گھار سیما ءُ ھزاراں بلوچ گار و بیگوائیں ءُ شھیدیں سرانی کہول ءِ درد – ایس ڈی بلوچ

67

گھار سیما ءُ ھزاراں بلوچ گار و بیگوائیں ءُ شھیدیں سرانی کہول ءِ درد ۔۔۔

نبشتہ کار: ایس ڈی بلوچ

دی بلوچستان پوسٹ

درد چی اِنت ؟

درد یک انچیں چیزے کہ پہ نبشتہ ءُ پہ زُبان ءَ گُشگ نہ بیت
درد وت وتارا پیش داریت۔

ترا میار ھم نیست منی واجہ تو نا درد ماریتگ ءُ نا درد بیتگ یے ۔۔۔
جُست گِر ھماھاں کہ ورنائیں بالادے تہا سیاھیں پوشاکانی تھا درد گند اَنت ۔

جُست گِر ھماھاں تنیگت ءَ نزان اَنت کہ ما جنوزامیں یا مئے مردین واتر کئیت۔۔۔

جُست گِر ھماھاں کہ بندیگیں براتی ءِ شوھازگ ءَ دگانی سرا پریس کلبانی دیم ءَ کوکار ءَ اَنت گریوگ ءُ زاری ءَ اَنت کہ کُجیں مئے لوگ ءِ چراگ ؟؟؟

کُجا بندیگ کُتگ کُجا کُشتگ ءُ دور داتگ ؟
جُست گِر ھما ماتاں کہ ورنائیں بچانی تیر سُپتگیں لاشاں پہ سوت ءُ نازیک گُڈی واب جاہ ءَ سر کن اَنت۔۔۔

جُست گِر ھما زھگاں کہ کسانی ءَ چہ پِت ءِ تیر سُپتگیں لاشانی اکساں چار اَنت ءُ مزن بنت ۔۔۔

جُست گر ھما زھگ، مات ءُ گھار ءُ کماشاں کہ لوگانی تہا چمانی دیم ءَ دگانی سرا تو ورنائیں زھگ لَٹ ءُ کُٹ کُتگ ءُ چست کُتگ بُرتگ اَنت ۔۔

ماہ ءُ سال ائید، وشی ءُ سکی گوز اَنت بلے آ زھگے ھال ھم نیست کہ زندگیں یا مُرتگ۔۔

درد انسان ہما وھد ءَ بیت کہ انسانیت ءِ لگت مالی ءَ بہ گندیت بلے منءُ تو؟

مرچی مئے مات ءُ گُھار دگانی سرا پرچا پریاتی آں؟

ورنائیں برات گرگ برگ بوتگ پہ کئے ءَ ؟
ورنائیں برات سالانی سال زندانی اِنت پرچا ؟

ھر روچ مارا دگہ دگہ گُھار گندگ ءَ کئیت کہ دگانی سرا اکس اش دست ءَ اَنت گریوگ ءَ اَنت چی ءَ ؟

براتانی کماشانی کسان سالیں زھگانی تیر سُپتگیں لاش مئے چمانی دیما کُشگ ءُ دور دیگ بوگ ءَ اَنت پرچا ؟

مئے گھُار چہ تئی ھاموشی ءَ گریوگ ءَ اَنت ترا سما اَست؟

گُھارانی لاڈوکیں برات کُشگ گِرگ ءُ برگ بوگ ءَ اَنت ترا سما است؟

ماتانی چمانی چراگ چہ ماتاں پُلگ بوتگاں پرچا ترا سما است؟

پیریں پتانی پیری ءِ ھساء چمانی دیما لٹانی تیر ءُ تُپنگانی دیمپان کنگ بوتگاں شھید کنگ بوتگاں گرگ ءُ برگ بوتگاں پرچا ترا سما است؟

لوگانی لوگ سوچگ ءُ پُر کنگ بوتگ اَنت پرچا ترا سما است؟

بازارانی بازار لڈینگ بوتگ اَنت جنین چُک، مات ءُ گھار کسانیں زھگ سَراں ولی کُتگ اَنت چہ وتی لوگ ءُ جاگہاں پرچا ترا سما است؟

مات تلوس اَنت کور اَنت پہ ورنائیں زھگانی گندگ ءَ بلے بدواھے تُرس ءَ مات چُکاں چاریت نکن اَنت چُک ماتاں پرچا ترا سما است؟

ترا کہ ھچ چیز سما نیست گُڑا تو چے بیزانے زمین ءِ درداں مات ءِ درداں تاسُپیں گُھارانی چوروئیں زھگانی درداں .

من پیسرا گُشتگ اَت درد نبشتہ کنگ نہ بنت،
درد پہ زُبان گُشگ ہم نہ بنت،
بس ترا سما بوگی اِنت۔۔۔۔۔

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔