شہید مجاھد بلوچ – وفا بلوچ

97

شھید مجاھد جان

نبشتہ کار :وفا بلوچ

دی بلوچستان پوسٹ

منی کہ چمّانی دیم پہ دیم ءَ رُدوم ئِے زرتگ
کسان سالین ءُ نوک ورنا کُج اِنت مجاھد

منارا کایاں مدام تْرانگ کہ لیب ءُ گوازی
ھما کہ باگانی نند ءُ نیاد جاہ کُج اِنت مجاھد

شھید مجاھد جان جاہ ءِ آھو ڈولیجی واجہ مراد ءِ گس ءَ 1995-6 ءَ ودی بوتگ ۔ چہ ڈولیجی ءَ وانگجاہ نہ بُوَگ ءِ سَوَب ءَ جاہ ءِ آھو گجرو ءَ روت ءُ وتی وانگ ءَ بُنگیج کنت ۔ داں پنچ تبک ءَ وھدے چہ گجرو ءَ پارگ بیت، جاہ ءِ آھو کوہڑو ءَ پنچ تبک ءَ بگر داں ھَشت ءَ کوہڑو ءَ ونتگ ئِے۔ ھمے وڑ ءَ چہ تنگدستی ءُ نزوریانی ایردستی ءَ دیم ءَ ونت ئِے نہ کُرت ۔

شھید مجاھد جان منی ھما سنگت بوتگ کہ چہ کسانی ءَ منی چمانی دیم ءَ رُستگ ءُ مزن بوتگ۔ من چہ مجاھد جان ءَ کسانی اِنّا ، من ءَ یات اِنت باز کسان اَت ۔ شھید مجاھد جان ڈولیجی ءَ وتی جند ءِ باگ ءَ اتک گُڑا آئی ءَ ھر وھد ءَ گوں وش تواری ءَ شَیر جت ۔ گوں شَیر جنگ ءِ ھمے ھُبّ ءُ واھگ ءَ آئی ءِ دوستیں گُشندہ نورھان بزنجو اَت ۔ نورھان بزنجو ءِ کُجام ریل کہ اتک مجاھد جان ءَ آئی ءِ شَیر سرجم ءَ یات اِنت ۔ ھر وھد ءَ کہ آئی ءِ شیرکنیں توار منی گوشاں کپت بزاں کہ من ھمود ءَ سر بوت آں ، گُڑا من گوں آئی ءَ نشت گپ ءُ تران کرت ءُ آئی ءِ شَیر گوش داشت اَنت ۔

وھدے کہ سن 2000 بوت مجاھد جان گجرو ءَ شُت پہ وانگ ءَ ، چہ وانگجاہ ءَ موکل ئِے رست، گُڑا پد ءَ من ءُ مجاھد جان ھوار اِت اِیں ۔ وھدے چہ گجرو ءَ وانگ ءَ پارگ بوت ءُ دیم پہ کوہڑو ءَ وانگ ءَ اتک ، بلے کم کم ءَ ندگ بُوھان اَت ۔2006-7 ءِ گپ اِنت، بلے ھمے وھداں بلوچ راجی جنُز کم کم ءَ آیان اَت ءُ مھلوک ءِ تہ ءَ نوکی سر پدی آیگ ءَ اَت ۔ ھمے وھد ءَ شھید کوہڑو ءَ وانگ ءَ اَت کہ بلوچ وانندگ گل بی ایس او آزاد ءِ باسکے جوڑ بیت ۔

مجاھد جان سکیں زمہ وار ءَ راز داریں سنگتے اَت۔ وت ءَ ھما داب ءَ داشتگ اِت ئِے کہ کس سرپد نہ بوت اے بی ایس او آزاد ءِ سنگتے۔ داں دیر ءَ کس ءَ نزانت ، 2009 اَت کہ وتی ھند بزاں ڈولیجی ءَ آئی آروس بوت۔ من شُت آں مجاھد جان ھمود ءَ اَت، گُڑا اے وھد ءَ کمیں مزن بوتگ اَت ۔ من وھدے مجاھد جان دیست سک گل بوت آں ءُ گُشت ھاں مجاھد جان ! تو ھالاں بِہ دے گارے بے بلاھے، گِندگ نہ بَہ ئے ۔ گُڑا کندگ ءَ لگت ءُ گُشت ئِے من وانگ ءَ آں ،گوں وتی وانگجاہ ءِ کاراں دزگٹّ آں، ھمے ھاتر ءَ آیگ نہ بیت۔ ھمے کندگ ءُ شُگُلاں پد ما نشت ءُ ھم دیوان بوت اِیں ۔ ھمے مْیانجی ءَ لھتیں وھد ءَ چہ پد دیست ،گُڑا ما سنگت باز اِت اِیں، داں شپ ءِ دُہ ءُ یازدہ ءَ مشکول بوت اِیں۔شپ کہ وتی گاماں دیم ءَ شھار دیان اَت تہ مجاھد جان گُشت سنگتاں من ءَ انوں موکل بِہ دے اِت باندا پد ءَ کِسمت ھوار بَہ اِیں ۔ چہ مجاھد جان ءِ موکل ءَ پد ما کل سنگت موکل کنان بوت اِیں ءُ ھر کس دیم پہ وتی گِس ءَ۔۔۔۔۔۔۔
دومی روچ بوت من پاد اتک آں،داں دراھیں کوھانی سر ءَ بیرک جَنوک اِنت، ھمے وڑ ءَ سُھب ءِ سر ءَ ھرکس پاد اَتک، داں ھیران بوت اَنت اے بیرک کَے ءَ جتگ اَنت۔ گُڑا ما آروس ءِ جاہ ءَ شُت اِیں، مجاھد جان اتک ۔ ھرکس وت ماں وت ھمے گپ ءَ اَت اے چونیں بیرک اَنت ، ایشاناں ، دوشی کَے ءَجتگ اَنت ؟
ھیر من کمیں گُمان کُت ،بلے کس زانگ ءَ نہ اَت ۔ شھید مجاھد جان ءَ کندت ءُ گُشت اے بی ایس او آزاد ءِ سنگتے بیت ،چیاکہ اے ھرچی بیرک گِندگ بُوَگ ءَ اَنت سے کُل بی ایس او آزاد ءِ بیرک اَنت ۔ اے بیرک مارا ھچ نہ کن اَنت ، راجی جنگے بُوَگ ءَ اِنت، الّم ایشاناں راجی جھدکارے ءَ جتگ ۔ ایشاں کس دست مہ جنت،چیاکہ اے بی ایس او آزاد ءِ سنگت وتی برات ءُ راجی پُسّگ اَنت ، چہ مجاھد ءِ اے گپّاں پد ھرکس وتی جاہ ءَ ھاموش بوت ۔

ھمے داب ءَ وھد گْوزان اَت ءُ ھرکس سرپد بُوَان اَت کہ اے پہ مئے آکبت ءَ جُھد ءُ کُوشست کنگ ءَ اَنت ۔

من وھدے کہ بلوچ نیشنل موومنٹ ءِ باسکے جوڑ بوت آں، گُڑا ھمے سرپد بوت آں کہ مجاھد جان بی ایس او آزاد ءِ سنگتے ۔

2013 ءَ شھید مجاھد جان چہ بی ایس او آزاد ءَ پارگ بوت بی این ایم ءِ باسکے بوت ۔ کمیں وھد ءَ چہ پد مجاھد جان جاہ ءِ آہو کوہڑو ھنکیں ءِ کمک کار گشاد بوت ءُ وتی ھرکار ءَ گوں شرّیں وڑ ءُ زمہ واری ءَ کنگ ءَ اَت ۔ ھمے وڑ ءَ مدام گوں وتی پارٹی ءِ کاراں دست گٹّ اَت۔

وھدے تاکشان ( دسمبر ) 2015 ءَ پاکستان ءَ پوج جاہ ءِ آہو زیلگ ءَ ءُ ڈولیجی اتک ءُ چوکی ءِ جت ءُ سرجمیں دمگ ءَ گولگ ءَ اَت ، بلے اے وھداں سیاسی کارانی ھاتر ءَ گیش گردگ نہ بوت ۔ اے درگت ءَ مجاھد جان ھمے گُشت اے جاور ما وت آورتگ اَنت ، گوں اے نگیگیں جاورانی دیم ءَ مارا اوشتگ لوٹ اِیت۔ بلکیں چہ پوج ءِ ترس ءُ بیمّ ءَ مارا وتی پارٹی ءِ کار یلہ کنگی نہ اَنت ۔مارا ھر وڑ ءَ وتی پارٹی ءِ کار کنگی اَنت ءُ وتی شھیدانی کاروان دیم ءَ برگ لوٹ اِیت ۔

2016 ءَ مجاھد جان وتی پارٹی ءِ کاراں شریں رنگے ءَ دیم ءَ برگ ءَ اَت ، گوں لھتیں سنگتاں در کپت دیم پہ جاہ ءِ آہو جھلی نیمگ ءَ کہ ما رو اِیں وتی پارٹی ءُ راجی جُنز ءِ کاراں کن اِیں۔

شھید مجاھد جان گوں وتی سنگتاں در کپت وتی سپر ءَ شُت وادی ءَ سر بوت ءُ وتی پارٹی ءِ کاراں کنان اَت کہ لگوریں دُژمن سرپد بوت اِد ءَ لھتیں پارٹی ءِ سنگت اتک ءَ پارٹی ءِ کارانی کنگ ءَ اَنت ۔

10 سوچکان 2016 ءِ دیگر ءُ روزردگ ءِ وھد ءَ مجاھد جان دُکان ءَ روت پہ چیزے زورگ ءَ پوج گوں لھتیں گاڑی ءَ کیت۔ تھار مگرب ءِ وھد بیت پوج ءِ گاڑیانی لائٹ بند بنت، گاڑی میزان میزان نزیک ءَ آیان بنتَ ۔ وھدے مجاھد جان گند اِیت ھمیش اِنت کہپوج سر بوتگ ءُ من ءَ انگیر کُرتگ، گُڑا مجاھد جان جھد کنت من چہ پوج ءِ انگیر دربیاں، بَلے پوج ھاس پہ مجاھد جان ءِ واست ءَ اتک ءَ چوں مجاھد جان ءَ یلہ کنت کہ آ منی دیم ءَ چو کوہ ءَ بوشت اِیت، گُڑا پوچ وتی تپنگانی دیم ءَ پہ مجاھد جان ءَ کن اَنت ءُ تیر مجاھد جان ءِ دلبند ءَ سُمب اَنت ءُ مجاھد جان پہ وتن سالونک بیت ءُ وتی ماتیں دیار ءِ ھک ءَ ادا ئِے کنت ءُ شھید بیت. داں جھان ھست مجاھد جان نمیران اِنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔