گیرت مند ھژدھا ءَ پِلک اِت اَنت یا زمین ءَ ایر کشّ اِت اَنت؟ – مزار کریم

258

گیرت مند ھژدھا ءَ پِلک اِت اَنت یا زمین ءَ ایر کشّ اِت اَنت؟

نبشتہ کار : مزار کریم

دی بلوچستان پوسٹ

ھمے زیت اِنت کہ یک بلوچ جِنکے ءَ بول چینل ءَ یک مراگشے ءَ سوتے گْوشت ، نامی ءُ گرامی ئیں گیرت مندیں بلوچاں الکاپ ءَ نگد (تنقید) کت ، آ بے چارگ وڑ وڑیں اُرپ ءُ ناماں توار جت ۔ گیرت منداں اے بس نہ بوت اَنت داں بُرت ءُ بلوچیت ءَ ھم دزپارگ اِش کُت! بلے نی نہ زان اِیں کہ گیرت مند کج ءَ چیر اَنت !

آواران ءِ تہ ءَ جنین آدم ءُ گوں چُکاں بیگواہ کنگ بُوَگ ءَ اَنت
مھنوئیں گھارانی گُشان لجوزیں دژمناں لگتمال کنگ ءَ اَنت!
آ گیرت مند ھژدھا ءَ پِلک اِت اَنت یا زمین ءَ ایر کشّ اِت اَنت؟

اگاں تو لج ءِ گھارانی اگاں تو جامگ ءِ ماتانی، گڑا تو باز کم گندگ بہ ئے، چاگردی رِسانکدار ءَ کہ چیز ءِ وھد ساری آواران ءِ دمگ مشکے ءَ یک گھارے ءِ تیر سُپتگیں لاشے دور دیَگ بیت کہ آئی گون ءَ پاکستان ءِ ناپاکیں پوج ءَ گیر انسانی سلوک کتگ ءُ پد ءَ شھید اِش کتگ ،یک سرجمیں ماھے ءَ آ زندان ءَ بندیگ کنگ بیتگ ءُ ھر وڑیں ازیتانی دیمپان بیتگ!

گڑا چدو گیش زُلم زوراکی کجام اِنت؟

تو انگت نند ئے دیمتر ءَ ندارگ کن ئے؟
چیزے ماہ ءَ ساری آواران مشکے ءَ پاکستانی لشکر ءُ چیریں ادارھانی کارندھاں اللہ بکش ءِ لوگ بانک گوں چُکاں ھوار آوار جت ءُ بیگواہ کُت اَنت،مات نورملک ءُ گوں زھگاں ھژدہ سالی ئیں ھسینہ ءُ دہ سالی ئیں زمیر ،بیست سالی ئیں سمینہ ءَ گوں ھَوار پاکستان ءِ ازاب جاھاں بندیگ اَنت.

مروچی چنت ماہ گْوزگ ءَ پد ھم نور ملک، ھسینہ ءُ سمینہ ءُ زمیر ءِ ھچ وڑیں ھال نیست کہ آ باریں اے وھد ءَ کجام ھال ءِ تہ ءَ اَنت! یات بکن ات کہ شمئے ھاموشی ءُ بے تواری بلوچ چک چینی ءِ گیشی ءُ شمئے ھبر ءُ ھمراھداری ما پاکستانی کبز ءِ ھلاپ ءَ بلوچ چک چینی ءِ دارگ ءِ سبب بوت کنت!

مروچی پاکستانی لشکر بلوچستان ءِ زلبولاں ھم چوں بنگلہ دیش ءِ زالبولانی پیم ءَ جنسی زیادتی ءِ آماچ کنگ ءَ اِنت.

بنگلہ دیش ءِ مردماں آزادی جار جت، گڑا سرجمیں بنگلہ دیش ءَ پاکستان ءِ لشکر ءَ آس روک کُت! بنگالیانی چُک چینی کُتگ بنگالیانی چُک چینی ءِ وھد ءَ کساس 30 لکّ مھلوک پاکستانی لشکر ءُ آئی ءِ ھَندی جھگیرانی دست ءَ کشگ بیتگ! یک اندازھے ءِ ھساب ءَ اے وھد ءَ دو لک بنگالی زالبول جنسی زیادتی ءِ آماچ کنگ بیتگ!

اگاں بلوچ ھچ توار چست مہ کنت گڑا مئے ھَر بلوچ ءِ گِس ءَ زالبول جنسی زیادتی ءِ آماچ کنگ بنت!

بلوچی ءَ بتلے جن اَنت
(وتی مردم مدام ساٹ ایت تیمار ایت بلے دری کدی تئی گموار بوت نہ کنت۔ ھر کس ءَ وتی ھیش ءُ مردم چار اِیت! )

مروچی اگاں آس مئے ھمساھگ ءِ گِس ءَ روک اِنت، باندا ھمے آس مئے جند ءِ گِس ءَ روک بہ بیت گڑا……..منی ءُ تئی دل ءَ چی گوزیت؟
مروچی تو ھمے ھاتر ءَ گپ ءُ ھبر نہ کن ئے کہ تئی گِس ءِ مردم وش ھال اَنت، اے سرپد مبو کہ مروچی منی گِس وش ھال اِنت، اے آس ءِ ما بلوچستان ءَ بلوچانی ھَر گِس روک اِنت! اے مُلک ءَ انسانیت نیست انسانیت ءِ نام ءُ نِشان گار اِنت.

انساناں بَر ءُ بیگواہ کن، بیگواھیں انساناں اَزیت کن، زالبول جنسی زیادتی ءِ آماچ کن ! ءُ پد ءَ آئی گِس ءِ مردماں زیھنی نادْراہ جوڑ بہ کن، پِس ءُ ماساں براس ءُ گُھاراں زیھنی ٹارچر کن! یک انسانے ءِ آئی ءِ بیگواہ ءَ کنگ ءَ دُراھیں گِس ءَ آس رو کن! گِس ءِ مردم آرام کُت نہ کن اَنت، نِشتگاں ودار ءَ چم اِش راھان اَنت کہ کدی مئے مردم کیت…

مئے ھما بندیگ آجو بیت آیانی ھیال زھن ھمے چیز ءَ گوں بندوک انت کارو باریل داتگ انت! وتی گِس ءِ یلہ داتگ اَنت، ھمے ھاتر ءَ کہ جگر بندیگ اَنت، بس شپ ءُ روچ نشتگ اَنت شُد ھرتالی بُنجل ءَ شُد تُن برداش کنگ ءَ اَنت، جُھد ءِ برجاہ داشتگ وداریگ اَنت کدی دوست کیت مئے دیم ءَ نند اِیت گوں ما ھم دیوان بیت، بلے اے مُلک ءَ کَس کَسے ءِ گپاں گوش نہ دار اِیت ،ھرکَس گوں وتی کارو باراں دل گوش اِنت، گوں وتی زند ءَ چیر ءُ سَر اِنت ،پرچاکہ آیانی گِساں آس روک نہ انت، آھانی زَھگ بندیگ نہ انت، پمیشکا آیاں کَسے ءِ درد پرنیست، دومی گپ ھمیش انت انسانیت نیست ،اگاں انسانیت بوتین اَت، گڑا دْرستاں توار چست کُتگ اَت، درد ھَما گِس ءِ مردماں پِر اَنت کہ آیانی کھول ءِ مردم بندیگ اَنت. ما چونا ءَ وتگرز اِیں، وتی لوگ مردماں تاوان بہ رس اِیت ما توار چست کن ایں، وھدیکہ دگرانی لوگ ءَ تاوان بہ رس اِیت مارا ھچ سما پر نیست کہ چیزے بوتگ یا ناں الّم نہ اِنت منی ءُ تئی جند ءِ لوگ ءِ گْوھار ءُ ماس بہ بیت الّم نہ اِنت منی ءُ تئی ھکّیں گوھار ءُ ماس بہ بنت. اے دْرست مئے ماس اَنت، اے دْرست مئے گوھار اَنت اے درست مئے زھگ اَنت درست بلوچ اَنت، اگاں مارا شمارا زندگ بُوَگی اِنت گُڑا مارا اَلّم توار چست کنگی ایں. اگاں نہ گُڑا ما ءُ شما کس اد ءَ پش نہ کپ اِیں.

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔