16 اپریل 2013 کو بلوچستان کے ضلع واشک کے علاقے ماشکیل میں 7.8 شدت کے زلزلہ سے 5000 ہزار کے قریب مکانات زمین بوس اور 35 افراد جاں بحق ہوئے تھے اس وقت کے وزیراعلی ڈاکٹر عبدالمالک بلوچ نے زلزلہ زدگان کیلئے 18 کروڑ روپے امداد کا اعلان کیا لیکن اس پر عمل در آمد نہیں ہوسکا اوراس کے بعد نواب ثنا اللہ زہری کی دور حکومت میں بھی زلزلہ زدگان کیلئے 12 کروڑ روپے امدادی پیکج کا اعلان کیا گیا تھا اور شرائط عائد کی گئی تھی کہ متاثرین اپنا بینک اکاونٹ کھلوائیں جس پر متاثرین نے ادھار رقم لیکر 500 سو روپے کے اکانٹس کھلوائے لیکن تاہم امدادی رقم نہیں مل سکی جبکہ علاقے سے منتخب سابق صوبائی وزیر اور وفاقی وزیر نے بھی لوگوں کے مسائل حل کرنے کیلئے کوئی خاطر خواہ اقدامات نہیں اٹھائے۔
علاقے کے سیاسی و سماجی حلقوں کے مطابق 25 جولائی 2018 کے عام انتخابات میں علاقے سے منتخب رکن صوبائی اسمبلی میر حاجی زابد علی ریکی نے 29 دسمبر 2018 کو اسبملی اجلاس میں زلزلہ متاثرین کا مسئلہ اٹھایا اس کے بعد ایک کمیٹی بھی تشکیل دیا گیا لیکن اس کے باوجود زلزلہ متاثرین کی امداد کے لیے کوئی عملی اقدامات نہیں اٹھائے گئے ہیں۔
علاقے کے سیاسی و سماجی حلقوں نے وزیراعلی بلوچستان اور منتخب عوامی نمائندوں اور حکام بالا سے پرزور مطالبہ کیا ہے کہ ماشکیل کے زلزلہ متاثرین کے متعلق جلد از جلد ہنگامی سطح پر اقدامات کیئے جائیں اور ان کو امداد دی جائے تاکہ ان کے مشکلات دور ہو سکیں۔
