سازین – گڈیکو بشخ – مہر میر – عتیق آسکوہ بلوچ

199

افسانہ

سازین

(گڈیکو بشخ)

نوشت: مہر میر
مٹ: عتیق آسکوہ بلوچ

افسانہ- سازین -ارٹمیکو بشخ

بھاز ارے اسکان ہننگ آن گڈ دیگر تون شیرجب نا لکڑ آ سر مسر۔ دُنکہ میلہ لگوک ئس۔ ماہ خاتون پارے: ’’علی نا باوہ داڑے مخلوق نا مُچی ءِ دافتے خنیسہ سازین نا طب بگڑینگک۔ ‘‘
جلال خان ورندی ٹی پارے: ’’ماہ خاتون ہچ مفک۔ سازین ءِ اونا حالیت آ یلہ کر، باور کہ فطرت ننا کمک کن بسونے۔ نی بس اُریسہ کر۔‘‘

اوفک تینکن جُب اس ٹہیفسہ تولسر۔ جلال خان خاخر لگیفے، سازین لمہ نا بغل ٹی کاٹم تخوک آسمان آ استار تے اوننگ ئس۔ اوفتیتون دنکہ ہیت کننگ ئس۔ ننکان دمال مروئی ئس۔ دمال نا تیاریک ایسر مسوسر۔
ماہ خاتون پارے: ’’جلال خان، دمال نا توار آن سازین نا طب خراب مریک۔ داکان مُر کانبو۔‘‘
جلال خان پارے: ’’ ماہ خاتون، ہچ مفرو۔‘‘

مدان آ دمال بناء کرے۔ سازین دھول ئنا توار ءِ بنپ، ماہ خاتون تینا گد ءِ اونا زی آ شاغا۔ ولے تنّک انگا گد ہراکان فطرت نا رنگ آتے اسٹ ایلوڑ تون اوڑدئی آن توننگ کیک۔ سازین نا خف تیا دمال نا توار تما گڑا اونا بدن ٹی بے جاراتی اس تالان مس۔ لمہ ہمو بے جاراتی ءِ سرپند مس و او سازین نا کوپہ غاتے ترند آن ہلک تورے کہ او بش مننگ کپ ولے اندن کہ دھول ئنا توار زیات مریسہ کرے سازین نا بے جاراتی ہم زیات مس۔ ارٹمیکو ساعت اتون سازین بش مس توس و دمال نا پارہ غا اوریسہ کرے۔ ماہ خاتون خلیس آن جلال خان ءِ کُوک کرے۔ جلال خان سازین نا پارہ غا اُرا، اوسازین نا خن تیٹ خاخر بش مریسہ خنا۔ فطرت نا اسہ رنگ اس تینا جہان نا تیوئی مننگ کن بے جارات ئس۔ ماہ خاتون، سازین ءِ تینا پورہ وس ئتون ہلوک توروک ئس ولے سازین لمہ نا دُو ءِ خسّا و جِک سلیس۔ ماہ خاتون جلال ءِ اسیکہ وا توار تس: جلال تُور دادے۔

جلال خان پارے: ’’ماہ خاتون ہلیتہ ، سازین فطرت نا رنگ ئسے، کائنات نا ایسر نہ مروکا شابیتی تا ہمو بشخ ہرا اوڑان بیدس مننگ کپک۔ ننا کاریم ئس اودے فطرت نا دُو اٹ تننگ و نن تینا کاریم ءِ کرین داسہ دا قدرت نا باہوٹ ءِ۔ فطرت تون اوار مننگ کن ہننگ ءِ، نن اودے توننگ کپنہ۔ نن دا وخت اسکان اودے توریسہ دا حالیت آ سرکرینن۔ دا فطرت نا رنگ ئسے ہرا رنگ آتیتون اوار مریسہ خدا نا قدرت نا پوروی ءِ کیک۔ چاگڑد ننا فطرت آن چپ بد آ رویہ و خلیس کون آ نفسیات آتیتون گنڈوک مریک اندا خلیس ننے خدا آن دروغ نا خدا تا پارہ غا دننگ ءِ۔ سازین خوشی، ٹاکو، چھاپ و چَس ہلنگ نا بندغی دروشم ءِ، اودے کیذ کریسہ نن گیمریفینن۔

سازین نا گامک دمال نا پارہ غا ہننگ ئسر۔ ساعت ئسے آن گڈ سازین دمال آ چھاپ ئٹی ئس۔ او رنگ آتیتون اوار تماسُس۔ او جتاؤ بشخ ئسے آن تیوی آ کائنات تون اوار مسوسُس۔ او تینا خدا تون اوڑدئی کننگ ئس۔ خدا اوڑتون ساز و باگل نا بولی اٹ ہیت کننگ ئس و سازین چھاپ ئنا دروشم اٹ اونا عبادت اٹ مشغول ئس۔۔۔۔۔۔۔۔۔