ڈیھہ ءَ واتر کنگی اِنت – حکیم واڈیلہ

224

ڈیھہ ءَ واتر کنگی اِنت

حکیم واڈیلہ

دی بلوچستان پوسٹ

منا ھپت سال ءَ بُرز اِنت کہ من درانڈیھہ آں۔ اے ھپتیں سالانی تہا من ھچبر نہ جیڑیتگ من پرچہ وتی نزوریانی تہا شری آورت کنگ ءَ نیاں من پرچہ ھمک روچی ھساب ءَ چہ وتی مردماں گسر کپاناں۔ پرچہ منی مردمانی اوست و باور چہ من سدان اِنت پرچہ من آیانی جستانی پسو ءَ دات کنگءَ نہ یاں پرچہ من گپ گپءَ برانز گراں پرچہ من مردماں مدام ھمے گپءَ پہ شگان گُشاں کہ من درملکءَ پہ راج ءَ جہد کنگءَ آں۔ پرچہ من مردمانی گپانی سرپد بیگءِ جاہ ءَ وتءَ راست پیش دارگ ئے جہد کناں۔

وھدے من اے گپانی جیڑگ ءَ لگیتاں تاں دیست کہ من گسر کپتگاں منی درملکءَ آیگ ئے مستریں سوب کہ من گُشتگ بیتگ پہ راج ءَ جہد کنگ اِنت نوں آئی ءِ جاگہ دگہ شئے آں گپتگ چُش کہ درملکءَ زند گوازینگ وتی زند ءِ بروبر کنگ پہ وتا شریں کار ئے شوہازگ اگں کاروبار کنگ ءُ لوگ و جاگہ شر کنگ درملکی پاسپورٹ گرگ ءُ پدا یک آسودگ ئے زند ءِ گوازینگ اگں اے دراھیں کاراں چہ پد اگں کمو وھد رست گُڑا پہ جہد ءُ قوم ءَ ندر کنگ ءُ ھمے پیش دارگ کہ من سک باز کار کنگ ءَ اَنت ۔ بلے اے دراھیں وھد ءَ من یک چیز ئے پہک بیحال کُتگ کہ منا واتر کنگی اِنت منا پدا روگی اِنت منا وتی زمین ءِ سرا وتی مردمانی نیام ءَ بوگی اِنت آیانی درد مارگی اِنت آیانی جُست پسو کنگی اَنت پہ آیاں چہ درملکءَ یک شریں مستاگ ئے برگی اِنت گُڑا چون من چہ وتا چہ وتی کِشک ءَ چہ وتی راج ءَ ءُ چہ وتی زمینءَ پراموش بیت اَنت ۔ ایشی ئے مستریں سوب چہ من پیش درملکءَ اتکگیں منی دابیں سیاسی مردم اَنت وھدے درملکءَ سر بیتگ اَنت آیاں پدا وتی واتری راہ وت بند کُتگ ءُ ھمے گمان کُتگ کہ نوں مرگ ءُ زند بس ھمدا بیت ۔

منی ھیال ءَ مئے درملکی کارانی بے سوبی ئے یک مستریں سوب ئے ھمے ھیال اِنت کہ ما وتی زہنءَ جاہ داتگ کہ نوں واتر کنگ نہ بیت یا بیت کنت مئے زند ءَ ھما وھد مئیت کہ ما وتی ملک ءَ آجوہ کُت بہ کنیں ءُ ھمے جیڑگ ءَ مارا سیاسی ھساب ءَ نزور ترینتگ ءُ مئے پگرانی تہا جُنز ءَ چہ پیسر وتی زند وتی وشی وتی کہول ءُ وتی باندات ءِ وشی ءُ آباد کنگ ءِ ھیال ءَ جاہ کُتگ ۔ اگں مئے زہنانی تہا اے گپ بہ بیت کہ ما ستر درملکی دراھیں آسائش ءُ وشیانی تہا بہ بئیں پدا ھم اے درآمدیں دیار اے درآمدیں مردم کدی مئے نہ بنت کدی ایشانی ھیال ءُ مئے ھیال یک نہ بنت کدی ایشانی زند ءُ مئے زند یک نہ بیت گُڑا الم ما پدا وتی زمین ءُ وتی مردمانی نیمگءَ دلگوش کنیں آیانی جیڑہانی سرپد بیگ ءَ بندات کنیں آیانی پگری ھمرائی ءَ گوں وتی توار ءَ بُرز بریں دانکہ جوانیں رنگی ءَ دیمروی بہ کنیں ءُ پدا وتی ڈیھہ ءَ وتی مکہیں دیار ءَ وتی وابانی ھنکین ماتیں وتن ءَ واتر کُت بہ کنیں۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔