بلوچ اسٹوڈنٹس ایکشن کمیٹی پنجگور زون کے صدر شاہ زیب بلوچ نے اخباری بیان جاری کرتے ہوئے کہا کہ اس وقت پورے بلوچستان میں بی ایس پروگرام شروع کیا گیا ہے لیکن المیہ یہ ہے کہ ٹیچرز اور اسٹاف نہ ہونے کی وجہ سے بی ایس پروگرام متاثر ہونے کےساتھ ساتھ بے فائدہ ثابت ہو رہا ہے جو کہ ہم سمجھتے ہیں متعلقہ اداروں کے ناکامی کی ثبوت ہے۔ اس وقت پنجگور گرلز کالج میں اسٹاف کی کمی کی وجہ سے تعلیمی نظام درہم برہم ہو چکا ہے صرف 2 ٹیچر کی موجودگی سے پتہ چل رہا ہے ہم اپنے بچوں کو کیسی تعلیم دے رہے ہیں اور تعلیم کے حوالے سے کتنے سنجیدہ ہیں۔اس وقت پورے بلوچستان میں تعلیمی ماحول روز بروز زبوں حالی کا شکار ہو کر پسماندگی کی طرف جا رہی ہے ہم سمجھتے ہیں کہ تعلیمی زمہ داروں کے کھوکھلے نعرے پانی کے بلبلے ثابت ہو رہے ہیں جو کہ بہت بڑھے المیے سے کم نہیں ہے۔
انہوں نے مزید کہا کہ ہم صوبائی گورنمنٹ، چیف سیکرٹری اور وزیر تعلیم سے اپیل کرتے ہیں کہ وہ بی ایس پروگرام کو بے فائدہ ہونے سے بچانے کیلئے ضلع پنجگور سمیت پورے بلوچستان کے کالجوں میں ٹیچروں کی کمی کو پورا کریں۔
