من ءُ جی جی، سرگوست – اکیل مراد

221

من ءُ جی جی، سرگوست

اکیل مراد

دی بلوچستان پوسٹ

زندگی براھدار بیت، چَوگان بیت، کندگ بیت درست اے وھد ءِ ھمراھی ءَ گوز اَنت درست ھمے وھد ءَ پیڑایان کن اَنت روان بنت

تنھا ھما یات پَش کَپ اَنت، تنھا ھما جیڑہ پَش کَپ اَنت ،تنہا ھما لوٹ گری پَش کَپ اَنت.

ساھو: جی جی رمزان ءَ ترا مروچی زور پِر داتگ ناں روچگی گُژن تُن درست رمزان ءِ ھمراہ اَنت ناں؟

جی جی : ساھو تئی ھیالاں من پروشتوگوں تو منی لُنٹانی تلاں گِندئے من ءَ تژن ءُ بچکندی کن ئے ھاھاھا؟

ساھو، ھاھاھاھا اناں جی جی من وَ زانگ ءَ اوں کہ تئی مھکمیں روچگی ترا دارگی اِنت، تئی گژن ءُ تن ترا کجا پروشت کن اَنت؟

جی جی ترا بہ گُش آں ھما روچی تو کسان اِت ئے تئی پکر ءُ چشیں ھیال نیست اَت تو یک بر ءَ روچگی ءِ کَچ ءَ رس اِت ئے.

جی جی ترا شال ءِ پریس کلب یات اِنت ترا کراچی ءِ شھید سرور دگ ءِ پریس کلب یات اِنت تو ھم روچی ھمے پریس کلب ءِ دیم ءَ اوشتاتگ اَت ئے،تو سک ءَ کسانیت اَئے، تو روچگی ءِ ھِچ ھیال ءَ تہ ءَ نہ اِت ئے.

من وَ زانت کہ تو روچگی ءَ دار ئے ھاھاھاھاھا ھَو ناں؟

جی جی: ساھو مروچی تئی نمبر اِنت تو من ءَ کوھنیں یاتاں گیجگ ءَ ئے مروچی تو منی ھما پیسرگیں چماں پچان اِیت تو بہ گُش.

بَلے وھدیکہ من تئی چمانی سوچگ ءَ لَگ آں، ناں تئی اَرس ھم ریچانک بنت ءُ تو گریوْان بئے ھاھاھاھاھا.

ساھو: جی جی من زان آں تو رمزان ءِ روچگی ھمے ھاتر ءَ داشتگ کہ بہ گندئے جَنتیانی ھوراں پریس کلب ءَ ھور نینداں اود ءَ ھمے وڑ ءَ مردمانی چماں بند کنائین ئے ھاھاھاھا.

جی جی: ساھو اسلیں گپ اے نہ اِنت روچگی ءَ جَنتیانی بنت بَلے راستگیں ھَبر ءَ ترا اگاں بہ گُش آں تو ھم روچگی ءَ یلہ کُرت نہ کن ئے ھاھاھا من وَ روچ ءَ روچگاں تو شپ ءُ روچ روچگی ءِ دُمب ءَ تچے ھاھاھاھا،

دادو ءَ جُست گِر کہ روچگی ءِ لِزّت چی اِنت ھاھاھاھا بَلے دادو منی ھیال ءَ تئی شیتانی کُنّتاں گِندیت ترا روچگی ءِ لِزّت ءَ گُشت نہ کنت ھاھاھاھا چُشیں کاسیں چیز منیگ ءُ دادو ءِ بھت ءَ کپتگ تو منی ھیالاں سک ءَ پَش کپتگ ئے ھاھاھاھا، ھاں نِی ھِچ گْوشگ ءَ نہ ئے منی دل جنگ ءَ اِنت تو ھمے لِزّت ءِ پِکر ءَ کنگ ءَ ئے کہ چی یے؟ ھاھاھاھا

من ترا پیسر ءَ ھمے ھبر کُرت کہ منی میان ءَ تو مہ یاں تو وَ مدام ھنچشیں شیتانی ءُ وشکندی کن ئے ناں مروچی من ءَ ھم وھد رَس اِت کہ تراوی ھَشت رَکات بیتاں ھاھاھاھا، دَپ نِی چی ءَ پَچیں ھاھاھاھاھا، بابا من ترا گُشت سیون شریپ ءَ ترا بَلُک ءَ نہ برتگ کہ دور ءَ ودی بیتگ ئے ھاھاھاھا تئی سرساھی لوگ ءَ بیتگ ناں اما ءُ مدام گُشتگ اے ساھو کسانی ءَ سکیں شیتانے بیتگ ھاھاھاھاھا.

من وَ ترا مزنی ءَ گِندگ ءَ اوں ھاھاھاھاھا تو مزن بیتگ ئے انگت ءَ ھما بے ریش ءُ بے بروتیں چُکانی پئیم ءَ کسان ئے ھاھاھاھاھا ھو ناں،

ساھو: جی جی ترا ھَبرے بہ گُش آں مروچی تو من ءَ ھنچیں دیر ءُ جھلانکیں کاروانے ءِ تہ ءَ دَور دات اود ءَ ھنچین تنھائی ءَ وت ءَ مانریتکگ اَت ھنچیں زندگی ءَ اَت کہ کس گون نہ اَت ناں تو ناں دادو کس نیست بس لھتیں درامد اِت اَنت.

منی سر ءَ زھر زھر ءَ چارگ ءَ اِت اَنت من ھمے جیڑگ ءَ اِت آں اے درامد اگاں مئے ھنکین ءَ دور بہ کن اَنت گڑا منی مجگ ءِ اولی پکر ترا ھوار میتگ ءِ سرجمیں چکانی سر ءَ بیتیں،

پرچا آیانی دیم ھنچش دیست آ زھر ورگ ءَ اِت اَنت تو ھما جیڑگانی تہ ءَ من ءَ پِرینت بَلے ھبر ءَ وئیل کن، نی بیا تو دادو ءَ وَ روچگی داشت ءُ گوں ھشت رَکاتی تروائیاں ھاھاھا بَلے باریں تو پمن چی کُرتگ، دادو ءَ چی کُرتگ،

جی جی: ساھو ما پرتو دُرست کرتگ تئی جِند ءِ تماھا زند ءِ دراھیں لوٹ اژدری اَنت، تئی واست ءَ تژن ءُ بچکند درست کرتگ بَلے تو گڈی ءَ وتی ھواری ءَ من ءَ ھم” سریس” کُرت ھَو ناں.

ساھو: اناں اڑے جی جی نِی تو زان ئے اَئید پیداک اِنت، من ھمے ھاتر ءَ رمزان ءِ بابت ءَ کمے وشکندی کُرت بَلے ترا جُستے گراں باریں مئے ھمساھِگ ماسی ھِسّیان ءِ چُک ھما وھد ءَ برگ بیتگ اَت باریں دگہ پَرے من بیھالاں جُست ھم نہ کُرتگ پد ءُ چی ھال ءُ اھوال ءِ ھست ناں؟

جی جی: ساھو ترا بہ گُش آں ماسی ھِسّیان چار روچ ءَ پیسر مئے لوگ ءَ اتکگ اَت من کمے آ لوگ ءِ دومی چارک ءَ نیشتگ اَت آں، من اِش کُنگ ءَ اَت آں ،امّا ءَ گْوشگ ءَ اَت کہ منی زھگ ءِ واست ءَ دوا بہ کن گوں من ءَ ھمے وھد ءَ سک ءَ کندگے ءَ گِپت کہ تو امّا ءَ گْوشگ ءَ ئے کہ منی واست ءَ دوا بہ کن

من زانتگ اَت کہ امّا ءِ کِر ءَ آل ریڈی پیسر ءَ A4 لیٹر ءِ سرجم ءَ ایر اِنت ھاھاھاھا

ساھو نِی تو زان ئے سھت چُنت ءَ سر اِنت دُرست واب اَنت دادو ھم واب اِنت آ دگہ ھم واب اَنت پد ءَ من ءَ ھم وپسگی اِنت،

ساھو: شر اِنت جی جی بَلے ھروھدے تو رمزان ءِ روچاں سرجم کن ئے ءُ ائید ءِ نوک ءَ گِند ئے الّم بچکندے پمن ءَ دیم دئے من ءَ چُنت سال اِنت کہ تئی بچکنداں چہ دوراں،


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔