کُج اَنت ننگ ءِ پاسپان – اکیل مراد

212

کُج اَنت ننگ ءِ پاسپان

اکیل مراد

دی بلوچستان پوسٹ

شیرو مری یک کسانوکیں تامری ءِ تہ ءَ گپ کنگ ءَ ایں کہ من دیستگ “بلوچانی جنکیں چک بھا کنگ، جیلانی تہ ءَ بند کنگ بوھگ ءَ اَنت گڑا ما زر داتگ ءُ ھمے چک پَچ گپتگ ءُ پہ مات ءُ پتاں رسینتگ اَنت تاں آ بزگ ءُ نیزگارانی پش کپتگیں ھستی مہ رو اَنت “۔

بلوچ وت ءَ مزن شان ءُ ازتمندیں راج ءِ گْوش اِت وت ءَ بھادر ءُ دلیر ءِ گْوش اِت وت ءَ بامرد ءُ سرانی ندر کنوکے گْوش اِت۔ وت ءَ مھماندار ءُ ازت دیوک گْوش اِت ۔ ھو اے گپ بلوچ راجدپتر ءَ ھم نکش اِنت کہ بلوچ ءَ وتی سر داتگ بَلے ننگ بھا نہ کرتگ بلوچ ءَ وتی سر داتگ وتی میار جَل رکینتگ بلوچ چہ بُنپد ءَ پیداک اِنت بلوچ یکشل ءَ ازت مند ءُ سرانی بباہ دیوکیں راجے ءِ وڑ ءَ یک راجے ۔

نی مشکے ءِ کسہ ءَ کمے دلگوش کن ایں کہ پاکستان ءِ وتگڑیں گچینکاری ءَ چہ پیسر پاکستان ءِ زورامندیں لشکر ءَ کسان سالیں زمیر نامیں یک گونڈوے آوار جتگ ءُ برتگ اَت چریشی ءَ پد ھمے پاکستان ءِ زورامندیں لشکر ءَ زمیر ءِ مات نور ملک، زمیر ءِ گھار ھسینہ ءُ زمیر ءِ گھار سمینہ ھم آوار جتگ ءُ وتی بنجل ءَ برتگ اَنت۔

مروچی چنت روچ گْوزگ ءَ پد ھم نور ملک، ھسینہ ءُ سمینہ ءِ ھچ وڑیں ھال نیست کہ آ باریں اے وھد ءَ کجام ھال ءِ تہ ءَ اَنت بلے دل الم ھمے گپ ءَ دلجم انت کہ پاکستان ءِ رستریں فوج اے زالبولانی گون ءَ ناروائیں وڑ ءُ پئیماں کنت آیانی گیریت ءَ ھم دست جَنت آیاں لَٹ شاپ ھم کنت آیاں ھما وڑ کنت کہ رستریں لشکر ءِ دل لوٹ اِت۔

پرچاکہ پاکستان ءِ فوج ءَ بنگالیانی ننگ پادمال کُت بنگالیانی جنین ءُ چکانی گون ءَ رستریں فوج ءَ ھما کساس ءَ ناروائیں کار کرت اَنت کہ ھندوستان ءِ فوج ءَ اوپار کرت نہ کرت اَنت ءُ آیاں بنگالی چہ رسترانی پنجگاں رکینت اَنت بَلے بنگالی بے توار نہ بیت اَنت پمیشکا ھندوستان ءَ بنگالیانی درد اوپار کرت نہ کرت اَنت مروچی بنگالی چہ رستراں چُٹیت ءُ آجو اَنت بَلے بژن ھمے بیتیں بلوچ پرچا بے توار اَنت۔

بلوچ پرچا وتی ننگ ءُ ناموس ءِ واست ءَ جھان ءَ سرپد کنگ ءَ بے سوب اَنت پرچا دشمن ءِ دیم ءَ سر شَکون اَنت پرچا وتی دست ءُ پاداں کارمرد کنگ ءَ نہ اِنت اے ھبر ھنچش جیڑین اَنت کہ اے ھالاں مردم ایش کُنت دل گْوش اِت ساد ءَ کُٹ ءَ کن ءُ وت ءَ ھنچیں یک کُنٹے ءَ بہ درنج کہ جون ءَ ھم کَس مہ گِندیت کہ شکانیگ بنت۔

ھمدست بہ بیت ءُ اے زوراکیں کردارانی ھلاپ ءَ بہ جنز اِت ءُ بدیں دستاں ھروھدی ءَ بہ گُڈ اِت تاں تی آھوکیں پدریچ یک وشھال ءُ ایمنیں زندمانیں بہ گوازین اِت۔

زوت کن بلوچ نورملک ءَ بہ رکین
زوت کن بلوچ ھسینہ ءَ بہ رکین
زوت کن بلوچ سمینہ ءَ بہ رکین