‎گُلگِداے گوں اماں یاسمین اسلم ءَ

78

‎گُلگِداے گوں اماں یاسمین اسلم ءَ

‎منتوار کرنٹ بلوچستان

‎دی بلوچستان پوسٹ

‎اماں یاسمین اسلم ءِ اے گُلگِدار کرنٹ بلوچستان ءِ نیمگ ءَ شنگ کنگ بیتگ دی بلوچستان پوسٹ ءِ وانوکانی واست ءَ منتگری ءَ چہ شنگ ءِ کنگ ءَ ایں

‎ما ترا کرنٹ بلوچستان ءِ نیمگ ءَ وش اتک کن ایں

‎پَسّو: منتوار شمئے کہ شما منی ھیال ءُ لیکہاں بلوچ راج ءَ سر کنگ ءَ ئِے

‎جُست: وھدیکہ تر ءَ اے سرپدی رَس اتگ کہ تی ورنائیں بَچ پُلیں ریھان جان وتی ابدمانیں مات ءِ واست ءَ وتا ندریگ کنگ ءَ انت تو چی جیڑیتگ ءُ تی ھیال ءُ لیکہ چی اَنت؟

‎پَسو: من آ دیدانک ءُ جزبگ ءَ پریچ کرت نہ کن آں، اگاں من ءِ بہ کن آں پد ءَ ھم اے بیت نہ کنت کہ گوشداروک ءُ وانوک اے جزبگ ءَ ھما وڑ ءَ سماہ بہ کن آں اے جاوراں چی گْوستگ یا نہ گوستگ یک گپ ءِ من تچک کنگ لوٹ آں کہ ناکُن ءَ چہ بستگیں سیادی کجام ھم مات، یا کجام لوگ بانک ءِ واست ءَ وتی چُک ءُ لوگ واجہ ءَ چہ گیش سیادی نہ بیت بَلے ڈیھے سرڈگار ءُ راج ءِ راستگیں مھرانی دیدانک، سمائی درچی ءُ دردانی بار ھما کَچ ءَ سر بیتگ اَنت کہ پد ءَ لوگ واجہ ءُ چُک ءِ سیادی اشانی دیم ءَ ھلاس بیت ءُ اے منی جند ءِ دیدانک اِنت، زانت ءُ سمائی درچ اِنت وھدے کہ تر ءَ اے سماہ بیت کہ ڈیھ ءِ مھرانی ءُ وتی راج ءِ دردانی زورگ ءَ راستگیں سماہ کن ئے پد ءَ وتی جند ءِ درد ءُ گم ھچ وڑ ءَ سماہ نہ کن اَنت وتی راج ءُ ڈیھ ءِ واست ءَ ھمک وڑیں درد اوپار کنگ بیت ءُ ھم وڑیں دیمھونیانی تہ ءَ گوزگ بیت

‎جست: اے ھبر باور نہ بیت پد ءَ ھم تو گِندگ بئے کہ تو پہ شان ءُ مڑاہ ریھان جان ءَ بیرک ءَ بڈ ءَ مانپوش ئے ءُ دست ءَ بڈ ءَ جن ئے ءُ دیم پی مسکیں سرڈگار ءَ ندر بوھگ ءِ ھاتر ءَ راھی کن ئِے اے درگت ءَ تو چی گْوش ئِے آ کجام مھر اِنت کہ تر ءَ اے دیمھونی ءِ کنگ ءَ جاڑیگ ئے کرتگ؟

‎پسو: ھچ نیست! بس بلوچ راج ءُ بلوچستان ءِ مھر ءُ وتی شھیدانی یاتگیری ءُ درد ءِ سماہ ءُ دشمن ءِ روگ ءِ دراھگ ءِ جزبگ اے یاتگیری منی بچ ءَ پہ وت ءَ جیڑیتگ آجوئی ءُ آھوکیں پدریچ ءِ چماں نوکیں سھب ءِ رژن بلینتگ وھدے کہ ریھان ءِ چماں کمے ھم ارسیگی ءِ جاور پیشدراھی نہ کرتگ اَنت گڑا منی چماں کجام ارس ءِ پیشدراھی بیت کنت من بس اے وڑیں بامردیں بچے ءِ مات بوھگ ءِ پھربندی ءَ کرت کن آں

‎جست: تو وتی زھگ پلیں ریھان ءُ لوگ واجہ جنرل اسلم بلوچ ءِ وڑیں سرانی ندریگ بیگ ءَ پد ھم وتا چو مھکمیں کلات ءَ داشتگ ءُ بلوچ راج ءَ اے کلوہ داتگ کہ اے جنگ انگت ءَ برجاہ اِنت ءُ مئے جھد نامانی روگ ءَ ھلاس بیت نہ کنت تی ھیال ءَ مروچی بلوچ ورناہ، جنرل اسلم ءُ ریھان ءِ پگر ءَ کجام وڑ ءَ دیم ءَ برگ ءَ اَنت یا کجام پیما جنزان بہ کن اَنت؟

‎پسو: راست من مھکمی ءِ رنگ ءَ اے اُمیت ءَ اوشتوک اَنت کہ جنرل اسلم ءُ ریھان ءُ دگہ ھزارانی کساس ءَ مروچی اسلم ءُ ریھان ودینتگ مروچی جنرل اسلم ءِ پکر ءُ کاروان دیم ءَ شتگ داں آجوئی ءَ نہ اوشتیت اے منی مھکمیں ایمان اِنت بلوچ راج دلپروش نہ اِنت مئے ھزاراں ورناہ جنرل اسلم ءُ ریھان جان ءِ راھ ءِ روگ ءَ ھمے راستگی ءِ ھمراھی ءُ راھیگ بنت ءُ آ گیشتر زان اَنت کہ اے کاروان ءَ کجام رنگ ءَ برت کن اَنت کجام رنگ ءَ ما وتی گاماں چِست کُرت کن ایں

‎جست: دگینا ءِ آ دگہ کنڈاں آجوئی ءِ جنز بنت یا آشوبی زالبولانی کرد گندگ بیتگ یا بیت چُشکہ پَلستین، کردستان یا دگنیا کجام میانی ءُ کشی جاگہ بیتگ اَنت یا ھَست اَنت بَلے مروچی بلوچ جنینانی جھد ءِ تہ ءَ بازیں کساسے ءَ ھوار نہ بیگ ءِ سَوب چی اِنت؟

‎پسو: بلوچ زرمبش ءَ جنینانی ھوار بیگ ءَ پیسریگ ءَ چہ اَنی گیش اِنت ءُ دیم ءَ انگت گیش بیت مروچی من وت گِندگ ءَ اوں بلکیں سماہ کنگ ءَ اوں منی مات ءُ گھارانی پکر ءُ زانت دگنیا ءِ آدگہ زیردستیں جنیناں چہ کم نہ اِنت بلکیں وھد ءِ ھمراھی ءَ گیش توان بندان کنت اِنشلّا، آجوئی کجام راج ءِ مردانی واست ءَ ھمک درکار بیتیں ھمے کساس ءَ جنینانی واست ءَ ھم درکار بیت۔ گوست ءَ مئے چاگرد ءِ بندی ءِ سبب ءَ چہ جنیناں جنز ءِ واست ءَ اے وڑیں کردگار پیلو کرت نہ کرتگ بَلے مروچی اے گپ ءِ درد درستیں بلوچ مرد ءُ جنیناں ماریتگ کہ جنینانی بھر نہ زورگ ءَ آجوئی ءِ راہ ءُ درانی پَٹگ ارزانی نہ اِنت۔

‎جست، جنرل اسلم بلوچ ءِ شھادت نہ ایوک ءَ آئی گَل بی اِل اے ءِ واست ءَ انوگیں وھد ءَ راجی جنز ءِ واست ءَ یک مزنین تاوان ءِ اے درگت ءَ چی گْوش ئِے؟

‎پسو: سِیت ءُ نَپ، نیزوری ءُ برزی، جنز ءِ بھر لازمی بنت من ھما وھد ءَ تاوان سرپدباں گڑا وھدے کہ جنز ناگتہ بہ اوشتیت، ھما وھد ءَ جنز ساری ءُ جاری اِنت، ھما وھد ءَ تاں ھونریچی ءِ دیمھونی جنز ءِ واست ءَ نَپ اَنت بیت کنت شھیدانی تہ ءَ کمی گیشی بئیت بَلے جنز اوشتات نہ کنت ءُ شھیدی ءِ ھون تالان کن اَنت جنز ءَ گیش دیم ءَ بران کن اَنت جی البت یک جنینی ءِ واست ءَ آئی ءِ مرد ءِ جتائی الم مزن ءُ پراموشیں دردے نہ اِنت۔

‎جست: مروچی بلوچ راج ترا لُمہ یاسمین ءِ نام ءَ زانت ءُ پجاہ کاریت اے درگت ءَ مزنین کساسے ءَ بلوچ راج ءِ اوست ءُ اُمیت گوں شما بندویک اَنت تی داتگیں دیمھونی شکساتگیں دیھمونی وت پدر اَنت دوھمی بلوچ مھلوک ءِ مجگ ءَ ھمے جست ودی بیت کہ مات یاسمین مدام راج ءِ رھشونی ءَ کنت راجی جیڑھانی دیم ءَ اوشتیت؟

‎پسو: راجی آجوئی ءِ وڑیں پاک ءُ پلگاریں ھستی ءِ واست ءَ انگتہ من ھچ نہ کرتگ باز کنگ لوٹیت آجوئی ءِ گرگ ارزانی ءِ نہ اِنت بازیں دیمھونی دیگ ءُ ھمروچی ءِ دروشم ءَ دیمھونی دیگ ءُ جھد ءِ کنگ ءَ پد آجوئی ءِ رژنیں بام دیم ءَ رژناہ بیت من بلوچ راجی آجوئی ءِ واست ءَ وتی گڈی ساہ ءَ داں جد ءُ جھد ءَ برجاہ داراں ءُ کجام رنگیں دیمھونی ءِ پہ ڈیھ ءَ درکار بہ بیت من دیگ ءَ چَک ءُ پد نہ باں

‎جست: یک نیمگے چین دوھمی نیمگ ءَ سَعودی ءَ لانک بستگ پہ بلوچ ڈیھ ءِ مڈیانی پُلپھانچی ءَ پہ اشانی دیم ءِ دارگ ءَ بلوچ مھلوک ھمے گپ ءَ پدراھی کنگ ءَ انت کہ وھد ءِ لوٹ ھمسنتی اِنت یکیں سنگر ءَ یکجاھی اِنت۔ استاد جنرل اسلم ھمے ھیال ءُ لیکھانی منوک بیتگ تو چی گْوش ئے اے جست ءِ پشدر ءَ؟

‎پسو: راستگی اِنت کہ ھمسنتی ءُ ھمگرنچی ءَ ابید اے مزن مزنیں زورانی پروشگ ارزانی یے نہ اِنت۔ اژدری اے وھد ءَ ھمیش اِنت کہ بلوچ یکدست ءُ ھمکوپگ بہ بیت سرجمیں زور ءَ دشمن ءِ بگیری ءَ کار بہ بندیت اے گپ ءِ منوک جنرل اسلم وت ھم بیتگ ءُ آئی ءَ اے زور ھم باز جتگ ءُ اے ھم پیشدراھی کرتگ کہ اگاں پاک ءُ پلگارگیں رنگے ءَ جھدے بہ کن ئے گڑا ھمنستی ءُ ھمگرنچی بیتیں۔

‎جست: تی ھیال ءَ آزاد بلوچستان چے پئیمیں ڈیھے بہ بیت؟

‎پسو: من یک ھنچیں آزاد بلوچستان ءِ لوٹ آں کہ اود ءَ سنگ ءُ شاھیم بروبری، ھمک بلوچ وشھال ءُ شادان بہ بیت، اود ءَ نیزگار ءُ سردار برابر بہ بیت، مزھبی بندوکی ءِ درست آجوئی ءِ وڑ ءَ وتی وتی مزھب ءَ بہ کنت، اود ءُ درستاں چہ برز تِر انسانیت ءِ دیم چارگ بہ بیت اود ءَ زُلم ءُ زوراکی، ھکجنی ءِ راہ پچ مہ بنت، اود ءَ زانشتی ءُ جاندراھی آسراتی مُپت بہ بنت، اود ءَ بلوچ مھتر یک شیر مچینتگیں ماتے ءِ رنگ ءَ درستیں بلوچاں بروبری ءَ بہ چاریت ءُ آیانی ھیالداری ءَ بہ کنت۔

‎گڈی جست، تو بلوچ راج ءُ بلوچ چاگرد ءَ یک مزن دلیں ماتے ءِ بستار ءَ زانگ بئے۔ تو آ دگہ مات ءُ بلوچ جنیناں چی کلوہ دیگ لوٹ ئے؟

‎پسو: دیمھونی، نہ کٹوکیں دیمھونی! جد ءُ جھد ءُ نہ کٹوکیں جد ءُ جھد! وتی چکاں آجوئی ءِ جد ءُ جھد ءِ دارگ ءِ جاہ ءَ آیاں اے راہ ءِ واست ءَ سکین بہ دے اَنت، آیانی ھِمت ءُ کوپگ بہ بنت، آیانی ھمراہداری ءَ بہ کن اَنت، آیانی واست ءَ چہ واجہ ھدا ءِ گور ءَ سوبمندی ءِ دوایا بہ کن اَنت، آیانی سر ءَ پھر بندی بہ کن اَنت، آیانی کرتگیں کارانی شکساھی ءَ بہ کن اَنت، چک ءِ اولی زانتی مات ءِ کونڈ ءَ چہ شیرمچی ءَ بیتیں آئی ءَ اولی زانتجاہ ءَ چہ آجوئی ءِ زانت ءُ ھیال ءَ بہ دِئے ءُ مزن بہ کن۔