کُٹّان ءِ نے آ بندغ – نظام نزیر

53

“کُٹّان ءِ نے آ بندغ”

نوشت: نظام نزیر

دی بلوچستان پوسٹ

ای دا خیال کیوہ کہ اگہ براہوئی زبان اٹ جبار یار نابوگ شوگی آ تخلیق متوکہ تو براہوئی زبان دا چسّ آن ہورک خنِنگاکہ۔ انتیکہ ایماندار جبار یار صاحب نا پانِنگے کہ ہر بندغ ءِ خدا وند تعالیٰ مخنگ و اوغنگ ناوسّ تسّونءِ ولے دا زندگی ٹی بندغ ودی کہ مریک تو اوغیسہ ودی مریک، او اگہ اوغپک تو دائی اودے زورٹ اوغفک، ولدا زندے گدریفسہ چِوہ کہ داکان کاہک و ایلوتے ہم اوغیفک مطلب دا کہ زند ئنا بھلا بشخ فکر و غم خواری اٹ گدرینگک، مون مُستی یار صاحب پارینے کہ دا حالت اٹ اگہ کسس مچِٹو وخت ئسے کن کسے بشخندہ ہم تِننگ کرے تو بھاز بھلو ہیت ئسے۔

ہندن جبار یار صاحب نا دا ہیتان نَن دا سرپند مرینہ کہ اگہ او بوگ شوگ نوشتہ کرینے دا اف کہ او ہندُن مسخرا گو و خوش و گلانو بندغ ہس مسونے یا بیرہ ڈُکھ و گڑتی آن آجو مسون ءِ۔ آخا بلکہ ہندُن اودے اَم زند ئنا ہر ڈُکھ و وئیل پلویڑ کریسُس ولے او ایلوتیکن مخیفنگ نا اسے جوانو فن ئسے نا خواجہ مس۔ او اسے جوانو ہنر ہس دوئی کرے انتیکہ او داڑے بھاز سوبرو ہیت ہس کرینے کہ دا ڈُکھ و وئیل آتا جہان ٹی کس ہس کہ کسے مخیفِک بشخندہ و ٹاکو خلِفنگ کنِنگ کیک تو دا بھلو گپ ئسے کہ اونا گڑتی آ دروشم ءِ بدل کنِنگ یا کسے نا سینہ ٹی ڈُکھ آتا تیوئی آ بڈّ آن اودے بشخندہ کریفے یا اونا غم تا دنیا غان اونا ہوش پرّیفنگ کے یقین اٹ ئسے بھلو ہنر ہس خواہک۔ دا ہنر نا خواجہ یار صاحب ہس ۔

دا بھاز بھلو کمال ئسے کہ جبار یار نا شاعری گُہرُم انِنگا بندغ آتے ہم بشخندہ و ٹاکو خلنگ نا وسّ ایتِک۔ جبار یار نا شاعری تینا جاگہ غا ولے شاعری آن بیدس ہم جبار ئسے یار آتا یار اس ئس، مہر مابت، وطن دوستی، رواداری، مخلصی و قدردانی ہم جبار یار صاحب نا میرات ئس۔

پارہ جبار یار اراتم سنجیدہ ءُ اگہ شاعری بنِفوس اُس تو واہم مخلوق ءِ مخننگ ہلککہ انتیکہ اونا بوگ شوگی آ و پُر چسّ و چاشنی آ شاعریک مخلوق نا اُست آتیٹی ہند و جاگہ جوڑاسو۔ اندا سوب آن ہراوخت او اسٹیج آ ہناکہ تو اونا بنِفنگ آن مُست بنوکاک بشخندہ کریرہ۔

اودے قدرت اسے لائخی ئسے نا خواجہ جوڑاسُس۔ اگہ نن یار صاحب نا اینو اَم شاعری آ ارین تو ننے اونا شاعری ٹی، ننا راج ئنا کمبوتی، نزوری، بے رواداری بے مہری، بے علمی و بے شعوری تون مون تس نا کلہو و سبخ ہیت گپ آک اونا نوشتہ کاری ٹی نظر بریرہ۔

جبار یار صاحب ننا راج ئنا ہر ئسے گڑاغا بھاز خوڑتی اٹ ہُنِنگ نا وسّ تخان ءِ و بھاز خوڑتی اٹ قلم وہیفینے۔ یار صاحب اٹ دا لائخی بھاز سوبر اس کہ او درو نا وخت و درو نا ہیتاتے اینو کِن خوندی کرینے۔ جبار یار شاعر اَس آخا بلکہ تینا راج ئنا و تینا ڈے و مخلوق نا اسےدڑد خورءُ بندغ اس ئسکہ۔ او ہندُن اونا سینہ احساس آن پُر چُلک خلکون ءِ۔

او تینا نوشت اٹ ہر گِڑا نا حق ءِ ادا کرینے۔ جبار یار نا ہر اسے نوشت اٹ بوگ شوگ و داڑتون اوار اسے سبخ اس ام تخوکے۔ اونا شاعری ٹی طنز ام ارے و مزاح ام نظر بریک دنکہ او تینا ئسے (حمد) ئسے ٹی دُن پاہک؛

حلال آ رزق ئنا نے آن جستجو خواوہ
ای دال کنپرہ اینو برنج و سُو خواوہ

ہنینو ڈش ام میوہ تو راہی کر کنکن
ای سیر پِڈّا ذرس نیتو گُفتگو خواوہ

دنکہ یار صاحب واقعی یارس ئس، ربّ پاک تون ہم او تینا ہیتاتے اسے پُر چسّو انداز ئسے ٹی تخلیق کرینے ہندن یار صاحب پارینے کہ ای نے آن حلال و رزق ئسے نا خواست ءِ کیوہ ولے ای دال کنپرہ ای نے آن برنج و سُو خواوہ کنا پڈّ ءِ اسیکا سیر ایتے اوکان گُڈ نیتو ای گفتگو کیوہ یعنی کنا پڈ سیر مرے اسیکا کنے پڈ ئنا غم و فکر ءِ۔

ہیت ئنا پانِنگ دادے کہ یار صاحب (حمد) اٹی ام ئسے جوان ءُ بوگ شوگی ءُ ادا ہس مون آ ایسون ءِ۔

داکان بیدس جبار یار نا ایلو تخلیق آتیٹی محبوب نا بیوفائی، مہر و خر مہری، ارٹمیکو برام، نشار، بلغڑ، پڈّ ئنا خلوک، کشی آ کتّار، عئید، اقرار، ٹال والا، عاشق آ قصاب، معشوق نا کوپہ، زی خچ، مہمانی، سانگبندی و پین چندی صنف آتا تینا بوگ شوگی آ انداز اٹ باز گچینی پُرچسّ ءُ لوز خُلان ءِ تخلیق کرینے۔ اونا بوگ شوگی آ شاعری ٹی “مامانا موٹل” اسٹ نا درزَن ہس ہسُّر چنانا بے کچ پنی ءُ. داکان بیدس اونا دا کتاباک، بشخندہ، خیرات خور، دروشم نا سیخا، شینک مسونو!

اندُن جبار یار صاحب نا فن اٹ گِڑاس فنی نزوری نا کمبوتی ارے ولے اگہ نَن یار صاحب نا تخلیق نا ہیت ءِ کینہ اونا بوگ شوگی آ فن براہوئی زبان اٹ ئسے کمال ہس تخک۔ ننا براہوئی ادب اٹ ایماندار جبار یار صاحب آن گُڈ اونا جاگہ ءِ کسس پُرّ آ ہلتہ نے۔

جبار یار پائک؛

پیسہ کٹنگ داخہ در آسان اف
دا بلوچستان ءِ دا جاپان اف

_____________

پین اف اِچ ءُ کسر دا عشقنا بیمار کن
اُست پاہک لانچہ تینےسدھا اونا شارکن

_____________

زلفٹ کنے تفینُس نےآ رپوٹ کیوہ
اُستےکنا درینُس نے آ رپورٹ کیوہ

دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔