اینو تینکن تینٹ – حیراف بلوچ

40

اینو تینکن تینٹ

نوشت: حیراف بلوچ

دی بلوچستان پوسٹ

دا وختا بلوچ قوم باز سخت آ دے تیان گدرینگنگ ئٹی ءِ. اسے کُنڈا بلوچ تینٹ تین پتین زنچکی ءِتو ایلو کُنڈا جہان بلوچ قوم نا جُہدے تینا خنتے ٹی اُننگ خوائینگ اَف. اگہ نن خوڑتی ٹی اُرین تو خننگک کہ اصل ئٹی دا ہڑتوماتا نیامٹی ہچو مُرّی ئس اَف انتیکہ کہ دا جہان مفاد و مطلب آتا زی آں یخین تِخک. جہان کِن مفاد نا سیالی، دین نا سیالی، رنگ ءُ نسل نا سیالی، پیہُن مَونی نا سیالی، بندغی نا سیالی داڑاسکان کہ سوچ ءُ فکر نا سیالی آن ہم بلُن ءِ.

انتیکہ اگہ دُن مفروس ئس تو امریکہ ہراکہ تینٹ دا مظلومی تیان گدرینگانے ہراکہ تینٹ ہم انگلستانی فِرنگی تا قوضہ گیریت نا خلاف تینا آجوئی کِن جہدے آزاتی کِن جنگ ءِ گچین کریر، اینو بلوچ قومی تحریک ءِ بلکن اگہ دُن پاؤ کہ بلوچ قوم ءِ ناشر کار (دہشت گرد) پاتویکا، انتیکہ بلوچ قومی تحریک بلوچ عوام نا کُوپہ تیا تخوکے.

داڑے اسے ہیت ئس باز الّمی ءِ دُنکہ سنگت بُرزکوہی تینا آرٹیکل ئٹی نوشتہ کرینے کہ دا ہمو امریکہ ءِ کہ پاکستان نا دوتیان طالبان پنی ءُ اسے بُت ئس جوڑ کرے اوفتے سویت یونین نا خلاف کُمک کرے پدا اوفتے ناشر کار پارے، اوفتا خلاف اٹ ۱۸ سال جنگ کرےو پدا ہم اوفتے تون اسے میز آ تولوک ءِ داڑن دا پاک و صاف چائنگک کہ طالبان اسے طاقت ئسے اندا خاطران جہان اوفتیان خنتیں ڈکنگ کَپک.

ہیت ئنا مقصد دا اَف کہ نن ہم طالبان یا جہان نا ایلو ناشرکار تیانبار تینا جہدے برجم تِخن بلکہ ہیت ئنا مقصد دادے کہ ننے اسے طاقت ئس مروئی ءِ و ہمو طاقت ءِ جہانی اصول آتا رِد ئٹ تینا قومی آجوئی نا دوٹی کننگ کِن استعمال کین.

دُن اینو ئسکان راجی کاروان تینا طاقت ءِ قوضہ گیر و اونا آواری ءُ کُمکار آتا خلاف برجاه تخنگانے. اینو ننے جہان نا کُمک کِن انتزاری ءُ راه چاری مروئی اف اینو ننے تین کن تینئٹ مروئی ءِ انتیکہ جہان ہموتم اسٹ ئسینا کُنڈا ایلُمی و سنگتی نا دو ءِ مُریفک ہموتم کہ او اوٹی تینا و تینا مفاد آتا حفاظت ءِ خنیک.

دُنکہ وخت ئنا اسے کسہ ئسے کہ اسے جاغہ اسیٹ مُسک دُون ئسر تو دُون تیٹ نیام ئنا دُون خُشک ئس و داپار ایپار نا دُون تیٹ دیر ئسکہ. تو دا پار نا دُون آن اسے پُڑیس دیر نا ایپار نا دُون کِن سِٹاکہ او ایپار آن اسے پُڑیس دا پار نا دُون کِن سِٹاکہ ولے نیام نا دُون دا اسٹ و ایلو نا دود آتیان دو خالی ئس.

ہمو وخت ئنا اسے پُو مَروک ءُ زانتکار و بندغ ئس پارے کے اندُنو دے برور کہ مخلوق اسے دُو آن ارف و ایلو دُو آن ایت والا حساب آتیا یخین تِخور نا کہ جُوانی و بندغی نا حساب ءَ.

اینو ننے خشک ءُ دُون ئس مروئی اَف اینو بائد ءِ نن تینے ٹی داخس دیر ودی کین کہ نن اسٹ ئسیان دا اُمید ءِ تخننگ کین کہ او ننا کم از کم توار جوڑ مرے.


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔