آمگیں دانکانی شکلّیں پیڑاپ – زِرگْوات بلوچ

32

آمگیں دانکانی شکلّیں پیڑاپ

ندکار :زِرگْوات بلوچ

دی بلوچستان پوسٹ

بے اُوستیں دار ءِ جَمک ءَلونجانیں تُورَگ وتا پیچان اَت کہ اجب نِدارگ چَمّانی نِوان ءَ چیدگ بوھان اَت. ھَمُک دیم ءَ گُمان ءِڈُرتگیں بان ءُ بے دونیں بادگیر گِندگ بوت. بے تاکیں چِنال اُپّار ءِ پیشگاہ ءَ وتئی سبزگ ءِ ودار ءَ چِلّگ کَشّگ ءَ اَت. بے سمائیں کَلندر کوچنڈگانی دْوار ءَ گُباریں گْوندوانی اَندیم ءَ گوں وتئی گُلگانی سَمارگ ءَ گُلائیش اَت.

مُریداں وتا پَہ ڈُھل ءُچاپ، ساز ءُسُرناہ ژَند کُرتگ اَت. ھر یکّے پَہ ھَلاھُوشیں ھُوشام ءِپْروشگ ءَ سِتکانی بُت ءِ تْراشگ ءَ مُلمہ اَت. منی پئیم ءَ دِگہ باز بے تواری ءِپَتّر ءَ نِشتگ اَت ءُ پَہ سیل ءِ چارگ ءَ ھُدوکناک اَت، باز ءَ لبّانی دیم ءَ وتئی زُبان کُبل جَتگ اَت ءُ کِلیت کُل ءِ دیمی چُوڑگ ءَ دَرتکگ ءَ، ءُ باز ءَ وتئی ماں آکوٹ ءَ چَگل داتگ اِت اَنت باز ماں گڑ ءُمَنجانی لکیر ءِ سرا گُٹگیر اَت کہ چے بکنت ءُ بُہ گْوش اِیت چے؟.

من ھمے سیل چارانی رُمب ءِ تَہ ءَ پَہ بے تواری نِندوک اِتاں کہ دِل ءَ پَنت دات ءُ ھمے گْوشت تو پَرچہ گُنگّانی ٹُولی ءَ ھَوار کَپتگ ءُ وتا گُنگ کُتگ. زانہ تئی زُبان کُبل ءُکِلیت گار اَنت، یا مَلشانیں کَلندر ءِ وَزبت ءَ چیروکائی تسبی جن ئے؟ من ھِچّ نَہ گْوشت. چیاکہ دِل راستی ءِ مَرکب ءَ سوار ءُ من پیادگیں راھی! چے بکن آں.

ھمے ھیالانی گیابان ءَ ویل اِتاں کہ دِل ءَ پدا پَہ گُنگّیں زُبان ءِ وازگ ءَ گُون جَت، اگاں تو مارشتانی دامن ءَ دَست نَہ گِرے گُڈ ءَ شپ چِتور وتا بامسار ءِ چَوتاریں پوشاکاں پوش اِیت. منی سِپاھدار پَہ دِگرے سِپارت ءَ مَہ نِند کہ شَبنّدیں دَروازگانی باھوٹی وَدار ءَ پَہ وَدار ءِ وڈالاں باھینّیت. آمگیں دانکانی شَکلّیں پیڑاپ کِشک نَہ رَند اِیت ءُ مَلپداں نہ سبزینیت. بُہ گْوش! مالُم کئے بِہ بیت ءُ ناھُدا ءِ رھدربَری ءَ کئے بکنت؟.

بزّگیں راج پَہ سبر دِل ءَ سھڑینّیت ءُ ھمے ھَبر ءَ سِتک انت کہ شپ ءِ آسر بام اِنت. اَلّم نھنگیں ھُونانی ھار اے لَنش ءُ پَتاراں مانپتائیت ءُ ماں تولدار ءُ جُھلیں چیلّاں مانبُرّیت.

بَلئے! ھمے ھبرے باپُشت ءَ دِگہ ھزار جُستانی لڑ پَہ پَسّو ءِ ھاترا رھسراں میلانک اِنت، چے گْوش ئے؟. اگاں باندا راج سوھو بیت کہ دُژمن و دُژمن اِنت کہ گِلگ نَہ بیت، بَلئے منی جِندے بیرکدار چَہ وتئی کالب ءُ کْیام ءَ دَر سْرپتگ اَنت کہ گندیم دگراں نزآؤرتگ ءُ چینکاں دِگر چِن آں ؟.

ھمے سَوڑگ ،گوں وتا گِر ءُ چیلّانی تَہ ءَ منا واجہ اتا شات ءِ اے شئیر گیر آتک

منی اَھد ءِ ایردستی تئی وھد ءِ بادشاھی
تئی شپ تھار آجو منی بامسار بنداں

گوں واجہ اَتا شات ءِ اے شئیر ءِ گیر آرگ ءَ پَد جُستانی لڑ دْراج بوھان بوت کہ ھوڈیں ساھگانی ساھگ پَہ کَلندر ءِ سِپَت ءُ ساڑا ءَ تادِل اِنت ءُ آبرم ءِ ھنکین ءَ پَہ وتئی پَلاریں واھشتانی ساٹگ ءَ گُلائیش اِنت کہ راج ءِ ھَنکاپگیں ڈگار ءِ کشار کد سبز اِیت………… ھرکس بے سماء کہ مارا راجی ڈُبّوانی بار کوپگ ءَ ،ءُ بیرک دست اِنت. مارا بزّگ ءُ دِرتہ پُچّیں بلوچ راج ءِ آکبت ساچگی اِنت. مُلبَر چے کہ بکنت بس مئے واھشتانی سرکیلی مَہ پْروشیت. مَلو مال ءِ ھُدا اِنت ھرکس بئیت ءُ بجنت، بْوارت مئے مُول ءَ مُول بِہ بیت مَلام ءِ مَلام………

پمشکہ روچ پَہ روچ بزّگ ءُ ھمشامیں بلوچ ءِ اُوست دیم پَہ دیم ءِ جُنزگ ءَ نِزور گِندگ بوھان اِنت. ھاٹیگ ءِ چَمّگ ھُشک ءُ بے باوری ودّان اِنت. تھنا گْوادر، ریکوڈک، سِندک نَہ بلکیں سرجمیں ڈیھ لیلام کنگ ءُ پچگرگ بیت. گُڈ ءَ رَندے نِندگ ءُ بَٹاک ءِ بوجگ ءُ دْرشان، ریس ءُ پَرّیس پَہ ترا بے مُلّیں باندات ئے نَہ گْوپیت کہ تو پہ پھر ءُ شان کوٹ ءُ کلاتانی واھُند بِہ بَہ ئے. چیاکہ اے جُھد ءِ پَچاڑی چابُک اِنت، اگاں پَہ ھوش ءُ گوش مُھکمیں توجیل سازی یے بِندات نَہ کُت گُڈ ءَ پَہ گِلَگ دْرشانی ءَ اے منزل کدی آسر نَہ بیت. نئیکہ تو پَہ وتواجھی وتئی سرڈگار ءِ واجہ بَہ ئے. بلکیں چَہ جھان ءِ مُلبت ءَ پَہ مُجتّی گُمسار ءُ بے نام بَہ ئے کہ کس تئی نام ءَ پَہ دَرگ ئے نَہ گیپت. پمشکہ گْوش اَنت کہ

وھد ءِ کدرءَ بزان وھدءَ پجّاہ بیار
وھد ءَ نیستیں گُناہ وھد ءَ نیستیں میار

چَہ دِگرے سَپارگ ءَ گھتر اِنت کہ وتئی سما ءِ گُکّ بوجگی اَنت ءُ جُھد ءِ لوٹانی رِدا دیم ءَ جُنزگی اِنت. مبادا..!! شُپ، شُپ ءَ دیوان ھَلاس بِہ بیت ءُ ما اَنگت مُبدا ءِ پاگ ءَ بِہ ساٹیں ءُ پادشپادیں بلوچ راج چو مُرگانی وڑا پَہ بامسار ءِ اُمیت ءَ شپ دْرنگ بِہ بیت.

پمشکہ بلوچ راج ءِ مَلشانیں زاناک ءُ رھدربَراں چہ کینگ ءُ کَست ءَ ھما دست گھیں راج ءِ داتگیں دیمھونی زانگ ءُ پھمگی اَنت کہ مرچیگیں وھد ءِ لوٹ ءُ تلب چی اِنت ءُ مارا چے کنگی اِنت؟. چیاکہ رُنْگ، رُنْگ. (ھما دلوت کہ چُکّ ئے نیست ءُ آپُس ھم نَہ بیت) اِیں اَلوتانی بام ءَ داتگ ءُ کرپدانکیں دانکانی آمین ایرھت بوتگ، جوریں وشنئیتکانی بَدّیں نیّت ءِ آس ھر نیمگ زُبان کشّان اِنت. بژن بس ھمے گپّ ءَ! مارا وتئی نادُراھی ءِ اِلاج کنگی اِنت داں وھد ءِ ھمبرائی ءَ بے نامیں مرگ مَہ چامپیت، اے پیسلہ وھد ءِ بَدل ءَ مئے دست ءَ اِنت کہ پہ راج ءَ کُجام توجیل ءَ بِہ سازیں……………؟

بیا پدَا شَتکیں تَلارانی دِلاں دِرّاں کنیں
گْراں بھائیں دوستی ءُ مھراں پَدا اَرزاں کنیں

دور نَہ اِنت منزل ھزار گنج ءُ ھزار نازیں سید
ھمبلاں زوریں چو کئور ءَ دورسریں رُمباں کنیں
سید ھاشمی

دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔