چم دیستگیں گنوک ۔ الیاس بلوچ 

44

آزمانک

چم دیستگیں گنوک

الیاس بلوچ 

دی بلوچستان پوسٹ

ھیات آباد میتگ ءَ یک گنوکے بیت آئی نام میران بیت ۔میران گندگ ءَ یک بزگ ءُ بیوسیں مردمے بیت ۔میران ءِ دو بان وڑیں کوٹی بہْ انت، چہ لھتیں پس ءَ ابید میران ءَ دگہ ھچی نہ بیت ۔ میران ءَ بازیں مردم گنوک پھم اِت، لھتے زندگییں پیر، ءُ لھتے ءَ ولی اللہ پمیشکا ھرکس ءَ وتی زکات ءُ ھیراتاں میران ءَ دات اَنت ۔ بلے میران وتی زندگی ءِ تہ ءَ باز وش ءُ آسودگ اَت ۔میران ءَ یک آدتے ھست ات کہ میران ماہ ءِ تہ ءَ پنچ ءُ شش روچ الم گندگ نہ بوت ۔گڑا میتگ والا میران ءَ پہ شری ءَ یات اِش کت، بازین مردمانی ھمے گمان اَت ”کہ میران یک زندگیں پیر ءُ ولی یے بیت کنت کہ آ کوہ ءُ دشتاں چلگ کش اِیت ۔ بازینے ھیال ات کہ پہ ابادت ءِ ھاتر ءَ چہ آبادی ءَ دور جنگل ءَ پہ ابادت ءَ روت بلے کسے دماگ کار ءَ نہ اَت۔ مئے بلوچ ربیدگ ءِ تہ ءَ سید ملا ءُ چوشیں نیم ملاھاں ءُ گنوکاں مزنیں کدر ءِ دے اَنت بلے اللہ کسے ءَ را ندگ بہ کنت آ تاں دیر چیر نہ بیت یک روچے میران ءِ ھمساھگے باز نادراہ بیت آئی ءَ شھر ءِ مزنیں نادراھجاہ ءَ بر انت یک روچے میران ھمے نادراہ ءِ برات ھسن ءَ بازار ءَ گند ایت ءُ آئی ءَ گوں وت ءَ موٹلے ءَ سوار کنت ھسن میران ءِ پروٹوکولیں گاڑی ءَ گند اِیت ءُ ھبکہ بیت میران شار ءِ تہ ءَ گوں دگہ گاڑی یے ءَ ڈیکّ وارت چہ اے ویل ءِ سوب ءَ یکے بیران بیت۔ رند ءَ پولیس کیت میران ءُ ھسن ءَ بندیگ جاہ ءَ بارت بلے چہ ایپ آئی آر ءَ پیسر میران وتی کارڈ ءَ پیش دار ایت ءُ میران ءُ ھسن یل دیگ بنت گڑا میران ھسن ءَ یک ہوٹلے ءَ پہ نان ءِ ورگ ءَ بارت ۔

گڑا میران ھسن ءَ سرپد کنت کہ ھسن اگاں تو لوٹ ئے کہ چمن گریبی دور بہ بیت گڑا بیا گوں من ءَ کار بہ کن تئی گریبی ھم دور بیت ترا ماڑی ءُ بنگلہ شریں گاڑی ھم دیگ بیت ھسن ھبکہ بیت کاررررررر ۔۔۔۔ چونیں کاررررر من من من من ، چوشیں کار کت نہ کن آں ، میران ھسن ءَ تسلا دنت گوش ایت ئِے پریشان مبو اے ارزانیں کارے ءُ کسانیں کارے بس ترا اے چارگی انت کہ تئی میتگ ءِ ھر مردم ءِ کہ زھر شانی یا کہ مشکوکیں جلسھاں ھوار بہ انت تو تھنا ھمایانی ناماں ءُ پت ءِ ناماں پمن ءَ سر بہ کن بس تئی کار ھمیش انت من ترا گوں یک کرنلے ءَ سنگت کن آں تئی اے شدیگیں زند ھم زیت بدل بیت ءُ تو یک وشیں زندے گوازینت کن ئے ۔مزنیں دولت ءِ ترا دست کپ اِیت ۔

ھسن: دولت چونیں دولت ؟
میران وتی بروتاں تاب دنت ءُ سیگار ءَ دم ءِ جنت
دولت بابا دولت ، زر مال ءُ مڈی، گڑا ھسن پسو دنت شر انت من تیار آں گڑا میران یک گپڑے زر کش ایت ءُ ھسن ءِ دست ءَ دنت ءُ ھسن ءَ رھادگ کنت ءُ گوش ایت ھسن اے ھالاں کس ءَ سھیگ نہ کن ئِے اگاں کس ءَ سھیگ کت ئے گڑا تئی ھم ھیر نیست ھسن ءِ لنٹ سبز بنت اناں میران من من من من ، تو پریشان مبو ،من کس ءَ سھیگ نہ کن آں ۔میران یک کندگے جنت ءُ سک وش بیت ۔ وھدے کہ ھسن وتی میتگ ءَ کئیت میران ءِ ھالاں شنگ کنت گڑا نی مھلوک گار ءُ پریات کنت کہ میران پہ گنوکی ءِ دروشم ءَ چنکس ورنایانی بلھاں زرتگ ، چنکس ورنا بندیگ ئِے کتگ، چنکس ورنایانی مکبری ئے کتگ ءُ چُشیں دگہ چنکس میران اَنگت مئے میتگ ءَ ھست۔


دی بلوچستان پوسٹ: اس مضمون میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔