ماں کیچ ءَپہ ناکو سبزل ءَ ساز ءُزیملی مراگش ءَ اِزمکارانی اوست ءُ اُمیت مُہکم کُت – اِسحاق خاموشؔ

81

ماں کیچ ءَپہ ناکو سبزل ءَ ساز ءُزیملی مراگش ءَ اِزمکارانی اوست ءُ اُمیت مُہکم کُت
اِسحاق خاموشؔ

دی بلوچستان پوسٹ 

یک ھشت ءُ دہ سالے زھگے تربتءَ سیمی جماعتءَ وانگءَ اَت،یک روچےدگّءِ سرا سؤت جنان ءَ وانگجاہ ءَ رؤگءَ اَت۔ راجہ احمدخان آ وهدءَ تربتءِ کمشنر اَت ، آ گوں وتی سپاھیگاں ہمے کِشک ءَ گْوزگ ءَ ات۔۔ دیست ئِے کہ گْونڈویے بلوچی سؤتےوش الہانگ ءَ اِنت۔ وتی سپاهیگے پرمات ئےِ کہ اے گونڈوءَ بگر ءُ بیار، گُشت ئِے:” بچے کو پکڑ کر لاؤ“ ۔راجہءِ سپاهیگءَ آئرا گپت ءُ راجہءِ دستءَ دات، راجہءَ آئی ءِ ءُ آئی ءِپتءِ نام جُست کُت کہ کجا وانگائے ۔پدا آئی ءَ پنچ کلدارئےِ داتءُ یلہ ئےِ دات، دومی روچءَ راجہ ءِ سپاهیگ اسکولءَ آئی ءِ رندا اتک اَنت آئیءَ گوں وت ڈی سی اوءِ دپترءَ راجہ ءِ کِرا برُت اِش۔راجہ ءَ آئرا گُشت ” ڈرامہ بوهگءَ اِنت، تو ڈرامہ ءَ بهر بزورءُ سؤت بگش“۔

ہمے گْونڈو ءَ اولی رندءَ منشی نصیر آپسریءِ شعر گشت۔اے کساس 1960 ءِ زمانگ اَت کہ آئی ءَ کسان عُمری ءَ سؤت جنگ بِناء کُت۔ همے ڈرامہ آئی ءِاولی اسٹیج پروگرام بوت۔ پدا رندا باقی بلوچ ۔ فقیر محمدءَ آئیءَ گوں وت کراچیءَ برت ۔
ہمے کسانیں زہگ رُست ءُ مزن بُوت ءُ ناکو سبزل سامگی ءِ نام ءَ ماں دُنیا ءَ نامدار بُوت ءُ کساس ہشت ہزار ءَ بُرز بلوچی، سؤت، لاڑو، نازینک ءُ جتاجتائیں تہرءِ سؤت ئِے گُشت ءُ بلوچی زگریں زیمرئِ زیبائیں تہران ءَ ہر کُنڈ ءُ دَمگ ءَ تالان کُت۔

ماں سوشل میڈیا ءَ وَ مئے بلوچی اِزمکار، شاعر، گُشندہ ءُ اے دگہ پِڑانی زانوگر ءُ کوّاسانی جاور ءُ جیڑہ وہد وہد ءِ سر ا دیما کاینت، مالی تنگدستی، علاجءُ دگ دگہ جیڑہ۔۔۔ءُ پدا ہمے گْریوگ ءُ زارہانی تہا مئے ہمے اِزمکار چہ جہان ءَ وتی دیما ترّین انت ءُ دگہ دُنیا یےءَ رؤنت ۔ہچ نہ بیت۔۔ پدا مئے دلپدردیانی ہوادگیں دانکانی درشانی۔

لہتے وہد ءَ پیسر ماں آرٹس کونسل کراچی ءَ دود ءُ ربیدگی روچ ءِ مراگشے ءَ ، ناکو سبزل منی کش ءَ نشتگ اَت۔ من اَنچو پہ حال پُرسی ءَ جُست کُت کہ ” ناکو چون ئے تو“۔

گوں ہمے جُست ءَ گُشئے من چہ آئی ءِ کوپگاں گْرانیں بارے ایر گیتک۔ ناکو ءَ وتی نہ گیٓگیں جاور ءُ جیڑہانی کِسّہ ءِ گْرنچے بوتک ءُ منی دیما ایر کُت۔
نادْراہی،نِزوری، زمین ءُ جاگہانی چہ دست ءَ پچ گِرگ ءُ باریں کُجام کُجام بے وسی ءِ کِسّہ ۔۔۔ منی دِل گْریوگ ءَ اَت۔

من ءَ گُشیت کہ ” وش ٹی والہاں بُگش ، من ءَ زرّ نیست ، من پریس کانفرنسے کناں وتی اے سجّہیں گپّاں گُشاں“
من ہؤ کُت بلئے دومی روچ ءَ ناکو کیچ ءَ شُت۔
لہتے ماہ ءَ پیسرمہروانیں گُلزار گچکی ؔ ءُ آئی ءِ سنگتاں ماں سوشل میڈیا ءِ جتا جتائیں گروپانی تہا جار پِرّینتگ اَت کہ ما ناکو سبزل

ءِ ھاتر ءَ ساز ءُ زیملی مراگشے کنگائیں بائد اِنت راج کُمک بہ کنت۔ لہتے روچ ءَ ” بازوش“، ”زبردست“،،”ستاکرزیں جُہدے“ ءِ کمنٹساں سوشل میڈیا سرا زُرتگ ات بلئے پدا ہمے مراگش ءِ گپّ جہل ءَ شُت۔

یک شپے ماں کراچی ءَ ما گوں گُلزار گچکیؔ ءَ ہمنیاد اِتیں، دِیوان ءِ تہا خلیل تگرانی،عارف حکیم، لطیف آزات، وسیم انور،محمد حیاتان، اشرف بلوچ ءُ وہاب بلوچ اوں نشتگ اتِاں۔خلیل تگرانی ءَ چہ گُلزار گچکی ءَ جُست کُت کہ سبزل سامگی ءِ مراگش چون بُوت۔ گُلزار ءَ درّائینت کہ مئے سنگت داؤد کلمتی درمُلک ءَ شُتگ ءُ دزگٹّ اِنت ءُ چیزے زرّ ہم جمع ہم بُوتگ ۔۔ بلئے انگت تیاری سرجم نہ انت۔ خلیل ءُ سنگتاں گُلزار دِل سدّکی دات کہ مراگش ءَ الّم بہ کن ات ءُ ما ہرچ وڑین کُمک ءَ ساڑی ئیں۔

من یک روچے دیست کہ گُلزار گچکی ؔ گوں بجّار بلوچ،داؤد کلمتی،ڈاکٹر عبدالصبور بلوچ، ڈاکٹر غفور شاد، بہرام بلوچ، اِسحاق رحیم ءُ گوں اے دگہ بیلاں نشتگ اتنت ءُ ہمے مراگش ءَ جْوانیں رنگے ءَ برجم دارگ ءِ باروا جیڑگ ءَ اتنت۔

لہتے روچ ءَ پد، یونیورسٹی آف تربت ءِ انسٹیٹیوٹ آف بلوچی لینگیوج اینڈ کلچرءِ کُمک ئَ ، 6، اکتوبر 2018 ءَ اے مراگش ءِ برجم دارگ ءِ جار پِرّینت ءُ 6 اکتوبر ءِ بیگاہ ءَ ماں کیچ ءِ دلبند ءَ اے مزن شانیں مراگش برجم دارگ بُوت۔کہ ایشی ءِ تہا ،، ایران ، خلیج، کراچی، پنجگور، گْوادر، سندھ ءُ جتائیں جتائیں دمگاں مزنیں کساسے مہلوک ءَ بہر زُرت۔سبزل سامگی ءِ اِزم ءُ زند ءِ سرا یوسف عزیز گچکی، ڈاکٹر فضل خالق، ٖغفور شادؔ ءُ داؤد کلمتی ءَ تْران اوں کُت ءُ پدا ناکو سبزل ءِہواری ءَ عارف بلوچ، خیرجان باقری، شاہ جان داؤدی، شہمیر سبزل، نصیب مزارؔ، وہاب بلوچ، مسلم حمّل، شوکت مُراد، آسمی بلوچ، اسماعیل آفتاب ءُ اے دگہ گُشندہاں وتی اِزم درشان کُت ۔ اے مزنین مراگش ءَ کیچ ءِ بیگاہ جلوناک کُت ءُ اے مراگش ءِ تہا زالبولاں مزنیں کساے ءَ بہر زُٗرت ءُ پہ راج ئَ ” مُردگ پرستی “ ءِ ڈوبہ دُور کُت۔مراگش ءِ تہا سبزل سامگی ءَ پنچ لکّ کلدار ءِ چیک اوں دئیگ بُوت۔اے مراگش بلوچی زُبان ءُ لبزانک ءِ دپتر ءَ یاتگار بُوت ءُ راجی اِزمکارانی اوست ءُ اُمیتان ءَ مُہکم کُت۔چُشیں مراگش ءِ برجم دارگ ءَ گُلزار گچکی ءُ آئی بیل ءُ سنگت ،یونیورسٹی آف تربت ءِ انسٹیٹیوٹ آف بلوچی لینگیوج اینڈ کلچر ءِ اے ستا کرزیں جُہد تاں کرناں گیرآرگ کرزیت ءُ ہماہانی راج دوستی ءُدِل ستکی ہم ستاکرزیت کہ آہاں اے مراگش ءِ برجم دارگ ءَ مالی کُمک کُتگ۔چد ءُ دیم چُشیں مراگشانی رِد پہ رِد برجم دارگ ءِ اُمّیت چو کوہ ءَ مزن بُوتگ۔

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔