خڑینکاک حوصلہ بشخار – فریدہ بلوچ

45

خڑینکاک حوصلہ بشخار 

فریدہ بلوچ

دی بلوچستان پوسٹ 

اینو آن دئے (10)دے مُست شال ئنا سُو تڑوکا یخ اٹ پریس کلب نا مونا بے گواہ بلوچ مخلوق کن بین ہڑتالی کیمپ اٹ اسہ مُتنکو کُوک اس اسیکہ وا بش مس و بلوچ خلقت تون اوار تیوی جہان ءِ لرزفے، اندنُو چیہانٹ ئس ہرانا بننگ تون بدن نا پُٹ آک جِک مسُر، اُست آک دڑد آن سینہ ٹی جاگہ کننگ کتوسو گُٹ آن پیشن مننگ نا کوشست ئٹ ساہ بند مننگ آ بس۔

سیما بلوچ نا تموکا خڑینکاک بیرہ شبیر بلوچ کن اَلور بلکن دا خڑینکاک بلوچستان آن بے گواہ مروکا ہزار آ بندآتیکن ئسر، دا خرینکاک بے بندغی نا خلاف ارفوکا برانز ئسر، دا خاچوکا خلقت ءِ بش کننگ کن ئسر ۔ سیما نا خڑینکاک بلوچ خلقت تون اوار ہمو بے گواہ مروکا بندغ آتا مخلوق ءِ ہم حوصلہ بشخار ہرافک بھاز آ سال آتیان تینا اُرا تیٹی تولوک خرینک خلنگ ئسر ولے بے اُمیتی نا سوب تینا دڑد ءِ کس تون بیان کننگ کتؤرہ۔

سیما بلوچ ، ماما قدیر نا رہی آ تینہ نشار تون اوار بس ولے اینو بھاز آ بے گواہ مروکا بندغاک آتا مخلوق اسہ اُمیت اس خنیسہ دا کیمپ آ بسونے و جہان ءِ تینا دڑد ءِ بنیفنگ ءِ۔ ای رد مفروٹ اگاں ای دا پاؤ کہ دا تیوہ غا مخلوق ءِ حوصلہ بشخوکا سیما ءِ۔

دا خڑینکاک کوئٹہ آن ہلیس ڈیرہ غاذی خان، پشاور، کراچی ، اسلام آباد و لاہور اسکان مخلوق ءِ حوصلہ بشخار ءُ اوفتے بے وس کریر کہ او بش مرور توار ارفر۔

سیما تون اوار بے گواہ مخلوق نا توار بھلو کچ ئسے اسکان تالان مسے ولے دائسکان بھازا خواست آک اریر ہرافتے پورہ کروئیءِ، دائسکان بھازا بے حس آتے تغان بش کروئی، دائسکان ہزار آبے گواہ تا خاہوت آتے پیشن مروئی دا بے دادی نا خلاف توار ارفوئی ءِ۔ دائسکان بلوچستان پارلیمنٹ اٹ تولوکا نام نہاد بلوچ خیر خواہ تا ضمیر ءِ زندہ کروئی۔

ایلو پارہ غان دا وختا ڈنی ملک آتیٹ تولوک مخلوق نا ہم ذمہ واریک زیات مریرہ کہ اوفک بلوچ بے گواہ تیکن توار ارفرءُ جہانی ادارہ غاتے دا بابت سوچ خلنگا بے وس کیر کہ دا انسانی ویل ئسے۔، اندن اینو نیٹ و سوشل میڈیا نا کرن ئٹی دا بابت زیات آن زیات کاریم نا خواست ءِ ہرافتے بلوچستان و پیشن آتولوک آک مخلوق ءِ پورہ کروئی ءِ۔

اینو ہرا کچ ئٹی بلوچ بے گواہ تا مخلوق نا بابت توار ارفنگسہ ءِ بلکن دوارہ دُنو وخت بف، دا توار ءِ پد تمنگ کن ہلوئی اف دادے مستی دروئی ءِ و دانا ننا تیوہ غاتا ذمہ واری ءِ کہ دا توار تون اوار تینا توار ہمراہ کین۔الّم نن سرسہب مرون و تینا بے گواہ مخلوق ءِ واپس تینتون اوار خنون۔

دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک.