تامل ٹائیگرانی عروج و زوال ءِ داستان – پیردان بلوچ – ریاض بلوچ

109

ہونیگیں زِروان

تامل ٹائیگرانی عروج و زوال ءِ داستان

نبشتہ کار – پیردان بلوچ

رجانک – ریاض بلوچ

دی بلوچستان پوسٹ

اے جنگ وتی تہلیں آسرءَ سر بوتگ، ما وتی توپَکانی ھاموشی ءِ سَوْڑگ کتگ ” ھپتدہ مئی 2009 ءِ روچ ءَ اے لبز دگنیا ءِ مُھکم ترین جنگولیں گَلاں چہ یک گَلے ”ایل ٹی ٹی ای” ءِ ڈنی کارانی رہشون پھتا ناتھن ئیگ اتنت، اے آئی جنگی شکست ءِ جار ات۔

سنہالی گیش آبادیں ھند و دمَگاں آ روچی شاتکامی ات و زِرباری تامل گیش آبادیں علاقہانی مھلوک، مات ءُ پت ءِ بؤگا دَر ابید ہم سیوگ ءُ چورہ بوتگ اتنت۔ سنہالیاں ، ”ایل ٹی ٹی ای” ءِ رہشون پربھاکرن ءِ جون ءَ دَگانی سرا کشّاں کتگ ات۔

1974 ءِ جوڑ بوتگیں ”ایل ٹی ٹی ای” ءَ سے دَہکّانی تہا جنگ داتگیں ھونی جنگ ءِ توکا بازیں سوبمندی ءِ ہم رستگ ات، کجا اوں لوٹت ءِ وتی چھاپہ جنوکیں کاراں گوں سر بوت انت، سری لنکن صدر ءَ ابید ہندوستان ءِ سر وزیر ہم آہانی واستہ ارزانیں نشانگ اتنت۔ چریشاں سری لنکا ءِ صدر رانا سنگھے پریما دھاسا، وزیر دفاع رنجن انتے ءُ ہندوستان ءِ سر وزیر راجیو گاندھی ہم فدائی اُرشاں جنَگ بوتنت. یک اندازہے ءِ رد ءَ اے جنگ ءَ ھپتاد ہزار مردم چہ وتی زنداں زبہر کت۔

اے ہما وھد و پاس اتنت کہ “ایل ٹی ٹی ای” ءِ گورا یک مُھکمیں زِری ، آزمانی و زمینی فوجے است ات۔ وت کُشیں فدائی ارُشانی ھساب ءَ چھاپہ جنوکیں مُھکم تریں ءُ سوھویں گَل زانگ بوت۔ فدائی اُرشانی واستہ بالی گُراب اش اوں کارمرز کت انت۔ یک زمانگے ہندوستان ءَ اے گَل مالی ءُ جنگی کمک کت۔ بازیں وھداں اگاں تامل باغیانی گوں سری لنکن سرکار ءَ مزاکرات یا سُہل ءُ تْرانے ہم بوتگ، گڑا ہندوستان اودا سیمی شریک ءِ ھساب ءَ ساڑی بوتگ۔

نبشتہ کار ءُ میاں اُستمانی ھالانی ادارہ سی این این ءَ گوں بندوکیں ھالکار انیتا پرتاب وتی کتاب Island of Blood ءِ توکا نبشتہ کنت کہ پربھاکرن یک طلسماتی و ابَکہ کنوکیں دور اندیشیں شخصیتےءِ ھُدابند بوتگ۔ انیتا پرتاب نویسیت کہ یک گُلگدارے ءِ وھداں منا پربھاکرن ءَ گُشتگ ہما کہ مرچی مارا ہرچ رنگیں مدت و کمک کنگاینت باندا روچ مئے گوں ہمایاں ہم جنگ بیت، ادا پربھاکرن ءِ اشارہ ہندوستان ءِ نیمگا بوتگ ءُ پدا آئیءِ اے گُمان راست بوت۔ پدا سری لنکا ءُ ہندوستان ءِ سرکار ءِ میان ءَ سوبمندیں گپ و ھبر بوتنت، گڑا ہندوستان ءَ پربھاکرن ءَ را جنگ بندی ءِ سَلاہ دات، راجیو گاندھی ءَ گوں دہلی ءَ گند و نندے ءَ آ رازی بوت، بلے وتی وطن ءَ واتر بُؤگا گوں چرے مزاکرات ءَ انکاری بوت، بلے سری لنکا ءِ ہما وھد ءِ صدر ءَ تامل ٹائیگرانی ھلاپ ءَ یک آسری راہے ءِ سازگ ءِ سرجمیں پیسلہے کتگ ات۔

دومی نیمگا چھاپہ جنوکیں کارروائیانی واستہ “ایل ٹی ٹی ای” ءِ گورا بنکی ھالت ، دَراؤرتگیں جنگول، ہندی مھلوک ءِ پلہ مرزی ءُ چہ دژمن ءَ گہتر یں توجیل وَ است ات، بلے آہانی شکست ءِ سبب ہما زِروان بوت کہ اودا آ بندیگ بوت انت۔

اشی ءَ چہ پیسر ناروے ءِ نیمگا دو ہزار دو ءَ چہ بگر تا دو ہزار ھشت ءَ وھد پہ وھد مزاکرات بوتگ انت، بلے جنوری دو ہزار ھشت ءَ اے پنچ سال ءِ روانیں مزاکرات بید آسرے ءَ آسر بوت و ہمے وھداں “ایل ٹی ٹی ای” ءِ دو مزنیں کمان دار کرونا ءُ پربھاکرن ءِ میان ءَ جنگی توجیل و رہبندانی سرا اختلاف بِنا بوتنت، چریشی ءِ سبب ءَ گَل ءِ توکا بہر و بانگ ءِ ھبر شنگ و تالان بوتنت تا رسانکدراں سر بوتنت، “ایل ٹی ٹی ای” ءِ وڑیں مُھکمیں رہبند داروک ءُ رازداری ءَ وتی گَل ءِ رھبند ءِ اولی پدَگ منوکیں گَل ءِ واستہ اے ھبکہی گپ اتنت۔

دومی نیمگا سری لنکا ءِ سرکار وتی عہد ءِ مستریں ھونی جنگ ءَ روگا ات، رسانک ءِ سرا بندش جنئَگ بوتگ ات، تامل ٹائیگرانی دست ءَ جنَئگ بوتگیں فوجیانی ھال ھچ وڑا تاں مھلوک ءَ سر کنگی نہ ات۔

اودا تہہ و توکاں سری لنکا ءَ پہ وت دوست ءُ دوزواہ جوڑ کنگا، وتی سفارتی کار تیز کتگ تنت۔ تامل ٹائیگر ءَ مستریں مالی کمک ڈنی ملکاں نندوکیں تاملانی نیمگا رَسگا ات، امریکہ ءَ وتی ملک ءَ ہما تامل کہ جنگ ءَ کمک کنگا اِتنت، آہانی سرا گوں اُورت چاری ءَ نگاہ ایر کتگ ات، ھیرانی ءِ گپ ایش ات کہ “ایل ٹی ٹی ای” ءَ را درستاں پیش برطانیہ ءَ ناشرکار گَلے نامینت ءُ سری لنکن سرکار ءِ کِرّا دوازدہ ملین پاؤنڈ ءِ سلاہ بہا کُت، سری لنکن سرکار ءِ گُشگ پد ءَ یوروپی یونین ءِ سرا ہم زور دیَگ بنا بوت کہ آ ہم “ایل ٹی ٹی ای” ءَ یک ناشرکاریں گَلے بہ نامینیت، ہمے وھداں امریکہ ءَ ہم سری لنکن سرکار ءَ ھپت ملین ڈالر ءِ مالی کمک کت، اودا چین ءَ جے ایف جیٹ جنگی گُراب پہ سری لنکا ءَ مفت سوگات کت، چہ اسرائیل، چین ءُ ہندوستان ءَ سری لنکا ءَ مزنیں جنگی ساز و سامانے پہ کمک دست گپت۔

“َایل ٹی ٹی ای” ءِ ھلاپ ءَ نوں پیسلہ کُنیں جنگے بندات بوتگ ات، زمینی، آزمانی، ءُ دریائی ڈَل تامل ٹائیگرانی نیمگا پیش کنزاِتگ اتنت، تامل یکیں زِروان ءَ گُوریچان ءُ زِربار ءِ ءِ نیمگا شنگ بوتگ اتنت، مزنیں شہرانی توکا کارروائی نوں نہ بوگ ءِ کچ ءَ اِتنت، سری لنکناں تاملانی ھلاپ ءَ بازیں جنگی سنگر یکیں وھد ءَ پچ کتگ ات، جنگ ءِ بِنداتی وھداں “ایل ٹی ٹی ای” ءِ تمردیں کمان دار جنَئگ بوت انت، سنہالی علاقہاں تامل نہ بؤگ ءِ برابر ءَ اتنت، بندیگی ءَ چہ رکّگ ءِ ہاترا تاملانی بازیں کماندار پہ وتکُشی کنَگا لاچار بوتنت۔ سری لنکن فوج ءَ یک سازاِتگیں پندلے ءِ رد ءَ تاملان ءَ چہ زِربارءَ گُوریچان ءِ نیمگا مُچ کنگ ءِ جُہد ءَ ات تا کہ درستاں یک کسانیں جاہے ءَ مُچ بکنت ءُ بہ جنت۔

جنگ دیانءَ تامل یک کسانیں آتْراپے ءَ مُچ بوان بوتنت۔ چہ سجہیناں پیش “ایل ٹی ٹی ای” ءِ انٹیلیجنس ءِ کارمستر پوتو امان ءُ بحری کارمستر سوسائی وتارا تیر جننت و وتکُشی کننت، بلے رسانکدر ءِ نہ بوگ ءُ بندش ءِ سبب ءَ سری لنکن سرکار یک نیمگی ءُ وتی نپ ءِ ھالاں بس شنگ کنت ءُ دیما کاریت، آہانی رد ءَ “لبریشن ٹائیگر آف تامل ایلام” ءِ قیادت سری لنکا ءِ فوجی اُرشاں جنئَگ بوتگ ات و پربھاکرن ءَ آ ٹپی ئیں ھالت ءَ ایمبولینس ءِ سرا برَگا بنت کہ تچگ ءِ کوشش ءَ تیر گواری ءَ چہ جنَئگ بیت۔

مرچی بازیں فورَماں، سول جنگانی سرا سرپدی ئیں بازیں مھلوک ءِ نیمگا ہمے تبصرہ کنگ بیت کہ “لبریشن ٹائیگر آف تامل ایلام” ءِ بے سوبی ءِ سبب اے جنگ ءِ گوریلا رھبند نہ بوگ یا ریگولر آرمی ءِ طرز ءَ جنگ کنگ بوتگ، وھد ءَ چہ پیش یک حکومتےءِ درور دیما آرگ بوتگ ، اے گپ ءِ زانگ ءَ چہ پد ہم کہ ہندوستان دیمترا گوں آہاں ہم ستکی نہ کنت و دغا کنت، اے گُمان ءَ چہ پد ہم ہندوستان ءِ سرا بھیسہ کنگ، مُھکمیں سلاہ بندیں جُہدےءَ چہ پد یک سیاسی سٹریکچرے ءِ نہ بوگ، وتی شہرانی یلہ دیَگ و یک زیروان یا ءَ بند بؤگ ءَ چہ جنگ ءِ توکا تیزی پیدا کنگ،

بلے بازیں چمشانک دیوکانی منَگ ایش انت دو ہزار نُہہ ءَ کَلّ و کسارت کتگیں تامل جُنز یک وھدے کیت کہ پدا سر ءُ شاہ کشّیت، تہہ و توکاں شپ ءُ شَپُّکی یک نوکیں سرپ بندی ءِ نیمگا اشارہ دنت۔

گواہے کہ کینیڈا، امریکہ ءُ یورپی ملکاں جاہ منندیں تاملانی سیاسی جُہد سیمینار ءُ پمفلٹنگ ءِ دروشم ءَ وڑے نا وڑے ءَ منتگ۔ نوں اے چارگی انت کہ باریں دگنیا ءِ راجی جُنز چہ تاملاننی شکست ءَ سبق زُورنت یا وَ تامل اے دَرس ءَ زُورنت ءُ پدا پاد کاینت ءُ وتی سرا بوتگیں زُلم ءِ ھساب ءَ گرنت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔