خواری کش آتا جہانی دے – محمد عمران لہڑی

273

خواری کش آتا جہانی دے

نوشت: محمد عمران لہڑی

دی بلوچستان پوسٹ 

جہان نا زیبائی و آسودگی ہرا تپہ نا دو آن مریک ہمو تپہ نا زند سختی سوری آن پر ئے. دنکہ ملک آتیٹی خولم ئے دسنگ، دے باسن آ دیر توننگ، تیاری نا وخت آ روتنگ و لاب کننگ اسکان مچا کاریم تے بزغر کیک ولے غلہ نا ارغ ئے مچا جہان نا باتیک کنیرہ. اندن زند نا ہر پڑ آ دا خواری کش آتا محنت و خواری آن انسان نا زند آسودئی ٹی تدینگنگ ئے.

خیر دا تو داسہ اسے روایت ئس جوڑ مسونے کہ بس یکم مئی بریک خواری کش آتا باروٹ گڑاس راست و دروغ او ہیت و گپ، منہ لوز نوشتہ کننگک، بس دے نا تدینگنگ تون اندا طبقہ نا خواری، زلیلی، ناانصافیک برجا سلیرہ. مچا سال کس اوتیان ہرفپک کہ نما زند نا دیک امر تدینگنگ او….. کل آن بهلا جہالت نا دروشم دادے کہ یکم مئی ئے ہمو بندغاک ہم مزور تا حق آتیکن اڈ ایترہ ہراکے تینٹ مزور و خواری کش نا استحصال ئے کننگ ئے. یکم مئی نا برانز آتیٹی ہمو مخلوق ہم تران کیک ہراکے دا طبقہ نا محنت نا جائز اننگا وسیلہ ئے تفک.

یکم مئی نا دے آ مچا جہان اٹ خواری کش آتا محنت، سختی و زند نا ایلو ویل آتیا ہیت و گپ تران آک مریرہ، دیواناک اڈ ہلیرہ، سڑک آتیا مخلوق برانز کیک. ہمو گل و یونین آک ہراکے دا طبقہ نا حق و اونا زند نا بنیادی آ حق آتے دوئی کننگ کن جوڑ مسونو، دا دے آ جلوس کشیرہ، مزور نا استحصال کروکاتا برخلاف توار چست کیرہ، سرکار ئے اندا طبقہ نا حق آتے تننگ نا نعرہ ئے خلیرہ.

ولے اگہ مچے حقیقت نا پارہ غا نظر ئس شاغن، دا دور باری ٹی تینا چپ چاگڑد اٹ خواری کش نا زند نا جاچ ئس الین تو ننے دا معلومداری ملیک کہ مزور نا پن اٹ تو اندا خواجہ غاک ہم مزور نا استحصال ئے کننگ او. اندا یونین آک ہم تو سرکار تون گنڈوک او… سرکار آن منہ نوکری نا وسیلہ اٹ خواری کش نا حق آتیان تینا مونے ہڑسانو. مزور نا پن اٹ سرکار ئے بلیک میل کننگ آن بیدس پین ہچ مزور نا حق و آسودگی نا ہیت ئس.

خیر داسہ نن دا دے نا تاریخ ئے نہ اورینہ و نہ کہ پیشن نا دنیا نا مزور آتا باروٹ لوز نوشتہ کینہ…. داسہ نن تینا دهرتی بلوچستان نا ڈغار آ اندا خواری کش آتا زند نا جاچ ئس الینہ. بلوچستان اٹ دا طبقہ کل آن زیات محنت و خواری کیک، مچا دے کاریم کیک ولے اودے اونا ہمو کاریم نا وسیلہ دو بفک. اگہ اینو نن تینا ڈغار نا کوئلہ مائینز آتا خواری کش آتا زند آ نظر ئس شاغن تو ننے دا معلوم مریک کہ داڑے اندا مزور آتا خواری و محنت نا حق تینا جاگہ غا داڑے تو مزور نا زند نا حفاظت کن ہم سرکار، جاگیردار و سرمایہ دار آک ہچو وڑ و ڈول ئس کتانو. سال بلکہ تو اٹ کئی مزور آک اندا کوئلہ کان تیٹی زہریلا گیس، دهماکہ و پین حادثہ نا گواچی مرسہ زندگی آن دو سلیرہ. داڑے خواری کش آن زیات پیسہ ئے قدر ارے. داڑے نیزگاری انداخہ ودانے اندا سرمایہ دار آتا دو آن کہ اسے مزور ئس اگہ تینا کاریم اٹ اختہ مریسہ حادثہ سینا سوب آن موت نا گواچی مریک تو اونا جاگہ غا پین صد بندغ مزوری کن تینا کاغد آتے جمع کیرہ.

دا سرزمین آن خیسن پیشتمنگ ئے. ہراڑے خیسن پیشتمنگ ئے ہموڑے دا سرزمین نا باتیک تینا خواری نا وسیلہ غاتے دوئی کننگ کن برانز کننگ او. دا سیندک نا خواری کش آکو…. سیندک نا خیسن تیان چائنا ترقی نا کسر اٹ دنیا نا ایلو ملک آتیان کئی گام مونی ہنانے ولے دا دهرتی نا خواری کش آک اینو ہم تینا بنیادی حق و انصاف کن احتجاج کننگ او.

داڑے سرکار و سرمایہ دار آک اسے اندونو ماحول ئس جوڑ کرینو کہ کس ئس ہم نا انصافی و سرکار نا ناجائزی تا برخلاف ہیت کننگ کپک…. داڑے اندا خواری کش آتے دا دڑوکو تننگانے کہ اگہ کس ئس ہیت کرے توار چست کرے تو نیزگاری نا شکار مریک.

گوادر نا ماہی گیر آک مریر یاکہ سیندک ریکوڈک نا خواری کش آک، مچھ و ہرنائی شاہرگ نا کوئلہ کان آتا مزور آک مریر یاکہ حب نا فیکٹری تا محنت کش آک، باغ و ملک آتے آباد کروکا بزغک مریر یاکہ مش تیٹی خل پرغوکاک……… دا کل خواری کش آکو.. دا کل بلوچستان نا باتیک او….. دا دهرتی نا وارث آکو… ولے داتا زند داخہ سختی آن انتئے پر ئے…. دا نا باروٹ ہر باشعور ئے سوچئی ئے… کئی سال آن محنت و خواری آن پد ہم داسکان دا طبقہ نا زند آسودہ متو….. نہ کے او تینا جائز حق آتے دوئی کریر.

کئی سال مالو ہم اندا طبقہ تینا مچا دے نا خواری آن صرف تینا چنا تا ارا وخت نا ارغ ئے دوئی کریکہ اینو ہم مچا دے کاریم کیک و اندا کاریم نا وسیلہ اٹ صرف انداخہ دو بریک تے کہ صرف تینا چناتا پڈ ئے ولیفک.

دا حقیقت ئے خواجہ حمید عزیز آبادی تینا شاعری نا دروشم اٹ دا وڑ دوشان کیک……

ارے خید اٹ زباد اونا
وطن کل جائیداد اونا
کرینے جک او ماڑی تے
ولے ننکو شپاد اونا

مگر بے وس ئے مجبورے
وطن زیبائے پر نور ئے

حقیقت نا دا فریاد ئے
جہان اوڑان آباد ئے
او کل ئے پچ باخو تیک
مگر لوچ اونا زیذادے

دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔