اُستاد مدام مئے رھشونی ءَ کنت
نوہان نور بلوچ
دی بلوچستان پوسٹ
من زان آں تو مرچی سکّ گَل ءُ شات ئے کہ من یک بلوچ راجی رھشونے شھید کُتگ, بَلے تو کدی اے نہ جیڑ اِتگ کہ چُشیں دگہ ھزاراں رھشون ھمے کاروان ءَ ھوار اِنت ءُ پہ تئی آس دیگ ءِ واستہ.
مرچی دگہ ھزاراں پرزند بلوچ راجی آجوئی ءِ جُھد ءَ ھوار اِنت ءُ مدام پہ سرڈگار ءِ آجوئی ءِ واستہ وتی سرانی ندر کنگ ءَ ساڑی اَنت.
مرچی تو اے شاتکامی ءَ مہ کن کہ من اُستاد اسلم بلوچ ءَ گوں سنگتاں شھید کُتگ، نوں بلوچ راجی جُنز ھتم بیت یا بلوچ راج چہ وتی آجوئی ءِ جُنز ءَ دست کش بیت یا چہ شھیدانی کاروان ءَ دست کش بنت. تو اے گپّ ءَ چہ وتی مجّگ ءَ بہ کش پرچاکہ نوں تئی مرگ نزیک اِنت.
مرچی بلوچ راج پُرسیگ نہ اِنت، بلکینہ سر بُرز ءُ بلند اِنت کہ شھید واجہ اسلم پہ یک ازیمیں لوٹے ءَ شھید بوتگ مارا یک ازیمیں راھے سوج داتگ.
شھید اُستاد اسلم یک فکر ءُ نظریہ ءِ نام اِنت. اُستاد بلوچ راجی اُستاد اِنت تاں مھشر ءَ بلوچ راج ءِ رھشونی ءَ کنت ءُ مدام مئے اندر ءَ ساڑی بیت.ھاں تو مئے اُستاد ءَ را مئے چمّانی دیم ءَ دور کُتگ، بَلے تو اُستاد ءِ ھما داتگیں سوج ھما پیشداشتگیں راہ تو دور کُت نہ کُتگ ءُ نہ دور کُت کن ئے.
مرچی بلوچ راج پُرسیگ نہ اِنت بلوچ راج ءَ چِد ءُساری ھم چُشیں گم دیستگ آ شھید نواب اکبر ھان، شھید بالاچ مری، شھیدداکتر ھالد بلوچ، شھید گلام مھمد بلوچ، شھید لالا منیر بلوچ، شھید شیر مھمد بلوچ، شھید داکتر منان بلوچ، شھید رزا جہانگیر بلوچ، شھید چیرمین سھراب بلوچ ءُ دگہ ھزاراں رھشون چہ وتی چمّانی دیم ءَ شھید بوگ ءَ دیستگ بَلے بلوچ راج ءَ وتی ھمت ءُ توکل دور نہ داتگ بلکینہ ھمے عہد کُتگ کہ ما شھیدانی ھوناں ءُ چہ شھیدانی لوٹ ءَ دست کش نہ بہ اِیں بلکینہ شھیدانی کاروان ءَ مِنّزل ءَ سر کن اِیں.
مرچی تو شھید اُستاد اسلم بلوچ ءَ گوں سنگتاں شھید کُتگ کہ پدائیں مجید بریگِیڈ ءِ کاروان ءَ اوشت ءِ آماچ بیت، اے تئی یک وابے بیت ءُ بوتگ مرچی شھید مجید بریگیڈ ءِ نرمزار ءُ بلوچ راجی کاروان ءِ کامریڈ گیشتِر مھکم ءُ جزبہ وتی توک ءَ پیداک کُتگ ءُ تئی واستہ آس جوڑ بنت ءُ تئی ھستّی ءَ چہ اے ماتیں سرڈگار ءَ گار ءُ بیگواہ کن اَنت.راجی جُنز ءِ کاروان ءِ نرمزار پہ شھید بوگ ءَ گار نہ بنت بلکینہ دو کام دیم ءَ رو اَنت.
تو مرچی ھزاراں بلوچ پرزند زندانی کُتگ ھزاراں بلوچ پرزند شھید کُتگ بَلے کاروان پُشت ءَ نہ کپتگ بلکینہ گیشتر تونگر ءُ مھکم بوتگ اے کُل تئی دیم ء اَنت ءُ تو ھرچی آس ءُ آس گواری، زلم ءُ زوراکی بکن بَلے اے کاروان اُوشت ءِ آماچ نہ بیت پرچاکہ اے راجی جُنزے اے شھیدانی کاروان اِنت. اے لب ءُ لالچی کاروانے نہ اِنت، اے کاروان پھک ءُ پلگاریں کاروانے، اے کاروان ءَ را شھیداں گوں وتی پلگاریں ھوناں ساپ کُتگ گُڑا تو چوں اے کاروان ءَ ھتم کُت کن ئے، اے کاروان چہ تئی وس ءُ واک ءَ ڈنّ اِنت.
تو کدی راجی جُنزانی بابت ءَ ونتگ؟ تو کدی آجوئی ءِ جنگ کُتگ؟ تو کدی شھیدانی کاروان ءَ ھمراہ بوتگ ئے؟ تو کدی شھیدانی ارزشت ءَ زان ئے؟ تو کدی شھیدانی کاروان ءِ ھمراھانی ھمراہ بوتگ ئے؟ تو کدی سرڈگار ءِ مھر زانتگ؟ تو کدی شھیدی ءِ مول ءُ مراد ءَ سرپد ئے؟
منی ھیال ءَ تئی پسّہ اِنّاں بیت، پرچاکہ تو چہ اے کُل چیزاں زِبَھر بوتگ ئے ءُ تاں مھشر ءَ زِبَھر بہ ئے، پرچاکہ تو یک دہشتگردیں ٹولی یے ءُ دہشتگرد ٹولی چہ اے کُل چیزاں زِبَھر بنت پرچاکہ ایشانی لوٹ دگر بنت انچوش کہ زر، لب ءُ لالچ، بدکاری، کُشت ءُ ھون، زلم ءُ زوراکی، مات ءُ گھارانی لجّانی سر ءَ دور کنگ، دومی ءِ ھکانی ورگ ءُ دگنیا ءِ تہ ءَ وس واسی ودی کنگ تئی لوٹ ھم ھمیش اِنت ءُ ترا پہ انچوشی ءَ دیم ءَ آورتگ.اگاں ترا انگت کہ باور نہ بیت گُڑا ترا من انگت یات دَے آں تو 27 مارچ 1948 ءَ مئے( بلوچ راج) ءِ سر ءَ اُرش کُت مئے مال ءُ مڈیاں ھوار مئے زمین ھم بُرت ءُ مئے برات شھید کُت اَنت. مئے مسِیت ھم شھید کُت گُڑا انگت تو ساپ ءُ پلگار ئے؟ منی ھیال ءَ تئی پسّہ پد ءَ ھما بیت ءُ تو نوں سکّ چم جھل بوت ئے۔
شھید اُستاد اسلم گوں سنگتاں ھما شھیدانی وارث اِنت ءُ ھما کاروان ءِ ھمراہ اِنت ءُ ھمے ماتیں سرڈگار ءِ پرزند اِنت کہ تو پہ زور دزگیر کُتگ، شھید اُستاد ءَ مرچی ھما سرڈگار ءِ سبز ءُ آباد کنگ ءِ واستہ وتی تنگوئیں بچ ءُ وتی جان پہ ھمے سرڈگار ءَ ندر کُتگ.
مرچی دگہ ھزاراں ماتانی بچ اُستاد ءِ کاروان ءِ ھمراہ اِنت پہ ھمے سرڈگار ءِ آجوئی ءَ بَلے ترا پہ زندگی نوں ماس اِنت پرچاکہ مرچی بلوچ ُپسّگاں گلامی ءِ درد ماراِتگ مرچی بلوچ پرزند وتی نیک ءُ بد ءَ زان اَنت پرچاکہ راجی شھیدانی رھشونی ھمراہ اَنت اِش.
مرچی شھید اُستاد اسلم مئے رھشونی ءَ کنگ ءَ اِنت ءُ اُستاد گوں سنگتاں نمیران اِنت.
بلوچ راجی شھیداناں سُھریں دروت
بلوچ راج گوں بلوچستان ءَ زندگ بات
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
