ہشت جون بیگوائیں بلوچانی روچ – ھمل بلوچ

244

ہشت جون بیگوائیں بلوچانی روچ

نبشتہ کار: ھمل بلوچ

دی بلوچستان پوسٹ : بلوچی کالم 

ھشت جون ءِ درگت ءَ بی ایس او آزاد ءِ نیمگ ءَ چے اے روچ پہ گار ءُ بیگوائیں بلوچ پُسگانی واستہ دارگ بوتگـ مرچی اگں ما بلوچستان ءِ ہر کُنڈ ءُ دمگاں بچاریں مارا یک بلوچ پسگیں گار ءُ بیگوائی ءَ گندگ ءَ کیت
ھمے رد ءَ مئے سنگت ،دوست ھمراہ، مئے لیڈر، رھشون گار ءُ بیگواہ انت زندان ءَ لٹ ءُ کُٹ برداشت کنگ ءَ انت ۔

ما مثال ءَ بزیراں زاکر جان ءِ کہ نو سال انت انگت گار ءُ بیگواہ انت ھمے رنگ ءَ ڈاکٹر دین جان ،رمضان، ایدگہ بازیں ورنا، کماش زھگ زالبول پاکستانی تہاریں زنداناں درد ناکیں سزا برداشت کنگ ءَ انت.
ھمے کہ مردم گار ءُ بیگواہ انت ایشانی تہا سک باز ءِ کُنٹ مارا دست کپتگ انت ءُ بازین ءِ دمبانی شکل ءَ بے گور ءُ کپن ءَ بار دھگ بیتگاں اے گپ ءِ ھقیقت مئے دیما کئیت 2014 ءَ خضدار تُوتک ءَ( یک سد شست ءُ نو ) لاش یک دمب ءِ تہا مارا گندگ ءَ اتک نی اے گپ ءَ مردم سک باز پریشان انت ھما مردمانی کہ مردم گار ءُ بیگواہ انت وتی دل ءَ دلجم نہ انت کہ مئے مردم زندگ یا مُرتگاں ۔
اے معاملہ ءِ جند سک ءَ باز ھترناکیں معاملہ ءِ پرچہ کہ اے رنگیں ھیال مردماں زہنی مریض جوڑ کناں اگاں ھاندان ءِ یک مردم گار ءُ بیگواہ انت گُڑا درست بے چینی ءِ آماچ بنت درست بے وار بنت درستانی زہنی توازن شنگ بیت ھمے رنگیں جیڑہاں باز مردم بے چاڑی ءَ گوں مرُتگ باز انگت بے ساری ءِ آماچ انت ۔
دگہ یک ساپیں مثال ءِ ءُ یک راستی ءِ مئے دیما انت ھمے رؤکیں ھپتگ ءِ تہا بیگوائیں سفر خان ءِ لوگ بانک ءَ بیگوائیں شبیر ءِ ناکو زتک چہ وتی وازدار ءِ وتی ناکو زتک شبیر ءِ گاری ءَ زہنی نادرائی ءِ آماچ بیت زیادہ ایں گم، درداں برداشت کُت نہ کنت ءُ کوڈئیں دُگنیا ءَ یل کنت ءُ ھمے رنگ ءَ دگہ بازین ءِ مرگ ءِ آماچ بیتگاں بلے مردماں آہانی اسل وجہ نزانتگ کہ پرچہ اناگت ءَ وفات کناں آ ارٹ اٹیک ءِ شکل باں بلے مردم سرپد نباں۔

ھمے رنگ ءَ بی ایس او آزاد ءِ وائس چیرمین زاکر جان ءَ نومی سال انت کہ گار ءُ بیگواہ انت زاکر جان ءِ بانکیں گُہار فرزانہ مجید کوئٹہ تاں کراچی پدا اسلام آباد ءَ پیادگ سپر کنت سمّی وتی پت ءِ آجوئی ءِ ھاترا ھم فرزانہ ءِ رنگیں درد ءُ رنج کاٹیت الی ھیدر پہ وتی پت ءَ بلے کس ءِ چہ پاکستانی زندانان ءَ آجو نبیت۔

انگت گوں زور ءَ گرگ ءُ برگ گار کنگ ءُ بیگواہ کنگ گوں زور ءَ جاری ءُ، ساری، روان انت ۔ انی زوت ءَ بی ایس او آزاد ءِ بنجاہی کار گشاد گوں سی سی ممبر حسام بلوچ ءُ نصیر احمد بی این ایم ءِ ممبر رفیق بلوچ کراچی ءَ پاکستانی چیریں ادراہانی دست ءَ گار ءُ بیگواہ کنگ بنت ۔

بیگوائیں مردمانی آجوئی ءِ بابت ءَ ماما قدیر نو سال بیت کہ کوئٹہ ءُ کراچی ءِ پریس کلباں شُد ہڑتالی کیمپ جتگِ ءُ نشتگ بلے ریاست ءِ پاکستان ءِ حکمران بیگوائیں بلوچانی بابت ءَ اون ھم نکناں ءُ دومی دنیا ءِ تہا انسانی حکانی تنظیم ادارہ استاں درست بیگوائیں بلوچانی بابت ءَ تُک ءُ نوک انت بے توار انت۔

مردم برے برے وتی دل ءَ جیڑیت کہ آیا بلوچ انسان نیاں بلوچستان دنیا ءِ حصہ ءِ تہا نہ انت؟ اگاں بلوچ انسان انت بلوچستان دنیا ءِ حصہ ءِ تہا یک ارزشت ءِ داریت گُڑا دنیا ءِ انسانی حکانی تنظیم بلوچ قوم ءِ بابت ءَ پرچہ گپ نکناں ۔ درستانی چم بندی زبان بندی آہانی بے ضمیری ءِ نشانی ءَ دنت بلوچ ءِ مسلہ ءَ پاکستان ءِ پجیگءَ دنیا ھم ھوار انت پرچہ کہ پاکستان بلوچ قوم ءِ سرا ظلم ءُ زیادتی کنگ ءَ انت بلے دنیا ھاموش اِنت ءُ زبانی گُنگ انت ۔

دومی ھمے مُلا کہ اسلام ءُ دین ءُ قُرآن پاک ءِ گپ ءَ جناں بلے پاکستان ءِ گون پاکستان ءِ ظلم ءَ ھوار انت ھمے مُلا منا اے شون بدیاں کہ کجام مذہب گُشی کہ ظلم ءِ ھلاپ ءَ گپ مجن کجام قُرآن پاک ءِ تہا است کہ ظلم ءَ گندے ھاموش بو ھچ مگوش ھچ مکن اے سکین ءُ سوج ءَ قُرآن ھم دنت کہ ظلم ءِ ھلاپ ءَ جنگ کن ءُ شہادت نوش کن پاکستانی مُلا مئے دیما انت بلوچستان ءَ بلوچانی سرا ظلم ءُ جبر بوھگ ءَ انت بلوچ زھگ، ماس، گُہار، پیر ءُ کماش گار ءُ بیگواہ کنگ بوھگ ءَ انت مُلا پرچہ ظلم ءِ ھلاپ ءَ پاد نیاں انت گپ نکناں مُلایانی ھاموشی ظلم ءِ ھواری ءِ برابر انت مطلب پاکستانی مُلا بلوچ ءِ ببیت چائے دگہ قوم ءِ درست ھوار انت بلوچ قوم ءِ سرا ظلم کنگ ءَ ـ۔

من گوں وتی بلوچ راج ءَ ارز کنی کہ ظلم ءِ ھلاپ ءَ پاد بیا انت گار ءُ بیگوائیں مردمانی بابت ءَ آواز چست بکنے چائے کجام ھم تبکہ ءِ مردم باں درست توار چست بکناں دومی گوں بی این ایم ءُ بی ایس او آزاد ءَ گون زور ءَ ارز کنی ھما مردم کہ گار ءُ بیگواہ انت آہانی پورئیں ڈیٹا ءَ یکجاہ بکناں ءُ پاکستان ءُ دگنیا ءِ دیما بیا انت تاکہ بیگوائیں بلوچ پُسگانی کیس دگنیا ءَ شنگ بہ بیت تاکہ دگنیا پاکستان ءَ ملامت بکنت ءُ پاکستان ءِ ظلم دنیا ءِ دیما چو روچ ءَ پدر بہ بیت۔