مھرنگ بلوچ – سرباز وفا

41

مھرنگ بلوچ

نبشتہ کار: سرباز وفا

دی بلوچستان پوسٹ

جُنز ھما شے اِنت کہ ھکّ ءُ راستی ءَ گشان کنت ، ہرشے ءَ نبشتہ کنان کنت ، شر ءَ شر گُش اِیت ءُ ھراب ءِ ھرابی ءَ پدّرکنت ۔ ہرکسی کرد ءَ چو ساپ ءُ پلگاریں آدینک ءَ پیش دار اِیت ۔ راجی جنُزانی تَہ ءَ ہرکسی یک کردے بیت ، راجی جنُز ءِ تہ ءَ کساں مزن ، مرد ءُ زالبول ، زھگ ، پیر ءُ کماش ہرکسی کردار ءُ داتگیں دیمھونی وتی وتی رنگ ءُ دْروشم ءَ پجّارگ بنت۔ راجی جنزانی تہ ءَہر یکّے وتی وس ءُ واک ءَ پہ وت ءَ یک نام ءِ کٹّیت ۔ جنز وتی تہءَ ہرکس ءَ ھوار کنت ، چونائی ءَ کسانیں زھگاں گم ءُ پریشانی ، زمہ واری نہ بیت ۔ مُدام گوں وتی لیب ءُ گوازی ءَ دلگوش بنت، بلے راجی جنُز کسانیں زھگاں وتی بہر جوڑ کنت ءُ زالبولانی یک بلائیں کردارے بیت ۔ وھدے ما چاراں جنُز ھمنچو دیم ءَ روان کنت ہرکس ءَ گون وت بران کنت ۔

کربانی مردم ءَ راجی جنز ءِ تہءَ وت وژنام کنت ۔ راجی جنُز مردم ءَ را بازیں کاراں سرپد کنت ءُ آشوبے کار اِیت۔ آشوب راج ءَ شیوار ءُ مُھکم کنت، جنُز ءِ مھکمی چہ کسانیں زھگانی مھکمی ءَ پدّر بیت کہ کسانیں زھگ راج ءِ باندات ءُ رُژنائیں چراگ اَنت۔ وھدے ما بلوچ راجی جنُز ءِ سر ءَ چمشانک دئیں ءُ چاریں بلوچ راجی جنُز ءَ وت ءَ مھکمیں رنگے ءَ دیم ءَ آرتگ ءُ دگنیا ءِ دیم ءَ پیش داشتگ ۔ بلوچ ءِ چہ پیرءُکماشاں بگر داں کسانیں زھگ ھمے بلوچ راجی جُنز ءِ بہر جوڑ بوتگ ءُ مھکم انت۔ ہر وڑیں کربانی ءِ دَیَگءَ چکّ ءُ پد نہ بنت۔ اے مئے بلوچ راجی جنُز ءِ سوبمندی اِنت کہ بلوچ ءِ کسانیں زھگاں دگنیا ءَ را ھمے پیش داشتگ ما چہ کربانی ءِ دَیَگ ءَ لگور ءُ پَدگَرد نَہ بَہ اِیں ۔

بلوچستان ءِ تہءَ شال ھما سارتیں جاہ اِنت کہ شال ءِ تہءَ سارتی ءَ نندگ نہ بیت، بلے مھرنگ بلوچ ھما سارتی ءَسرءَ کپتگ۔۔۔۔۔۔۔ ماماکدیر بلوچ ءِ بُنجل ءَ شال ءِ ھمے کہرمانیں سارتی ءَ برداش کنگءَ اِنت پہ وتی پس ءِ آجوئی ءَ ۔ سئے ماہ ءَ گیش انت نشتگ ۔۔۔۔۔۔۔۔ وھدے ما چاراں گْوستگیں روچ ءِ ھور ءُ سارتی ءِ سرءَ نشتگ اَت گوں ھمت ءَ ھمے گپ ءَ کنگ ءَ اَت داں منی پس گوں وتی سنگت ءُ کُل بیگْواھئں بلوچ پُسّگاں آجو نہ بوتگ من ھچ وڑا وتی زھرشانی ءَ ھَلاس نہ کن آں ۔ مھرنگ بلوچ وتی پس ءِ جدائی ءَ گِند اِیت آئی ءِ بْراس سنجر جان ھمے چہ زوراکیں سارتی ءَ نادراہ اِنت۔۔۔۔۔۔ آئی ءِ ماس زبیدہ بلوچ ءِ تب ھم وش نہ اِنت۔ یک نیمگے ءَ شال ءِ سارتی ۔۔۔۔۔۔ دومی نیمگ ءَ نادْرائی انگت ھما کساں سالیں مھرنگ گیشتر مھکم ءُ پُر ھاٹیگیں توکلے ءِ دْرشان ءَ کنت۔

مھرنگ بلوچ بی ایس او آزاد ءِ مرکزی کمیٹی ءِ باسک نسیر بلوچ ءِ زھگ اِنت کہ 15 نومبر 2017 ءَ پاکستان ءِ پوج ءُ آئی چیریں ادارھے کارمندان چہ کراچی ءَ بیگْواہ کتگ۔ نسیر بلوچ ءِ ھمراہ بی ایس او آزاد ءِ مرکزی کمیٹی ءِ باسک ھسام بلوچ، مرکزی کارگشاد ثناہ اللہ بلوچ، بی این ایم ءِباسک رپیک بلوچ ءَ ھوار چست کرتگ اَنت۔ھسام بلوچ آجو بوتگ آدگہ انگت بیگواہ اَنت۔ چہ نسیر بلوچ ءِ بیگْواھی ءَ مھرنگ بلوچ گوں وتی بْراس سنجرجان ءَ درکیت ءُ شال ءِ کہرمانیں سارتی ءَ پہ وتی پس ءُ گار ءُ بیگواھیں مردمانی ھاترا جھُد کنگ ءَ بندات کنت داں منی پس ءَ گوں سنگتاں آجو کن اِت ۔ روچ پہ روچ آئی ھِمت مھکم بُْوھان اِنت۔ اے پہ بلوچ راجی جنُز ءَ یک بلائیں مھکمی یے۔۔۔۔۔۔۔ ایوک ءَ مھرنگ بلوچ نہ بازیں زھگ ھمے رنگ ءَ اوشتاتگ اَنت کہ آھانی تہ ءَ علی حیدر، مھلب ، بیورگ ، میراس جان دگہ باز ھوار اَنت ۔ بلوچ ءِ کسانیں زھگانی کربانی مئے بلوچ راجی جنُز ءِ سوبمندی ءِ نشان اِنت۔ کسانیں زھگاناں کتاب ءِ بدل وتی پسانی اَکس گون انت ۔ اے دژمن ءِ پروش ورگ نہ انت دگہ چے بہ بیت، داں چُنت روچ ءَ دگنیا وتی چماں بند کنت ۔مھرنگ بلوچ ءِ ہر روچ ءِ پریات ءُ دستبندی کنگ الم ءَ دگنیا ءِ انسان دوستاں یک روچے چہ واب ءَ پاد کنت داں بلوچ ءِ توار ءَ گوش بدار اِیت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔