چیرمین زاھد بلوچ انسان دوستی ءِ چیدگ انت – سرباز وفا

68

چیرمین زاھد بلوچ انسان دوستی ءِ چیدگ انت

نبشتہ کار: سرباز وفا

دی بلوچستان پوسٹ

ھمک کِسّہ گپ ءُ تْران
یلیں زاھد تی دیوان
دل ءِ مئےرگ رگ ءَ نکشاں
چہ پیم ما دُژمن ءَ بکشاں

پہ انسان دوستی ءِ ھاتر ءَ جُھد کنگ راست ءُ نیکیں کار ءِ کنگ واجہ ھُدا ءَ دوست بیت۔ اگاں ما دینی وانگی آں پچاراں مارا انسان دوستی ءِ سکین ءَ دئے اَنت۔ اگاں دگنیا ءِ تَہ ءَ کجام دین بہ بیت آئی اولّی گپ پہ انسان دوستی ءَ بندات بیت۔ پہ انسانیت ھاتر ءَ جُھد کنگ ساپ ءُ پلگاریں راہ اِنت، انسان دوست کدی بیگواہ نہ بیت۔ ھمے پئیم پہ راج ءَ جھُد کنگ انسانیت ءِ جُھد انت۔ اگاں کجام جاہ ءَ کہ راجدوستی ءِ جُھد ودی بوتگ چہ آجوئیں راجانی راجدپتر ءِ وانگ ءَ دیم ءَ رَوان ئِے کُرتگ۔ اگاں مردم پہ راجی جھد ءِ ھاترءَ جیڑ اِیت گُڑا ھمے گپ پدّر بیت راجدوستی ءِ جُھد پہ کُلّیں انسانیت ءِ ھاتر ءَ نیکیں ھَمّل یے ۔۔۔۔۔۔۔۔۔ءُ آجوئی ءِ جُنز نزور ءُ ایردستیں راجانی رھشونی ءَ کنت۔

اَنچو ما چاراں آدگہ آجوئیں راجانی راجی جنز مئے رھشونی ءَ کنگ ءَ اَنت۔ چین، بنگلہ دیش، الجزائر ، ھندوستان ، کیوبا یا کجام ملک بہ بیت آئی ءِ راجی جنُز الم مارا سرپدی دنت کہ گلامیں راج جھد بہ کنت بے سوب نہ بیت ۔وھدے ما آھانی گْوست ءَ چاراں ھمے وڑ بوتگاں کہ مرچی بلوچ راج اِنت ۔ وھدے آ ملک چہ جُھد ءُ کوشست ءَ آجو بوتگاں الم بلوچستان ھم آجو بیت ،بلے کُربانی ءُ ھمدستی ھَژدری اِنت ۔پمشکا مرچی مارا آجوئیں ملکانی آجوئی ءِ جھُد کار انسان دوستی ءِ پنت ءَ دئےاَنت کہ جُھد کنگ اَولّی پدیانک اِنت ۔ اے ھبر پدّر اِنت کہ راج دوستی ءُ انسان دوستی ءِ تَہ ءَ واجہ ھُدا ءِ کمک گون اِنت۔پَرے ھاتر ءَ انسان دوست کدی بےسوب نہ بیت، چیاکہ انسان دوست ءَ ہر وڑ بُہ کُش ءُ گار کن یک روچے الم درا بیت ۔

وھدے انسان دوستی ءِ گپ کیت ڈاکٹر چے گویرا چو کوہ ءِ وڑا مئے دیم ءَ کیت ءُ مک بیت۔ ڈاکٹر چے گویرا ارجنٹینا ءِ تہ ءَ ودی بیت وھدے کیوبا ءِ راجی جنز ءِ بندات بیت ڈاکٹر چے گویرا گوں فیڈل کاسترو ءَ کیوبا ءِ راجی جنُز ءِ رھشونی ءَ کنت ۔چہ کیوبا ءَ پد آئی لوٹ ھمیش بیت من لاطینی امریکہ ءَ آشوب ءَ سر کن آں ۔امریکہ ءِ فوج ڈاکٹر چے گویرا دزگیر ءُ گار بیگواہ کنت داں یک مزنیں وھدے ءَ ڈاکٹر چےگویرا ءِ سوج ءُ گْواہ نہ بیت ۔کس نہ زانت ڈاکٹر چےگویرا کئے بُرت۔۔۔۔کجااِنت ءُ چون اِنت ۔یک روچے امریکہ ءِ فوجی اپسرے گوں اھواکارے ءَ نِندوک بیت شراب ءِ مَستی آں ھَنوش بیتءُ ھَبر کنت ما ڈاکٹر چے گویرا چِست کرتگ ءُ کُشتگ لاش ءِ پلان جاہ ءَ کڈ اِنت۔ گُڑا اھوالکار ھمے گپ ءَ شنگ کنت ۔۔۔۔۔۔۔۔۔۔ مھلوک روت ڈاکٹر چے گویرا ءِ کبر درگیج اِیت ءُ ڈاکٹر چے گویرا ھڈّ ءُکانپولاں در کنت ۔

ھمے وڑ ءَ چیئرمین زاھد بلوچ ءِ جُھد پہ راج دوستی ءُ انسان دوستی ءَ بوتگ کہ چہ زندان ءَ َاَبید بلوچ راج ءِ مْیان ءَ ساڑی ءُھمگام اِنت ۔ ھمے رنگ ءَ زاھد بلوچ ءَ بلوچ راج ایوک ءَ نہ، بلکن سرجمیں دگنیا زانت زاھد بلوچ کئے اِنت ۔من ءَ یاد اِنت اکتوبر 2013 اَت ما جاہ ءِ آہو کوہڑو نشت اِتاں چیرمین زاھد بلوچ نندوک اَت ۔ گْوش اِیت سنگتاں شُما اَنچو نشتگ اِت کتاب مُپت ءَ ایر اَنت۔ شما کتاب پرچہ نہ وان ئِے۔۔۔۔۔۔۔ بائدیں شُمارا گوں کتاب ءَ مھر بہ بیت۔ کتاب ءِ وانگ ءَ وتی آدت جوڑ بکن اِت۔ شُما بلوچ راج ءِ جھُدکار اِت۔۔۔۔۔۔ شُمارا گوں راج ءُ وتن ءَ مھر اِنت۔ شُما راجی جھد کار اِت کہ شُمئے کوپگاں راج ءِ گْرانیں بار اِنت۔ پمشکا شُمئے سنگتی گوں کتاب ءَ بہ بیت ، چیاکہ شُمارا زانت ءُ سرپدی کتاب دنت۔ ھمے رنگ ءَ شما گون راج ءُ وتن ءَ مہر
کن اِت ھمے وڑ گوں کتاب ءَ مہر بکن اِت ۔

چیرمین زاھد بلوچ ءِ کَول اِنت اگاں مئے سنگت چہ کتاب ءَ دور بِہ باں آھاں دُژمن پہ ارزانی ءَ گُمراہ کرت کنت۔ چیرمین زاھد بلوچ ءَ ھمے گُشت سنگتاں اے گپ نہ اِنت ما ایوک ءَ پہ بلوچ راج ءَ جھد کنگایں ،بلکیں مئے جُھد پہ ھما بزّگیں راجان انت کہ آ مئے بلوچ راج ءِ وڑ ءَ گُلام اَنت۔ وھدے بلوچستان آجو بوت بلوچ راجی جنُز تیوگیں گلامیں راجانی رھشونی ءَ کنت ۔اگاں مرچی ما نندیں ڈاکٹر چے گویرا ءُ چیرمین ماؤ ءِ کتاب ءَ واناں ھمے رنگ ءَ دگنیا باندا مئے راجی جنُز ءَ وانیت۔پمشکا راجدوستیءُ انسان دوستی ءِ یک بلائیں ارزشت یے ۔ ما اگاں یک اے وڑیں زمہ واری یے وتی کُوپگاں زُرتگ مئے رھشونی ءَ کتاب کنت۔ کتاب مارا زانت ءُ سرپدی دنت ،کتاب مارا ھاٹیگ ءُ ھمت دنت۔ چیاکہ اِلم یک دریائِے، تیوگیں اِلم ءَ کس وتی تہ ءَ آورت نہ کنت بلے مارا داں ھدّے ءَ جھد ءُ کوشست لوٹ اِیت ۔

چیرمین زاھد بلوچ پہ وتی گل ( تنظیم ) ءِ کارانی ھاترا پہ شال ءَ شُت ناشر کاریں پاکستان ءِ یزیدیں لشکر ءَ 18 مارچ 2014 ءَ چست کرت ءُ گار ءُ بیگواہ کرت داں روچ ءِ مرچی گار ءُ بیگواہ اِنت ۔اے گپّ ءَ من سدّکاں انسان دوست گار ءُ بیگواہ نہ بنت۔ چیرمین زاھد بلوچ ءِ پنت سنگتانی ھُوسِلہ ءُ ھمت اِنت کہ راج ءِ رھشونی ءَ کنت۔ چیرمین زاھد بلوچ ءِ جھد پہ بلوچ راج ءُ دگنیا ءِ ھاتر ءَ انسان دوستی ءِ چیدگ اِنت کہ مُدام گِندگ بیت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔