زاکر جان ءَ دہ سال سرجم بوت – کوہ سر پرومی

281

زاکر جان ءَ دہ سال سرجم بوت

نبشتہ کار: کوہ سر پرومی

دی بلوچستان پوسٹ

یک درد ناکیں کسّھے کہ مئے چاگرد ءَ روچ پہ روچ چو چراگے ءَ بَلان اِنت چو روچ ءِ برانزاں زمین ءِ سر ءَ ایر کپان اِنت۔۔۔۔۔۔۔

کجام کسّہ۔۔۔؟
کئی کسّہ۔۔؟
اے کسّہ گوں یک مھروانیں ھمبلے ءَ بندوک اِنت کہ دہ سال انت کوھن بُوَگ ءِ نام ءَ نزانت روچ پہ روچ ھمک ءِ دلانی تہ ءَ نوک بوّان اِنت۔۔۔ ھما اِنت کہ من چم پچ کتگاں اے کسّہ یک ماتے ءِ کوپگان انت گوں ارسیگیں چماں ءُ دردیگیں دل ءَ یک اکسے دل ءِ سر ءَ ایر کُتگ ئِے ءُ چہ دگنیا ءِ گَماں بے ھیال انت ھمک روچ چو ھَور ءَ ارس گوارگ ءَ اِنت، بلے چہ وتی مھرانی چراگ ءَ بے ھیال نہ بیت بلے اے ارساں کے گِندیت ءُ اے دردیگیں دل ءِ ٹپاں کے مار اِیت کہ مُدام گوں اے کھریں روچانی برانزاں دُچار انت۔۔۔۔۔۔ ؟

اے سارتیں شپانی پاس ءَ وداریگیں پہ وتی تنگھیں بچ ءَ اے لِواریں روچانی گوات کہ کشیت مات ءِ دیم ءَ گڑا مات ءِ دل دو کپ بیت پہ وتی لاڈیں چک ءَ ۔۔۔۔۔۔۔۔۔۔
بلے اے چاگرد ءَ چُشیں انسان ءِ ودی نہ بوتگ کہ مکھیں مات ءِ توار ءَ وتی بہ پہم اِیت اِد ءَ ھرکس وت زندگ بوَگ لوٹیت پہ دومی ءَ کس زندگ نہ انت دہ 10 سال گوست اے مکھیں مات ءِ چمانی ارس کم نہ بوت اَنت ءُ دل ءِ ھما آزگیں ٹپ ھُشک بوَگ ءِ نام ءَ نزان انت ھما مات ءَ جست بکنت اے درد ءَ مارگ اِنت۔۔۔۔۔۔۔

10 سال پہ گُشگ ءَ کم انت بلے مرچی ھما مکھیں مات ءَ چہ پُرس کہ اے دھیں سال پہ کُجام بزگ ءُ ازابی ءَ گوستگ انت ھما مات ءِ دپ ءِ پلیں ھبر ھمش اِنت اے رنجانی کھریں روچاں کدی کُٹین ئے، اے دردناکیں کسہ زاکر مجید ءِ کسّہ انت کہ 10 سال سرجم بوت انگت بیگواہ انت۔۔۔۔۔۔ منی نیمگءَ چُشیں لبز نیست کہ زاکر جان ءِ ستا ءُ توسیپ ءَ بکناں۔۔۔۔۔۔۔۔۔۔۔ بلے من ءَ ھمے لبزاں مجبور کتگ کہ چیزے نبشتہ بکناں۔۔۔ زاکر جان ءِ مات ءَ 10 سال پہ ارسیگیں چم گوازینت بلے زاکر انگت واتر نہ بوت۔۔۔۔۔۔۔۔۔۔ مئے دل چی ءَ چو سِنگ جوڑبوتگ اَنت۔۔۔؟
مئے چاگرد ءِ تہ ءَ انسان دوستیں گَلّاں وتی جنازہ کدی ونتگ۔۔۔۔۔۔۔۔؟

زاکر جان ءِ مات ءَ را 10 سال انت کہ ھمے جُستانی پسّواں لوٹیت۔۔ اد ءَ من چُشیں مردم ءُ انسان دوستیں گل نہ گِنداں کہ اے جُستانی پسّواں بِدے اَنت۔۔۔۔۔۔۔۔۔۔

بلوچ راج ءِ تہ ءَ یکیں مات نہ اِنت کہ وداریگیں پہ زاکر جان ءَ بلوچ راج ءِ تہ ءَ ھمک مات ءِ بچ زاکر جان ءِ رنگ ءَ واتر بوَگ ءِ نام ءَ نزان انت۔۔۔۔۔۔۔۔
اے کھریں روچ الّم کُٹ اَنت.
زاکر جان ترا دہ سال سرجم بوت بَلے تو انگت نیاتک ئے……۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔