پرّک نا شونق – نظام نذیری

427

پرّک نا شونق

نوشت: نظام نذیری

دی بلوچستان پوسٹ : کالم

نن نا دہ بجہ ئس اِرغ آن گُڈ چاہ ئسے نا خواست ءِ کریٹ انتئے کہ ہمو دے سُہب ئنا ای و شرفدار عمر زہری صاحب اوفتا اسہ سیل سوات نا جاغہ ئسے آ چمنی و گل گلاپ تخنگ کن ہناسن، بھاز دمدروک ئسوٹہ پاریٹ پاڷی ءُ چاہ اس مرے ولے لُمہ جیجا ہکّل کرے نہ کنا مڷ نے جکّہ ءِ سینہ نا گرفت ءِ پاڷی آ چاہ نا طب آ تمپک گُڑا تورموری نا چاہ اس مرے دمدری ءِ نا خلیک و سینہ ءِ نا خُلکن کیک، ای امنّا کریٹ… دم اسے آن گڈ چاہ جوڑ مس، لمہ جیجا تون ہوار اونا چاشنی آ مہراک چاہ ئنا کُنِنگٹ پین چس اس شاغار، ہیت و گپ کریسا یانزدہ بجہ مس جیجا پارے اِن داسہ خاچ ڈکّہ تینے خید کے نے آرام کہ… پیش تمّاٹ تینا کوٹی نا پارہ غا خاچنگ کِن ولے ہتم نا مُد ئس، نن تا تہارمہیک بے کچ گیشتر مریسہ کریرہ انتئے کہ طوبے نا ہم ڈس اَلّو، اِستاک ام اودیم ئسر، جمراک پینگن تفیسر، ہورہ غاتا توار غامب و غیمب ئسکہ، گروکاک ہم کچ آن زیات جوش ئٹی ئسرہ،
ای مچے ولدا پیشن آ پیش تماٹ گڑا تہوک بھاز ترند و جِبر ئسورک، درغ آتا گڑیپارہ ئسکہ، پِر ئنا تِرتِر ہم بناء مسوسس، ای پدی مسوٹ کوٹَو نا درغ ءِ سخت تفیٹ…، بسٹ دیخس سرجہ غا کاٹم ءِ تخاٹ تنیائی طبیعت نا ناسازی اِیکان، تہارمہ غا نن و ایلو ہورہ و گروک آتا چیلک آک کُننگ کن بسورہ ولے کنا تُغ تے تو پرّیفیر…، بر داسہ پورا کرتے… بجلی ہم اناسُس، دا بھلا تہوتیان…، ایہن نیمون جوڑ اس دا تار تیا چُکس توس بجلی ءِ وار ایتک اننگ کن… داتو بھلو تہو اس ئسکہ… بش مسوٹ، دو بٹیسہ باکس ءِ خناٹ ایہن ہم کنے آن خڑک تخوک ئسکہ انتئے سگریٹ پوک تننگ کن تو کنے وار تفک، تیلی اس لگفیٹ متکنا پیٹی نا پارہ غا خُنذک کریٹ تو کنے کنا ساہ ئنا بند کنا جغر نا ٹُکر کنے آن بھاز خڑک اننگا مہروان آ ادب دوست، پُر فکر آ کنا خواجہ و کنا خنتا دیدہ، ہنینا ایلم خواجہ شرفدار محمد عمر زہری صاحب یات بس انتئے کہ اسہ دے دفتر اٹ ای اوڑتون یات کریسٹ کہ کنتون مُتکنو پیٹی اس تخوک ءِ..!

دا پیٹی کنا زند ئنا داستان ءِ انتیکہ داٹی کنا چُنکی آن ہلیس بیست و پنچ سال اسکان ماضی نا ہر اسہ یات گیری تے جہی کرینٹ، پیٹی ءِ ملاٹ تیوی آن مُست مر ئنا پرہ ءِ ارفیٹ دُنگ اسیٹی مچے سیاہی و کاپی تون اوار اسہ مِش ئنا چراغ اس تخوک ئس. دافتے کشاٹ اوکان گُڈ آدینک نا پارہ غا مون کریٹ تو کاٹمی آ تیل تے آن ارفیٹ چراغ اٹ شاغاٹ سوتلی ءِ تیلی اس خلکُٹ، رَپ رَپ کریسہ چراغ لگّا، اسہ دم تون پوشکُن ءُ روشنائی اس اُرا ٹی تالان کرے. داسکان کاپی ءِ نوِشتہ کِن ارفتویسٹ کہ انداڑتون مِش ئنا چراغ مونٹ بس، خناٹ بھاز تیزو ردوم اسیٹی اسہ زیباؤ پِرّک اس روشنائی نا کُنڈا پرّہ خلیسہ بسّکہ، بھلّا مُرغن آ نن ہم تو اِسپید رنگ ءِ خُڑک شاغاسُس، سُہب آن گیشتری پش اس سلوک ئس، کنادا گُمان اس کہ تینا پاوالی و خلقی آ مخلوق نا بارہ اٹ گڑا اس نوشتہ کیو، دُنکہ ہتم نا گواڑخ ہورہ گروک و تہو تے چلتن نا دامان، بولان نا وَل تے کچی، خُراسان نا زیبائی و اُچ آتا قطار و مابل آلُم، مڈی و شوہان، بُزگل و کُرنو شِتی، ایزک، خواء، زِکّ و خرواڷ، خسّی، خاسُن، خریش و مدر دا تیوہ غاک تینا ہنینا بولی نا ربیدگ و گدان، پژدر، کونٹ و شُفی دا زیبا غا لوزاتے نوشتہ کیوہ، اسہ نظم اسیٹی بند کیو ولے پرّک نا شونق ءِ خناٹ کہ امر تینے شمع غا اُشنگ ءِ اونا عشق اخہ در اعلیٰ ءِ، او امر تینے دا ہجر ئنا گواچنی کننگ ءِ، دا کُڑمبی ٹی ای ڈُب ہناسُٹ کہ ہنداڑتون مُلّا خفتے ٹی الک بانگ تِس.
پین اِچ متو گُڑا نوشتہ کریٹ:
شمع غان در احوال ءِ اَت بر نی
ایتے ڈسّ ءِ اُشوکا پرّک نا…؟