اُستاد عبدالستار بلوچ ءِ یات ءَ مراگش _ اسحاق خاموشؔ

840

اُستاد عبدالستار بلوچ ءِ یات ءَ مراگش

اسحاق خاموشؔ

دی بلوچستان پوسٹ

چہ مستاگ فاؤنڈیشن کراچی ءِ نیمگ ءَ بلوچی زُبان ءِ نامئیں گُشندہ ءُ زیمر کار اُستاد عبدالستار بلوچ ءِ یات ءَ یک مراگشے ماں پی ایم اے ہاوس کراچی ءَ 13 اکتوبر 2018 ءَبیگاہ ءِ چار بج ءَاُستاد فتح محمد نظر ءِ پاگواجہی ءَ برجم دارگ بُوت ۔دیوان ءِ ھاسیں مہمان بلوچی زُبان ءِ نامداریں شاعر ءُ نبشتہ کار اِسحاق خاموشؔ ءُ اُردو ءُ بلوچی ءِ نامداریں شاعر وحید نُور اِتنت۔
اے دِیوان دو بہرانی تہا اَت۔
یک ۔ گُشتانکی بہر
دومی۔ ساز ءُ زیمری بہر
گُشتانکی بہر ءِ تہا وحید نُور ءَ تْران کنان ءَ گُشت کہ اُستاد عبدالستار بلوچ ءِ بستار ءِ گوں لبزاں بیان کنگ گْران اِنت۔آئی ءَ بلوچی زُبان ءُ موسیقی ءِ ھزمت ھما وڑا کُتگ کہ تاں کرناں شموشگ نہ بیت۔اُستاد عبدالستار وتی پِڑ ءِ تہا یک جْوانیں بِستارے ءِ واھندات۔چُشیں کوہ بالادیں اِزمکارانی کِرد تاں کرنا ں یات کنگ بیت۔

اسحاق خاموشؔ ءَ وتی تْران ءِ تہا گُشت کہ اُستاد عبدالستار بلوچ بلوچی ءِ اوّلی اِزمکار اِنت کہ آئی ءَ پہ میدءُ جانشوانی ہاتر ءَ ” اَمبا“ ءِ وڑیں زیمر ءِ تَہر دیما آؤرت۔کوئٹہ ءُ زاہدان ءَ بگر تاں اوگانستانءُہندوستان ءَ اُستاد ءِ گُشتگیں ترز ءُ دُہناں نام در آؤرتگ۔چہ ریڈیو کوئٹہ،ریڈیوزاہدان،ریڈیو اوگانستانءُ ریڈیو ہندوستان ءَ آئی ءِ گُشتگیں شعر ءُ سؤت مُدام شِنگ ءُ تالان بُوتگ اَنت ءُ دُنیا ءِ کُنڈ کُنڈ ءَ نشتگیں بلوچانی دِل ءِ تہا نکش اش جوڑ کُتگ۔اُستاد، یک دل پہک ءُ دِل سپائیں اِزمکارے ات، آئی ءَ وتی اِزم وتی سینگءَ کلّ نہ کُت ، بلکہ وتی اِزم ءِ در بُرتگیں راہ ءُ رہبند تاں دگراں سر کُت انت۔ آئی ءَ تْران کنان ئَ گُشت کہ اُستاد چہ نوکیں سازءُ زیمرءِ تہرءُ رنگاں سرپد بوہگءَ اَبید چہ کلاسکلء موسیکءَ اوں باز زانتکارءُ سرپد ات۔ مرچی کہ کراچی ءِ سیءُ چلّ لکّ بلوچ آبادیءِ تہا مردُمانی تب گیشتِر گوں بلوچی سازءُ زیمرءَ نزّیک بوتگ ءُ بلوچی گوشدارگءَاِنت اے اُستاد ستّارءُ اُستاد شفیعءِ شپءُ روچءِ جُہدءُ کوشستانی سَوَب اَنت کہ آہاں ابید چہ لالچءُ تماہءَ کراچیءِ دمک دمکانی تہا بلوچی سِیری ءُ دِگہ مراگشانی تہابلوچی سؤتءُ غزل گُشتگ اَنت کہ ہمے سؤتءُ گانا پداکسانیں زہگ ، ورنا ،کماش ءُ جنیادمانی دپءَ بُوتگ اَنت کہ آہاں وت پدا مجلسءُ دیوانانی تہا گُشتگ اَنت۔اسحاق خاموشؔءَ گُشت کہ من گوں سد افسوزءَ گُشاں کہ اُستادءِ شاگِرداں چوش اُستادءِ وڑیں بودءُ کمال نیست۔من نہ گُشاں آ، ساز ءُ زیمر ءُ موسیقی ءَ نہ زان اَنت ءُ سرپد نہ اَنت ، من ہمے گُشاں کہ آہانی دِل چو اُستاد عبدالستار ءِ دِل ءَ مزن نہ اِنت۔وتی علم ءُ زانت ءَ تاں دِگر ءَ سر کنئگ ءَ کنجوسک اَنت۔ بلئے شاباش اِنت اُستاد شوکت مُراد ءَ کہ ماں کیچ ءَ بلوچستان اکیڈمی ءِ چیردستی ءَ ”اُستاد عبدالستار بلوچ کلب “ ءِ نام ءَ ساز ءُ زیمر ءِ یک ہیلکاری بُنجاہے جوڑ کُتگ ءُ بلوچی زیمر ءَ گوں ھُب داروکیں ورنائیں ساز ءُ زیمر ءِ رہبنداں ہیل دئیگ ءَ اِنت۔ ءُ ہمے ہیلکاری بُنجاہ ءِ نیمگ ءَ اُستاد شوکت مُراد ءَ ماں کیچ ءَ یک ّ ءُ دو مراگش ہم ٹہینتگ۔اسحاق خاموشؔ ءَ وتی تْران ءِ تہا گُشت کہ بائد اِنت کہ نام کشّ اتگیں گُشندہ اُستاد عبدالستّار بلوچءِ گُشتگیں سؤت ءُ غزلاں پدا بُگش اَنت ءُ ماں نِہادی بیار اَنت ءُ چریشاں ہرچ زرّے کہ رسیت آئی ءِ نام ءَ ماں کراچی یا بلوچستان ءَیک ساز ءُ زیمری ہیلکاری بُنجاہے بِزاں میوزیکل انسٹی ٹیوٹ یے جوڑ بکن اَنت۔اسحاق خاموشؔ ءَ بلوچی زُبان ءِ ازمکارانی بابت ءَ تْران کنان ءَ گُشت کہ مئے کِرّا ہمے اِزمکارانی حال گوں چمّاں چارگ نہ بیت۔ مئے کِرّا ہر روچ ہمے حال سر بیت کہ فلاں اِزمکار، شاعر یا گُشندہ نادْراہ اِنت ءُ مالی تنگدستی ءِ آماچ اِنت وتی اِلاج ءَ کُت نہ کنت۔ہر روچ ماں سوشل میڈیا ءَ آئی ءِ کمک ءِ جار پِرّینگ بیت۔تانکہ یک روچے وتی کپتگیں لوگ ءِ نپادانی سرا مرگ ءَ امبازیت ءُ پدا مئے ہما ہوادگ ءُ کْواپگیں لبزانی دِلپدردی۔

اے مراگش ءِ تہا زِند ءِ جتا جتائیں پِڑاں چہ سْیاد ی داروکیں مردُماں بہر زُرت چوکہ چئیرمین آف ہیومن رائٹس اسد بٹ، قاضی خضرؔ، یوسف مستی خانؔ،لالہ فقیر محمد،وش نیوز ئِ کارمستر احمد اقبالؔ، ڈائریکٹر وش نیوز اقبال بلوچ،روٹری کلب ءِ ٹیپو سُلطان،ڈاکٹر نور،ڈاکٹر شیرشاہ،سید عبدالعزیز آسکانی،رمضان بلوچ،ڈاکٹر نصیر بلوچ،ڈاکٹر داد جان، ڈاکٹر غلام جان بلوچ،گٗلزار گچکی بلوچ،گُل حسن کلمتی،ایوب جوکھیو،ظفر کریم ، اصغر علی آزگ،اختر بلوچ، ظفر اکبر،اُستاد خورشید بلوچ، ماجد مُبارک، بہادر جان،محمد بلوچ،عبداللہ موسانی،عبداللہ مینگل،پی ٹی وی ءِ حفیظ شیران بلوچ، خالد بلوچ ، عبدالواحد بلوچءُ رائٹ کونسل ءِ وہاب بلوچ ہوار اِتنت۔

دیوان ءِ پاگواجہ اُستاد فتح محمد نظر ءَ گُشت کہ اُستاد عبدالستار بلوچ یک دل پہکیں انسانے ات۔آئی ءَ گُشت کہ بائد اِنت کہ ما وتی زِندگیں ازمکارانی یات ءَ اوں انچیں مراگش برجاہ بہ داریں۔
ساز ءُ زیملی بہر ءَدیوان ءِدیما اُستاد غُلام محمد خانصاحب ءُ عابد ؔراز ءَ وتی اِزم درشان کُت۔۔
جارچینی ءِ ڈُبّہ شبیر حسین بلوچ ءَ گون اَت۔

گُڈسر ءَ مستاگ فاؤنڈیشن ءِ کارمستر ماھین بلوچ ءَ وتی تْران ءِ تہا دیوان ءِ اتکگیں مہمانانی منّت گِپت ءُ گُشت کہ مِستاگ مئے نہ انت ، مِستاگ مئے دْرستانیگ انت۔مِستاگ ئِ مول ءُ مُراد، زُبان ، لبزانک ءُ اِزم ءِ دیمرئی اِنت ، آئی ءَ گُشت کہ اگں شُمئے ھمراہ داری ءُ کوپگ گون بہ بیت تہ مِستاگ وتی کار ءَ ھمے وڑا دیما بران کنت۔