!!..اگہ امریکئی کمانڈوک سرینگر آن بال کریرہ

290

نوشت: وسعت اللہ خان

مٹ: عتیق آسکوہ بلوچ

گمان کبو کہ محمد علی جناح نوزدہ سد ءُ پنجا و پنچ اسکان زندہ مسکہ گڑا انت قرار دادِ مقاصد ہمو تم منظور مسکہ؟

ایوب خان ءِ کمانڈر انچیف نا دروشم ئٹ ارٹمیکو وار مَوکّل رسینگاکہ؟ غلام محمد و سکندر مرزا نا پِن ءِ کس بنوک مسکہ؟

گمان کبو دے ٹکی پاکستان نا پِن مروس دے کہی ہلنگوک پاکستان گڑا انت واہم وَن یونٹ جوڑ مسکہ؟

گمان کبو فاطمہ جناح پاکستان نا صدر مروس گڑا انت شست و پنچ ئنا جنگ واہم مسکہ؟ انت مجیب الرحمٰن غدار پِن کننگاکہ؟

گمان کبو ذوالفقار علی بھٹو’ جنرل ذوالفقار علی بھٹو مروس گڑا انت پنچ جولائی و چار اپریل واہم بسکہ؟

گمان کبو انڈیا نا پِن مروس سعودی عرب و اوغانستان نا پِن مروس یو اے ای و دُوارہ اوکان بروک مروس شدت پسندی و جنونی تیکن لَس آ زند ئنا زریعہ تیان کمک. گڑا انت اوتم ہم سال آتے اسکان بیدس سوج و اڑانگ آن بریسہ کریکہ؟

گمان کبو امریکئی ڈرون آک جلال آباد نا جاگہ غا انبالہ آن بال کریرہ گڑا انت اوفتا جلہو تا کچ او تم ہم شش سد آن زیات مسکہ؟ و گمان کبو امریکئی ہیلی کاپٹر سرینگر آن بال کریسہ ایبٹ آباد ئٹی دڑارہ گڑا انت سرینگر آ واپس ہم ہنارہ؟

انت پاکستان نا ڈغاری، آسمانی و دیری حد و ہویل آک اسٹ ءُ یا بشخ (کیٹگری) اے و بی آتیا تالان ءُ؟

گمان کبو پانامہ پیپرز اِرا ہزار و شش ئٹی شیک مسرہ و اوفتیٹی صدر پرویز مشرف و اونا خاہوت نا پِن ہم مسکہ؟

گمان کبو آصف زرداری سوب ئسے آن سپریم کورٹ نا چیف جسٹس ءِ کشسہ راہ بند ءِ وختی وڑ ئٹ معطل کریکہ و دوارہ ایمرجنسی خلککا و صدارت آن دُو خلاسی آن گڈ اوڑا راہ بند نا آرٹیکل شش آن غداری نا مقدمہ چلینگوس ہرانا سزا مرک ءِ. گڑا انت اودے ضمانت آ پیشن ملک ہِننگ نا مَوکّل مسکہ؟

گمان کبو تیل ٹینکر بہاول پور نا جاگہ غا پاڑہ چناڑ ئٹی چَپی مسکہ و اسہ سد و نونزدہ بندغ ہُشنگارہ و اِرا وَت کُش جلہو بہاول پور ئٹی مسرہ و ہشتاد و پنچ کہوک مسرہ. او تم نواز شریف نا جانز تیوہ غاتیان مُست ہراڑے دڑنگاکہ؟

گمان کبو احمد شجاع پاشا امریکہ ٹی پاکستانی سفیر مسکہ و حسین حقانی لاہور نہ اسہ عدالت اسیٹی تولوک ریمنڈ ڈیوس نا بابت امریکئی سفیر کیمرون منٹر تون ایس ایم ایس آ ہر ساعت حوال ئٹی مسکہ گڑا پاکستانی میڈیا و اسٹیبلشمنٹ حقانی تون امر کریکہ؟
بلکن ریمنڈ ڈیوس نا کتاب “دی کنٹریکٹر” ہم انداخہ اہم ءِ اخس پانامہ پیپرز. انت عمران خان ریمنڈ ڈیوس نا ہیت آتا رِد ئٹ پٹ و پول کن عدالت تون حوال کننگ خواؤ ءِ یا تینٹ نوٹس ہلنگ نا خواست کروئے یا ہیت ءِ نہ بِننگ نا سوب “دھرنا” ایتو ءِ؟

یا اسہ پارہ ئسے آن پٹ و پولی کمیشن ئسے نا خواست کننگو کہ ہراٹی ہمو وخت ئنا وزیرِ خزانہ شاہ محمود قریشی، تدوکا وزیر اعظم یوسف رضا گیلانی، تدوکا صدر آصف علی زرداری، تدوکا سپاہ سالار جنرل ریٹائرڈ پرویز کیانی، تدوکا سپائی ماسٹر لیفٹننٹ جنرل ریٹائرڈ احمد شجاع پاشا، ریمنڈ ڈیوس نا یلہ کننگ نا فیصلہ تروکا عدالت نا تدوکا شرفدار آ جج و مرک ئنا گواچی مروکات اِرا خاہوت و اوفتا وکیل آک ہم خلیس و تَڑی تیان پاک شاہدی تے نوشتہ کریفنگ کرور.

و ‘ریمنڈ ڈیوس ءِ پاہو ایتبو’ نا آسمان تون لگوکا برانز آتیتون اوار ترندو مظاہرہ کننگ ئٹی لائخی تخوکا جماعتِ اسلامی، جمیعت علمائے اسلام و ایلو دینی جماعت آتیان ہم وضاحت خواہنگو کہ دا تحریک ریمنڈ ڈیوس نا جانز نا بڑز مننگ تون پین زیات تالان مننگ نا جاگہ غا کَف آتیانبار انتئے شیف تُوس؟ انت دا تحریک ٹی ہم ٹائمر اس خَلوک ئس؟ و گمان کبو کھلبوشن جادیو بلوچستان آن ہلنگوس ولے”را” نا جاگہ غا ریمنڈ ڈیوس نا وڑ “سی آئی اے” نا ایجنٹ اس پیشن مروس گڑا او وختا ہم تینا کروکا کڑدار تے منوکا ویڈیو تے مونا بسکہ؟