راج دپترانی تہ ءَ ھست اَنت۔اگاں اشک ءِ سر ءَ گپ کیت گڑا ایشانی نام الّم گرگ بیت ۔۔۔

بلے من یک ھنچیں اشکی دیوانگے ءِ نام ءَ گراں کہ آئی ءِ اشک مردمے ءِ نام ءَ نہ بوتگ بلکیں آئی ءِ اشک گون وتی ماتیں سرڈگار ءَ بوتگ.راجانی تہ ءَ وتن دیوانگیں بچانی کسہ جھان ءَ ھرکجا ھست اَنت۔آ دگہ راجان ابید بلوچ راج ءِ تہ ءَ اوں وتن دیوانگ باز بوتگ ءُ ھزاراں وتن دیوانگ پہ وتن ندر بوتگ اَنت ءُ ھزراں وتن دیوانگ پُرّ سلاہ اَنت ءُ گون دُژمن ءَ سرڈگار ءِ رکینگ ءَ جنگ کنگ ءَ اَنت۔پہ سرڈگار ءِ آجوئی ءَ لانک اِش بستگ ءُ سنگرانی باھوٹ اَنت۔ وتی وتن دوستی ءَ سرجمیں دگنیا ءَ را پیشدارگ ءَ اَنت۔چہ ھمے وتن دیوانگاں یکے شھید سولان بلوچ پنام ءِ کمانڈر اَت کہ پہ وتی وتن ءِ ھاتر ءَ وتی ساہ ءُ ھیشی سر ئِے بکشات ءُ ابدمان بوت۔

شھید سولان آواران پیراندر لوپ ءَ واجہ پیرمھمد ءِ گس ءَ ودی بیت۔واجہ پیرمھمد نادرس ءُ گریبیں مردمے ،آئی ءِ کار ءُ کسب مالداری اِنت۔چہ زند ءِ آدگہ وشیان گستا وتی گون کمو پس ءُ مالاں وتی زند ءَ گوازینگ ءَ اِنت۔آئی ءِ میتگ یک کوھے ءِ تہال ءَ اِنت۔آ میتگ ءِ نزیک ءُ گوراں وانگجاہ ءِ نام ءُ نشان نیست۔دَر ءُ دور وانگجاہ ھست بلے واجہ پیرمھمد وتی زھگان ءَ چہ نادرسی ءَ وانینت نہ کرتگ۔ شھید سولان ءَ سرکاری وانگجاھاں نہ ونتگ اَت.
شھید سولان 2016 ءَ بلوچ راجی گل بی ایل ایپ ءِ یک سپاھی یے بیت ءُ وتی راجی جھد ءَ دیم ءَ براں کنت۔من شھید سولان ءَ دیستگ اَت کہ سکیں سادگے اَت۔بلے اے ھبر راستے کہ سادگیں مردم دل ءَ نیک نیت ءُ ایماندار بنت۔

من ءَ سنگتے ءَ گشت کہ ما جاھے ءَ نندوک بوتگ اِیں دُژمن ءَ مارا انگیر کرتگ ءُ مئے سر ءَ چاریں نیمگ ءَ چہ تیر آھگ ءَ بوتگ اَنت۔ ھمے جنگی گرانیں ساھت ءَ مارا ھرکس ءَ را دگرے ءِ تُپنگ دست ءَ گپتگ۔ما جنگ دیاں بوتگ اِیں ۔من نزانتگ منی تُپنگ دگہ سنگتے ءِ دست ءَ کپتگ من ھمے سرپد بوتگ آں منی تُپنگ ھمود ءَ ایر اِنت۔شھید سولان گشتگ شریں تو جنگ ءَ بدار من روان تئی تُپنگ ءَ کاراں۔تیر چو ھورئیگ ءَ گوارگ ءَ بوتگ اَنت۔من گشتگ بِلّ منی تُپنگ ءَ من دست ھالیگ نیاں گُڑا شھید سولان گشت نہ جنگ زانگ نہ بیت۔دیر بداریت مارا پہ تُپنگ ءُ تیراں کار کپیت من روان کاران ئِے۔ ھمے تیرانی نیام ءَ تچان ءَ شُتگ جاہ ءِ چار اِتگ ءُ پد ءَ اھتگ وتی سنگر ئِے داشتگ ءُ من ءَ گشت ئِے تئی تُپنگ اود ءَ نہ اِنت سنگتے ءَ برتگ۔من ھیران بوتگ آں من آئی ءِ بھادری سلام کرتگ۔من دلجم بوتگ آں مارا اے وڑیں بھادریں سنگت گون اَنت مئے سنگت سلامت ءَ در کایاں ھمے وڑ ءَ مئے کلیں سنگتاں گون بھادری ءَ جنگ کرتگ۔کلیں سنگت پہ سلامتی دُژمن ءِ انگیر ءَ دراھتگ اَنت۔

شھید سولان سکیں دلیر ءُ بھادریں سنگتے بوتگ۔آئی ءَ گوں دُژمن ءَ جنگ یک لیب ءُ گوازی سرپد بوتگ۔دگہ سنگتے ءَ گپ جت کہ شھید سولان گومن جنگی سپرے ءَ گون بوتگ ما شُتگ اِیں پوج ءِ راہ بستگ گڑا پوج اھتگ،جنگ بندات بوتگ،پوج سرگنوگ بوتگ ءُ میدان ءَ تچگ ءَ بوتگ۔شھید سولان وتی سنگر ءِ تہ ءَ گون کوکار ءَ گشتگ ھرکس ءَ ھمے گشتگ کہ پاکستانی پوج آرمی پرنٹول ءُ ھنر زانت اے نامرد دست ھالی ءَ چو کچک ءِ وڑ ءَ تچگ ءَ انت۔گون ھکل ءُ کوکار ءَ گشتگ ئِے بوشت اڑے نامرد تئی سر گوں مرداں نہ کپتگ۔
وھدے من آئی ءِ ھمت ءُ دلیری دیستگ وتی سنگتان ءَ دلبڈی ءُ ھمت دیاں بوتگ داں ما چہ جنگ ءَ پارگ بوتگ ءُ در اھتگیں۔ من گون وتی دل ءَ ھمے ھبر مدام جیڑتگ کہ بلوچ راج بھادریں راجے بلے مردم ءِ بھادری چہ ڈیل ءُ بالاد ءَ زانگ نہ بیت شھید سولان پنام کمانڈر ءِ بھادری ءَ سلام اِنت۔

13 تاکشان (دسمبر ) 2017 ءَ شھید سولان جاہ ءِ آھو سوڈ ءَ کوھانی تہ ءَ گون سنگتاں نندوک بیت پاکستانی پوج انگیر کنت۔ شھید سولان ھمے گشیت سنگتاں شمارا کس ءَ کار نیست من بزاناں لگوریں پوج شما کل سنگت در آھاں کن اِت۔وتی سنگتاں کشان کن اِت۔داں کل سنگت در نیاتکگ اَنت من در نیاھاں شھید سولان ءُ شھید ھان جان پنام ھمل کوھے گِر اَنت ءُ جنگ دیان ءَ وتی کلیں سنگتانی دَرکنگ ءَ سوبیں بہ اَنت ءُ وت پہ وتن شھید بنت داں جھان ھست اِنت نمیران اَنت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔