گوادر ءِ بندر ءُ مئے باندات – شھید غلام مھمد بلوچ – ظہور فضل

57

گوادر ءِ بندر ءُ مئے باندات

نبشتہ کار: شھید غلام مھمد بلوچ

پولکار: ظہور فضل

دی بلوچستان پوسٹ

چاکر ءِ داتگیں میراث دگرانی دست ءَ انت بلے انگت پہ بلوچ ءَ چیدگ انت ۔ حمل ءِ دزگیری پہ پرتگیزیاں مستریں سوب ءُ شادہ اَت۔ بلے بلوچ ءِ بندن پہ پرتگیزیاں سوب مندی ءِ نشانے ماں راج دپتراں نکش نہ بیت ۔ ءُ ناں گنجیں زر ءِ کہریں چول پہ حمل ءِ دعوی ءَ ایرموش بیت انت بلکیں پہ راجی ننگ ڈیھ ءُ ڈگار ءُ نیلیں زر ءِ پہریزگ ءَ شاتکامی ءِ چاپ ءُ ھالوانی مست ءُ جہان جسکیں بہارانی نمیرانی چیہال ءِ دروشم ءَ جکس ات ۔ دومی تک ءَ اے کنگریں راج ءَ عرب ، فارس ءُ اوغان ءِ اُرشانی گورگندانی دیمپانی ھم کتگ ۔

مروچی پدا راج ءِ پُسگاں بلوچ راج ءِ زر ءُ سرڈگار ءِ پہریزگ پانک جتگ ءِ جنجال ءَ گپتگ ۔ عہدیگیں میان استمانی جہانگیریں کشاّں چیل بنجاہ ماں اے دمگ ءَ ھم زر ءُ سرڈگار ات کہ آ چست ءُ ایرانی تہا برطانیہ ، جرمنی ءُ روس ءِ ” گریٹ گیم ،، ءَ نام کشگ ات آ روچانی گچین پہ قوتان ھم بلوچ سرڈگار اَت ، پمیشا کہ چاگرد ءِ بنیاد پرستی ءِ اثراں دارگ ءِ واستہ بلوچ آزاد حیالیں تب عرب ، فارس ءُ اوغان ءِ سیمسراں داشت کنت
بلے ھمے واکانی نیام ءَ 1921 ءَ تپاکی معاہدے ماں ایران ءَ کنگ بوت کہ واکانی نپ ءُ پائیدگ ھچ تاوان دئیگ نہ بیت ۔ پدا ھمے سوب ات کہ 1928 ءَ مغربی بلوچستان ءِ سر ءَ بہر کنگ بیت انت ۔
وھدی صورت ءَ سارت کپتگیں جیڑہ مرچی پدا ھم ،، گریٹ گیم آپ انرجی ،، ءِ نام ءَ برانز گپتگ۔

یک رندے پدا جہان ءِ واکانی دیم ءَ بلوچ زر ءُ سرڈگار ءِ حاجت مستریں سوال جوڑ بوتگ ۔ یازدہ دسمبر ءِ واقعہ ءَ پد ماں افغانستان ءُ طالبان ءُ القائدہ بنیادپرستی ءِ کلات ءِ پروشگ ءَ جہانی قوتانی ارش برگ ءُ وسطی ایشیا ءِ تیل ءُ گیس ءِ ذخائرانی کارمرز کنگ ءُ دمگ ءَ بنیاد پرستی ءِ ولگوج کنگ ءَ پہ بلوچ ءِ زر ءُ سرڈگار مستریں کردارے جوڑ بوتگ ۔ ھمے رد ءَ گوادر پورٹ ءِ کوھنیں ءُ کرنیگیں حیال ماں راستیں دروشمے ءَ مئیگ ءُ شمئے دیم ءَ اتکگ۔

گوادر پورٹ ترقی ءِ مستریں ڈاھے کہ ہر دمگ ءَ جکس اتگ ، بلوچ ءِ سیاسی سماجی ، راجی ھست ءُ چرئے ترقی ءِ بنگاہ چے پائدگ رسیت ءُ چے تاوان ہر بلوچ ماں ھمے پگر ءَ تکانسر انت ۔

بلوچ ءِ مرچیگیں پجار دزگیر ءُ ایردستیں راجی رنگ ءَ ھست انت ، اے ترقی زبہر ءُ لگتمالیں راج ءَ چہ ملک ءِ ھاکمانی کست ءُ کینگاں آماچی ءَ چون رکین ایت ، روزگار ، تجارت زمین ءُ بلوچ ءِ آبادی ءَ چون وتی دست ءَ آرگ بہ بیت ۔
روزگار پہ بلوچاں ، تجارت پہ بلوچ ءَ ، زمین ءِ ملکیت بلوچ ءِ بہ بیت دری مردمانی جہمنندی ءِ راھاں بند کنگ بہ بیت ، چیزے بلوچ ءِ اُگدہ انت ءُ چیزے سرکار ءِ زمہ واری انت ، آوکیں بدلیانی سر ءَ چم سک کنگ بہ بیت ءُ زانگ بہ بیت کہ باندات چے بیت ۔ میان استمانی واکانی تماہ بے انت ، پہ بلوچ ءَ آہانی ایجنڈہ ءِ تہا نپ ءُ پائیدگ است یا تاوان ، وھد ءِ لوٹانی پہمگ ءَ بلوچ راج ءِ زندگ دارگ سما اگں بلوچاں بہ بیت تہ بلوچ ءَ ھم واک ءُ آوکین بدلی تاوان دان نہ کن انت ۔۔۔۔

ماہتاک سچکان گوادر جون 2006 ءِ منت ءَ

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔