براہوئی زبان ءُ دژمن ءِ پَندل – ھلیل بلوچ

72

براہوئی زبان ءُ دژمن ءِ پَندل

نبشت – ھلیل بلوچ

دی بلوچستان پوسٹ

“بلوچی ءُ براہوئی مئے شہدیں زبان اَنت”
“دنیا ٹی اندا نشان ءِ ننا
بلوچی براہوئی زبان ءِ ننا”

من ھما کہ سر زُرتگ اے دانک من اشکُتگ انت ھما اِنت کہ گوں لبزانک ءَ ھمگرنچ بوتگاں گُڑا بلوچی ءُ براہوئی ءِ آزمانک، کسمانک، ڈرامہ ءُ دومی کِسّہانی توکا ھِچ وڑیں جتائی یے منی دیم ءَ نہ گوستگ پرچہ کہ اے کِسّہانی کارستانی دودربیدگ، ورگ وپسگ، پُچ پوشاک ءُ زِند گوزینگ یکیں وڑا بوتگ اَنت… وھدے ما دگنیا ءِ دومی راجانی آزمانک ءُ ناولانی پِلاٹ بچاریں گُڑا مارا یک مزنیں دِگَری یے گِندگ ءَ کئیت پرچا کہ آھانی دود ربیدگ، ورگ وپسگ، پُچ پوشاک اچ ما جتا انت…
نی ما کائیں وتی اَسلیں بُنگَپ ءِ نیمگ ءَ کہ لھتیں روچ پیسر میر امین رئیسانی نامیں مردے ءَ کہ وتا براہوئی قومی اتحاد ءِ چیرمین گْوشیت 5 اپریل ءَ براہوئی دودربیدگ ءِ روچ ءِ دارگ ءِ جار جتگ…
اے مرد ءَ من وت نزاناں ءُ ناکہ پیسر ءَ نام اِشکُتگ بلے اے جار وت اے مرد ءَ مشکوک کنگ ءِ ھاترا بس اِنت…
یک گَپے زانگ بہ بیت کہ یک راج ءِ یک زبانے بوت کنت بازیں راجانی باز زبان ھم بوت کن انت، ءُ ادا اے گپ ءَ ھر کس زانت ءُ سرپد اِنت کہ براہوئی ءُ بلوچی بلوچ راج ءِ مسترین زبان اَنت… اے گَپ راجدپتر ءَ پدّر اِنت.
بلے اے وھد ءَ کہ تیوگیں بلوچستان زورآور ءِ زوراکیانی دیمپان اِنت ءُ بلوچ راج زورگیریں لشکر ءِ دیم ءَ چو کوہ البرز ءَ اوشتاتگ ءُ وتی ڈیھہ ءِ رکھینگ ءِ ھاترا جہد کنگ ءَ اِنت، ریاست وتی ھاترا گیگ گندگ ءَ نہ اِنت، گڑا بلوچ راجی جہد ءَ کمزور کنگ ءِ ھاترا ھر وھد جتا جتائیں پندل سازیت، چوکہ پیش ءَ نمازی زِگری ءِ پندلے سازاتگ مرچی بلوچی براہوئی ءِ پندل ءَ سازگ ءَ اِنت بلے انچو کہ بلوچ راج پیسر ءَ دژمن ءِ پندلاں سرپد بوتگ مرچی ھم دژمن ءِ پندلاں سرپد اِنت.
بلوچ راجی جُنز ءِ تہا اے وھد ءَ ہزاراں بامرداں وتی سر داتگ، راجی شہیدانی ھونانی نیام ءَ ما چتور کِشک یے کَش اِت کنیں کہ راجی جُنز ءِ چَپ ءُ چوٹیں رُنگراھانی سکّی ءُ سوری اِش ھواری ءَ سگ اِتگ ءُ یکیں سنگر ءِ تہا دژمن ءَ گوں جنگ اِش داتگ ءُ شہید بوتگ اَنت.
مروچی اگاں کسّے بَئیت مارا زُبان ءِ نام ءِ سرا بار ءُ بانگ بکنت گُڑا ما چہ دگنیا ءِ رِپک ءُ ھُنراں چتور وتی ڈیھہ ءَ رکھینت کنیں.
گُڈسرا من چہ بلوچ راچ ءِ ادیب، زانتکار ءُ کوّاساں دزبندی کناں کہ اے مسئلہ ءِ سرا وتی چُپّی ءَ پْروش انت ءُ راج ءَ سرپدی بدینت اگاں نا اے چُپّی مئے سرا گار کنت.
بلوچ راج زندگ ءُ آجو بات
بلوچی براہوئی است بات اَنت.

دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔